ⵜⴰⴳⵓⵔⵉ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵓⵛ ⵙ ⵓⵣⵎⵣⵣⵓ ⵏ ⵜⴼⵓⴳⵍⴰ ⵏ ⵓⵏⵏⵓⵕⵥⵎ ⴰⵎⴰⴷⴷⵓⴷ ⵏ ⵜⵎⵙⴽⴰⵔ ⵏ ⵓⵖⴰⵡⴰⵙ ⴰⵎⵙⴰⴷⴰⴼ ⵏ ⵓⵙⵎⵀⵍ ⵏ ⵜⴼⵔⵉⵙⵜ ⵜⴰⵎⴰⴷⴷⵓⴷⵜ ⵏ ⵜⵎⴰⵣⵉⵖⵜ

ⵙ ⵢⵉⵙⵎ ⵏ ⵕⴱⴱⵉ ⴰⵎⵍⵍⴰⵜ ⴰⵎⵙⵍⵓⵍⵍⵓ
ⵜⴰⵥⴰⵍⵍⵉⵜ ⴷ ⵓⴼⵔⴰ ⵖⴼ ⵓⵎⴰⵣⴰⵏ ⵏ ⵕⴱⴱⵉ ⵓⵍⴰ ⴰⵢⵜ ⴷⴰⵔⵙ ⵎⴰⵕⵕⴰ,
ⵎⴰⵙⵙ ⴷ ⵉⴷ ⵎⴰⵙⵙ ⵉⵎⴰⵡⵙⴰⵙⵏ,
ⵜⵉⵍⵉⵜ ⵉⵄⵣⵣⴰⵏ
ⴰⵢⵜⵎⴰ ⴷ ⵉⵙⵜⵎⴰ, ⴰⵣⵓⵍ ⴼⵍⵍⴰⵡⵏ,
ⵉⵙⵙⵎⴷⵣ ⵉ ⴳ ⵜⵉⵣⵡⵓⵔⵉ, ⵉⴷⴷⵖ ⵜⵓⴷⵙ ⵜⴼⵓⴳⵍⴰ ⵏ ⵓⵙⴳⴳⵯⴰⵙ ⴰⵎⴰⵣⵉⵖ 2973, ⴰⴷ ⵙⵙⵉⵔⵖⵓⴷⵖ ⵉ ⵎⴰⵕⵕⴰ “ ⴰⵙⴳⴳⵯⴰⵙ ⴰⵎⴰⵣⵉⵖ ⵉⵖⵓⴷⴰⵏ”,
ⴰⵎⵏ ⵜⵙⵙⵏⵎ, ⵉⴷⴷⴰ ⴷ ⵓⵙⵉⵙⵙⵏ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ ⵙ ⵜⵉⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⴰⵢⵜ ⵍⵍⵉ ⵢⵓⵊⵊⴰⵏ ⴰⴷ ⵏⴱⴱⵉ ⴽⵉⴳⴰⵏ ⵏ ⵉⵙⵓⵔⵉⴼⵏ ⴳ ⵙⵉⵎⵔⴰⵡ ⵏ ⵙⵉⴳⴳⵯⴰⵙⵏ ⵣⵔⵉⵏⵉⵏ; ⵉⵙⵙⵏⵜⴰ  ⵓⵙⵏⴼⵍ ⴰⴷ ⴰⵎⵣⵔⴰⵢ ⴰⴽⴷ ⵢⵉⵏⴰⵡ ⵏ ⴰⵊⴷⵉⵔ ⵍⵍⵉ ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ ⴰⵙⴳⴳⵯⴰⵙ ⵏ 2002;
ⴳ ⵓⵙⴳⴳⵯⴰⵙ ⵏ 2019, ⵉⴼⴼⵖ ⴷ ⵓⵙⵍⴳⵏ ⴰⵎⵙⵙⵓⴷⵙ ⵍⵍⵉ ⵉⵙⵎⵍⵏ ⵜⴰⴼⵔⵉⵙⵜ ⵜⴰⵎⴰⴷⴷⵓⴷⵜ ⵏ ⵜⵎⴰⵣⵉⵖⵜ ⴷ ⵉⵎⴰⵙⵙⵏ ⵏ ⵓⵙⵉⴷⴼ ⵏⵏⵙ ⴳ ⵓⵙⵙⵍⵎⴷ ⴷ ⵎⴰⵕⵕⴰ ⵜⵉⵙⴳⴳⵯⵉⵏ ⵏ ⵜⵓⴷⵔⵜ, ⴰⵢⴰ ⴹⴰⵕⵜ ⵜⴰⵎ ⵏ ⵉⵙⴳⴳⵯⴰⵙⵏ ⵏ ⵓⵣⴷⵓⵔ ⵉⵎⵃⴹⵉ, ⴰⵔ ⵉⵙⵙⵏⵜⴰⵎ ⵓⵙⵍⴳⵏ ⴰⴷ ⵙ ⵓⴷⵡⴰⵙ ⴰⵏⵙⴰ ⵏ ⵜⵎⴰⵣⵉⵖⵜ ⴷ ⵓⴷⵔⴰⵡ ⵏⵏⵙ ⴳ ⵜⵎⴰⴳⵉⵜ ⵜⴰⵎⵖⵔⴰⴱⵉⵜ ⵎⵉ ⴳⴳⵓⵜⵏ ⵉⵙⵓⴳⵉⵎ.
ⴰⵙⵙ ⴰ, ⵏⴳⴰ ⵉⵏⵉⴳⴰⵏ ⵙ ⵜⵣⵎⵎⴰⵔ ⵏ ⵜⵏⴱⴰⴹⵜ ⵜⴰⵎⵉⵔⴰⵏⵜ ⵖⴼ ⵉⵎⵥⵕⵉⵜⵏ ⵏ ⵓⵙⵏⵜⵉ ⵏ ⵜⴼⵔⵉⵙⵜ ⵜⴰⵎⴰⴷⴷⵓⴷⵜ ⵏ ⵜⵎⴰⵣⵉⵖⵜ ⵉⵎⴽⵉⵏⵏⴰ ⵉⵜⵜⵓⵏⵏⴰ ⴳ ⵓⴷⵓⵙⵜⵓⵔ ⵏ 2011, ⴳ ⵜⵓⵇⵇⵏⴰ ⵙ ⵓⵎⵏⴰⴷ ⴰⵎⵙⵙⵉⵣⵡⵔ ⵏ ⴱⴰⴱ ⵏ ⵡⵓⴷⴷⵓⵔ, ⵎⴰⵛⴰ ⵜⵉⵔⴰⵜ ⵜⴰⵙⵔⵜⴰⵏⵜ ⵉⵜⵜⴷⴷⵓⵏ ⴳ ⵓⴱⵔⵉⴷ ⵏ ⵓⵙⵎⵀⵍ ⵏ ⵓⵙⴰⵡⵔ ⵓⵔ ⵜⴳⵉ ⵎⵉⵏ ⴰⵙⴽⵜⵔ ⵏ ⵉⵙⵓⴳⴰⵎ ⵉⵥⵕⴼⴰⵏⵏ ⴷ ⵉⵇⵇⵏⵏ ⴰⵙⵍⵍⵡⵓ ⵏ ⵡⵓⴳⴳⵓⵎ ⴰⴷ. ⵃⵎⴰ ⴰⴷ ⵉⵜⵜⵓⴳ ⵎⴰⵏ ⴰⵢⴰ, ⵜⵥⵍⵉ ⵜⵏⴱⴰⴹⵜ ⵎⴰ ⴰⵢ ⴷ ⵉⵜⵜⴳⴳⴰⵏ 200 ⵎⵍⵢⵓⵏ ⴷⵔⵀⵎ ⴳ ⵓⵙⴳⴳⵯⴰⵙⵏ 2022, ⵉⵎⴽⵉⵏⵏⴰ ⵜⵙⵖⴰⵡⵙ 300 ⵎⵍⵢⵓⵏ ⴷⵔⵀⵎ ⵓ ⵓⵙⵍⴳⵏ ⴰⵥⵕⴼⴰⵏ ⵏ 2023, ⴰⵔ ⵉⵜⵜⵓⵔⵏⵓ ⵉⵎⵉⴽ ⵙ ⵉⵎⵉⴽ ⴰⵔⴷ ⵉⵍⴽⵎ 1 ⵎⵍⵢⴰⵕ ⴷⵔⵀⵎ ⴳ ⵓⵙⴳⴳⵯⴰⵙ ⵏ 2025;
ⵢⵉⵡⵙ ⵓⵢⴰ ⴳ ⵓⵙⵏⵜⵉ ⵏ ⵓⵣⵓⴳⴳⵣ ⵏ ⵜⴽⴰⵕⴹⴰ ⵏ ⵓⴱⵔⵉⴷ ⵏ ⵓⵙⵎⵀⵍ ⵏ ⵓⵙⴰⵡⵔ ⴰⴷ ⵍⵍⵉ ⵢⵓⵎⴰⵏ 25 ⵏ ⵜⵎⴳⴳⵉⵜ ⴳ ⵉⵙⴳⵓⵎⵏ ⵉⵥⵍⵉⵏ ⵙ ⵜⵎⵀⵍⴰ ⴷ ⵜⵏⵓⴼⴰ ⵜⵉⴳⴷⵓⴷⴰⵏⵉⵏ, ⴷ ⵓⵙⵙⵍⵎⴷ ⴷ ⵜⵣⵔⴼⵜ ⴷ ⵜⴷⵍⵙⴰ ⴷ ⵓⵙⵏⵖⵎⵙ ⴰⵙⵍⵉⵥⵉⵕ, ⵙⴳ ⵜⵎⴳⴳⵉⵢⵉⵏ ⵉⵜⵜⵓⴳⴰⵏ , ⵏⵥⴹⴰⵕ ⴰⴷ ⵏⴱⴷⵔ :
ⴰⵙⴽⵛⵎ ⵏ ⵉⵎⴰⵡⴰⵙⵏ ⵏ ⵓⵙⵏⵓⴱⴱⴳ ⵉⵏⵎⵎⴰⵍⵏ ⵏ ⵉⵎⵙⵙⵔⵎⵙⵏ ⵙⴰⵡⴰⵍⵏⵉⵏ ⵜⴰⵎⴰⵣⵉⵖⵜ (ⵜⴰⵔⵉⴼⵉⵜ, ⵜⴰⵛⵍⵯⵀⵉⵜ, ⵜⴰⵎⴰⵣⵉⵖⵜ) ⴷ ⵓⵙⵀⵡⵏ ⵏ ⵓⵎⵢⴰⵡⴰⴹ ⵏⵏⵙⵏ ⴳ ⵜⵙⵏⴱⴹⴰⵢ ⴷ ⵜⵎⵔⵙⴰⵍ ⵏ ⵓⵏⵀⵍⵍⴰ ⴰⴷⵓⵙⴰⵏ ⴰⵎⵏⵣⵓ ⴷ ⵉⵙⴳⵏⴰⴼⵏ ⵓⵍⴰ ⵜⵉⵎⵔⵙⴰⵍ ⵉⴹⴼⴰⵕⵏ ⵉ ⵜⵎⴰⵡⴰⵙⵜ ⵏ ⵜⴷⵍⵙⴰ ⴷ ⵓⵎⵢⴰⵡⴰⴹ ⴷ ⵜⵄⵓⵔⵔⵎⴰ.
ⴰⵙⵃⴷⵓⴷⵉ ⵏ ⵉⵎⵢⴰⵡⴰⵙⵏ ⵉⵜⵜⵓⵙⵎⴰⴳⵍⵏ ⵙ ⵓⵎⵢⴰⵡⴰⴹ ⵏ ⵜⵉⵍⵉⴼⵓⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵜⵜⵓⴱⴹⴰⵏ ⵖⴼ ⵜⵓⴳⴳⵜ ⵏ ⵡⴰⵎⵎⴰⵙⵏ ⵏ ⵓⵎⵢⴰⵡⴰⴹ ⵉⴹⴼⴰⵕⵏ ⵉ ⴽⵔⴰ ⵏ ⵢⵉⴳⵔⴰⵏ ⵉⵎⴰⵡⵙⴰⵙⵏ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ, ⵍⵍⵉ ⵎⵉ ⴳⴳⵓⵜⵏ ⵉⵎⵙⵙⵔⵎⵙⵏ, ⴳ ⵓⵎⵏⵉⵙ ⵏ ⵓⵙⵎⴰⵜⴰ ⵏⵏⵙ ⵉ ⵡⵎⵎⴰⵙⵏ ⵏ ⵓⵎⵢⴰⵡⴰⴹ ⵇⵇⴰⵃ.
ⴰⵏⵏⴰⵍ ⵏ ⵜⵉⵍⴰⵍ ⵜⵉⵎⴰⵣⵉⵖⵉⵏ ⵓⵍⴰ ⵉⵙⴼⵙⵔⵏ ⵉⵏⴰⵥⵓⵕⵏ ⴷ ⵜⵙⵏⵜⴰⵢ ⵍⵍⵉ ⵉⵙⵙⵉⵜⵉⴳⵏ ⴰⵢⴷⴰ ⴰⴽⵎⴰⵎ ⴷ ⵓⵔⴰⴽⵎⴰⵎ ⵏ ⵜⴷⵍⵙⴰ ⵜⴰⵎⴰⵣⵉⵖⵜ;
ⴰⵙⵎⴰⵜⴰ ⵏ ⵓⵙⵉⴷⴼ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵊⴰⵊ ⵏ ⵡⴰⵏⵙⴰⵜⵏ ⵏ ⵜⵎⵀⵍⵉⵡⵉⵏ ⴷ ⵉⴼⵉⵍⵏ ⵏ ⵢⵉⵙⵎⴰⵡⵏ ⴷ ⵉⵎⴰⵙⵙⵏ ⵏ ⵡⴰⵙⵙⴰⵢ ⵓⵍⴰ ⴰⵏⵙⴰⵜⵏ ⵉⵍⵉⴽⵟⵕⵓⵏⵉⵢⵏ.
ⵖⵉⴽⵍⵍⵉ ⵜⵜⵓⴳⴰⵏ ⵉⴳⵔⴰⵡⵏ ⵏ ⵓⵎⵛⴰⵡⴰⵕ ⴳ ⵓⵙⴰⵜⵉ ⵏ ⵜⵎⵢⴰⴷⴰⵙⵜ ⵜⴰⵎⵛⵛⵉⵡⵕⵜ ⴰⴽⴷ ⵉⵎⴳⴳⴰⵢⵏ ⵉⵎⴰⵣⵉⵖⵏ ⵎⵢⴰⵏⴰⵡⵏⵉⵏ, ⵍⵍⵉ ⵉⴼⴼⵖⵏ ⵙ ⵜⵙⵖⵣⵏⵜ ⵏ ⵜⴰⴳⵔⵓⵎⵎⴰ ⵏ ⵉⵙⵎⵎⵜⵔⵏ ⵍⵍⵉ ⴷ ⵏⵙⵓⴳⴳⵓⵣ.
ⵏⴱⵓⵔⵣ ⵙ ⵓⵙⵎⵀⵍ ⵏ ⵓⵙⴰⵡⵔ ⵏ ⵜⵎⴰⵣⵉⵖⵜ ⴳ ⵜⵎⴳⴳⵉⵢⵉⵏ ⴰⴷ, ⵏⵙⵓⵍ ⵏⵜⵜⴳⴳ ⵜⵉⵣⵎⵎⴰⵔ ⴰⴳⵯⵏⵙ ⵏ ⵜⵏⴱⴰⴹⵜ ⵙ ⵓⴷⵔⴰⵡ ⵏ ⵉⵎⴳⴳⴰⵢⵏ ⵎⵢⴰⵏⴰⵡⵏⵉⵏ, ⵎⵉⵏⵣⵉ ⴰⵙⵉⵙⵙⵏ ⵙ ⵜⵎⴰⵣⵉⵖⵜ ⵓⵔ ⵉⵣⵎⵉⵔ ⴰⴷ ⵉⴱⴷⴷ ⵖⴼ ⵉⵣⵔⴼⴰⵏ ⵉⴷⵍⵙⴰⵏⵏ ⴷ ⵉⵜⵍⴰⵢⴰⵏⵏ ⵀⵉⵍⵍ, ⵎⴰⵛⴰ ⵉⴼⵓⴽⴽ ⴰⴷ ⵢⵓⵎⴰ ⴰⵡⴷ ⵜⵉⴳⵎⵉ ⵜⴰⵏⴰⵎⵓⵏⵜ ⴷ ⵜⴷⵎⵙⴰⵏⵜ.
ⴰⵣⵓⵍ ⴼⵍⵍⴰⵡⵏ ⴷ ⵜⵎⵍⵍⴰ ⵏ ⵕⴱⴱⵉ.