ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵏⵜⵜⴰⵏ ⴰⴽⴷ ⵉⴳⵎⴰⵎⵏ ⵏ ⵜⵙⵇⵇⵉⵎⵜ, ⴷⴰ ⵏⵏ ⵉⵜⵜⴰⴳⴳⵯ ⴳ ⵎⵕⵕⴰⴽⵛ ⵙ ⵓⵙⵙⵓⵊⴷ ⵏ ⵓⵙⵏⵓⴱⴱⴳ ⵏ ⵉⴳⵔⴰⵡⵏ ⵉⵙⴳⴳⵯⵙⴰⵏⵏ ⵏ ⵜⵔⴰⴱⴱⵓⵜ ⵏ ⵍⴱⴰⵏⴽ ⴰⵎⴰⴹⵍⴰⵏ ⴷ ⵜⴼⵏⵉⵇⵜ ⵜⴰⵎⴰⴹⵍⴰⵏⵜ ⵏ ⵓⴷⵔⵉⵎ ⴷ ⵜⵡⴰⴷⴰ ⵏ ⵜⵡⵓⵔⵉⵡⵉⵏ

ⵉⵛⴰⵢⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵙⵙ ⵏ ⵓⵢⵏⴰⵙ 24 ⵢⵓⵍⵢⵓⵣ 2023 ⴳ ⵎⵕⵕⴰⴽⵛ ⵓⴳⵔⴰⵡ ⵡⵉⵙ ⴽⵕⴰⴹ ⵏ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵓⵃⵔⴰⵢ ⵏ ⵓⵙⵏⵎⵉⵍⵉ ⵏ ⵉⴳⵔⴰⵡⵏ ⵉⵎⴰⵜⴰⵢⵏ ⵉⵙⴳⴳⵯⵙⴰⵏⵏ ⵏ ⵜⴳⵔⵓⵎⵎⴰⵏ ⵏ ⵍⴱⴰⵏⴽ ⴰⵎⴰⴹⵍⴰⵏ ⴷ ⵜⴼⵏⵉⵇⵜ ⵜⴰⵎⴰⴹⵍⴰⵏⵜ ⵏ ⵓⴷⵔⵉⵎ, ⵉ ⵖⴰ ⵢⵉⵍⵉⵏ ⴳ ⵎⵕⵕⴰⴽⵛ ⴳ ⴽⵜⵓⴱⵕ ⴷ ⵉⴳⴳⵯⴰⵔⵏ, ⵙ ⵜⵉⵍⵉⵜ ⵏ 14 ⵏ ⵉⴼⴹ ⵏ ⵓⵎⴰⴷⵔⴰⵡ ⴳⴰⵏⵉⵏ ⵉⵏⵎⵖⵔⵓⵏ, ⴷⵉⴳⵙⵏ ⵉⵎⴰⵡⵙⴰⵙⵏ ⵏ ⵜⴷⴰⵎⵙⴰ ⴷ ⵜⵥⵕⴼⵜ ⴷ ⵉⵎⴹⴰⵏ ⵏ ⵍⴱⵓⵏⵓⴽ ⵉⵏⴰⵎⵎⴰⵙⵏ ⵏ ⵉⵡⵓⵏⴰⴽ ⵉⴳⵎⴰⵎ ⴳⴰⵏⵉⵏ 189 ⵏ ⵓⵡⴰⵏⴽ. 
ⴰⵎⵓⵅ ⵉⴳⴳⴰ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵎⵓⵏⵏ ⴷ ⵉⵜⵙⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵢⴰⵏ ⵓⵙⴰⵔⵉ ⴳ ⵓⵙⴰⵢⵔⵓⵔ ⵎⴰⵏⵉ ⵖⴰ ⵢⵉⵍⵉⵏ ⵉⴳⵔⴰⵡⵏ, ⵃⵎⴰ ⴰⴷ ⵢⴰⵏⵏⴰⵢ ⵙ ⵜⵉⵟⵟⴰⵡⵉⵏ ⵏⵏⵙ ⵎⴰⵏⵉ ⵏⵏ ⴳⵓⵍⴰⵏⵜ ⵜⵡⵓⵔⵉⵡⵉⵏ, ⴷ ⴰⴷ ⵢⴰⵏⵏⴰⵢ ⵉⵙ ⵉⵖⵉⵢ ⴰⴷ ⵉⵙⵏⵓⴱⴱⴳ ⵉⵎⴰⴷⵔⴰⵡⵏ ⴳ ⵜⴼⴰⴷⵉⵡⵉⵏ ⵖⵓⴷⴰⵏⵉⵏ.
ⵉⵙⵉⵙⵙⴼⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴰⵥⵏⵥⵕ ⵉ ⵉⵙⵙⵏⵜⴰⵏ ⵉⵜⵜⵉⵍⵉⵏ ⵖⴰⵔ ⵜⴳⵍⴷⵉⵜ ⵏⵏⵖ ⵓⵎⵉ ⵜⵙⵏⵎⵉⵍⵉ ⵜⵉⵎⵙⴰⵔⵉⵏ ⴷ ⵜⴼⵓⴳⵍⵉⵡⵉⵏ ⴳ ⵓⵙⵡⵉⵔ ⴰⵎⴹⵍⴰⵏ ⵉⵍⴰⵏ ⵓⴷⴷⵓⵔ ⴰⴽⵙⵡⴰⵜ, ⵎⴽⵍⵍⵉ ⴷ ⵉⵙⵙⴽⵯⵜⵉ ⵜⵓⵙⴽⵉⵔⵉⵏ ⴷ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵉⵙⵏⴼⴰⵔⵏ ⵉⵚⵚⴽⴰⵡⵏ ⵏⵏⴰ ⵜⵓⵖⴰ ⵉⵜⵜⵡⴰⴳⴳⵏ ⵙⴰⴷⵓ ⵜⵎⵏⵉⵔⵜ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ.
ⴰⵎⵓⵅ ⵉⵙⴷⴷⵉⴷ ⵎⴰⵙⵙ ⵄⴰⵣⵉⵣ ⴰⵅⵏⵓⵛ ⵎⴰⵙ ⴷ ⴰⵙⵜⴰⵢ ⵏ ⵍⵎⵖⵔⵉⴱ ⴰⴷ ⵉⵙⴱⵔⵔⴽ ⵢⴰⵏ ⵓⵏⵎⵓⵇⵇⴰⵔ ⴰⴳⵔⴰⵖⵍⴰⵏ ⵡⴰⵏ ⴷ ⵉⴳⵔⴰⵡⵏ ⵉⵙⴳⴳⵯⵙⴰⵏⵏ ⵉⵎⴰⵜⴰⵢⵏ ⵏ ⵜⴳⵔⵓⵎⵎⴰ ⵏ ⵍⴱⴰⵏⴽ ⴰⵎⴰⴹⵍⴰⵏ ⴷ ⵜⴼⵏⵉⵇⵜ ⵜⴰⵎⴰⴹⵍⴰⵏⵜ, ⵉⵜⵜⵓⵙⴽⴰⵔⵏ ⴽⵓ ⴽⵕⴰⴹ ⵉⵙⴳⴳⵯⴰⵙⵏ ⴳ ⵢⴰⵏ ⵓⵎⵏⵥⴰⵡ ⴹⵏⵉⵏ, ⴷⴰ ⵉⵎⵎⴰⵍ ⵜⴰⵡⵉⵜ ⵜⵓⵏⴼⵉⵍⵜ ⵏⵏⴰ ⵜⵜⵉⴽⴽⵏⵜ ⵜⵎⵔⵙⴰⵍ ⵜⵥⵕⴼⴰⵏⵉⵏ ⵜⵉⵎⴰⴹⵍⴰⵏⵉⵏ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵎⴽⵍⵍⵉ ⵉⵏⵏⴰ ⵉⵍⴰ ⵎⴰⵏ ⴷ ⵜⴰⵎⵚⴰⵕⵜ ⴷⴷⵖ ⵉⴳⴰ ⵢⴰⵜ ⵜⵎⵍⴷⴰ ⵉⵥⵉⵍⵏ ⵉ ⵍⵎⵖⵔⵉⴱ ⴰⴷ ⵉⵙⵙⵉⵡⴹ ⴰⴳⵕⴹ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⵉ ⵜⵎⵜⵜⵉ ⵜⴰⵎⴰⴹⵍⴰⵏⵜ.
 

ⵉⵜⵜⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴳ ⵓⴳⵔⴰⵡ ⴰⴷ ⵙⴳ ⵎⴰⵕⵕⴰ ⵉⵡⴷⵏⴰ ⵏⵏⴰ ⵉⵀⵎⵎⴰ ⵓⵢⴰ, ⵙⴳ ⵜⵎⴰⵡⵙⴰⵙⵉⵏ ⴷ ⵜⵏⴱⴰⴹⵉⵏ ⵜⵉⴷⵖⵔⴰⵏⵉⵏ ⵏ ⵜⵖⵔⵎⵜ ⵏ ⵎⵕⵕⴰⴽⵛ, ⴰⴷ ⴳⴳⵉⵏ ⵜⵎⴰⵙⵙⵓⵎⴰⵏⵜ ⴰⴼⴰⴷ ⴰⴷ ⵉⵎⵓⵔⵙ ⵓⵏⵎⵓⵇⵇⴰⵔ ⴷⴷⵖ ⵉⵍⴰⵏ ⵓⴷⴷⵓⵔ ⵎⵇⵇⵓⵕⵏ, ⴷ ⴰⴷ ⵙⴱⵔⵔⴽⵏ ⵉⵏⵓⵊⵉⵡⵏ ⵉⵎⴰⴷⵔⴰⵡⵏ ⴳ ⵜⴼⴰⴷⵉⵡⵉⵏ ⴷ ⵜⵉⵚⴱⵃⴰⵏⵉⵏ.
ⵉⵃⴰⴹⵕ ⴳ ⵓⴳⵔⴰⵡ ⴰ ⵎⴰⵙⵙ ⵄⴱⴷⵍⵡⴰⴼⵉ ⵍⴰⴼⵜⵉⵜ ⴰⵎⴰⵡⵙⴰⵙ ⵏ ⵓⴳⵏⵙ, ⵎⴰⵙⵙⴰ ⵏⴰⴷⵢⴰ ⴼⴰⵜⵜⴰⵃ ⵜⴰⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵜⵥⵕⴼⵜ, ⵎⴰⵙⵙ ⵅⴰⵍⵉⴷ ⴰⵢⵜ ⵟⴰⵍⴱ ⴰⵎⴰⵡⵙⴰⵙ ⵏ ⵜⴷⵓⵙⵉ ⴷ ⵡⴰⵔⴰⵢ ⴰⵏⴰⵎⵓⵏ, ⵎⴰⵙⵙⴰ ⴼⴰⵟⵉⵎⴰ ⵣⴰⵀⵕⴰ ⵎⴰⵏⵚⵓⵕⵉ ⵜⴰⵎⴰⵡⵙⴰⵙⵜ ⵏ ⵓⵙⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵜⵖⵓⵔⵔⵎⴰ ⴷ ⵜⵣⴷⴷⵓⵖⵜ ⴷ ⵜⵙⵔⵜⵉⵜ ⵏ ⵜⵖⵔⵎⵜ, ⵎⴰⵙⵙⴰ ⴼⴰⵟⵉⵎⴰ ⵣⴰⵀⵕⴰ ⵄⴰⵎⵎⵓⵕ, ⵜⴰⵎⴰⵡⵙⴰⵙⵜ ⵏ ⵜⵎⴰⵍⵍⴰⵢⵜ ⴷ ⵜⵉⵏⴷⵉ ⴷ ⵜⴷⴰⵎⵙⴰ ⵜⴰⵏⴰⵎⵓⵏⵜ ⵜⴰⵎⵢⴰⵡⴰⵙⵜ, ⵎⴰⵙⵙⴰ ⵍⴰⵢⵍⴰ ⴱⵏⵄⵍⵉ ⵜⴰⵎⴰⵡⵙⴰⵙ ⵏ ⵓⵎⵓⵜⵜⵉ ⴰⵏⵔⵖⵉ ⴷ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵎⴰⵙⵙ ⵎⵓⵃⵎⵎⴰⴷ ⵄⴱⴷⵍⵊⴰⵍⵉⵍ, ⴰⵎⴰⵡⵙⴰⵙ ⵏ ⵡⴰⵙⵙⴰⵢ ⴰⵍⵓⵊⵉⵙⵜⵉⴽ, ⴷ ⵎⴰⵙⵙ ⵄⴱⴷⵍⴰⵟⵉⴼ ⵍⵊⵡⴰⵀⵔⵉ ⵍⵡⴰⵍⵉ ⵏ ⵍⴱⴰⵏⴽ ⵏ ⵍⵎⵖⵔⵉⴱ, ⴷ ⵎⴰⵙⵙ ⴽⴰⵔⵉⵎ ⵇⵙⵙⵉ ⵍⵃⵍⵓ ⵍⵡⴰⵍⵉ ⵏ ⵜⵙⴳⴰ ⵏ ⵎⵕⵕⴰⴽⵛ ⴰⵙⴼⵉ ⴰⵎⵏⴱⴰⴹ ⵏ ⵜⵎⵏⴱⴰⴹⵜ ⵏ ⵎⵕⵕⴰⴽⵛ, ⵎⴰⵙⵙ ⴼⵓⴰⴷ ⴱⴰⵣⵓⵖ ⴰⵎⵙⵇⴰⴷ ⴰⵏⵎⵀⴰⵍ ⴰⵎⴰⵜⴰⵢ ⴳ ⵜⵎⴰⵡⴰⵙⵜ ⵏ ⵉⵙⴽⴽⵉⵏⵏ  ⵏ ⴱⵕⵕⴰ ⴷ ⵓⵎⵢⴰⵡⴰⵙ ⵉⴼⵔⵉⵇⵉ ⴷ ⵉⵎⵖⵔⵉⴱⵉⵢⵏ ⵏ ⴱⵕⵕⴰ ⴷ ⵎⴰⵙⵙ ⵄⴰⴷⵉⵍ ⵍⴼⴰⵇⵉⵔ ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⵙⵉⵔⴰ ⴰⵏⴰⵎⵓⵔ ⴰⵎⵖⵔⵉⴱⵉ ⵏ ⵜⵎⴰⵍⵍⴰⵢⵜ.
ⵥⵍⵉⵏ ⵉⵎⵔⵏⴰ ⵏ ⵉⴳⵔⴰⵡⵏ ⵏ ⵜⴳⵔⵓⵎⵎⴰ ⵏ ⵍⴱⴰⵏⴽ ⴰⵎⴰⴹⵍⴰⵏ ⴷ ⵜⴼⵏⵉⵇⵜ ⵜⴰⵎⴰⴹⵍⴰⵏⵜ ⵏ ⵓⴷⵔⵉⵎ ⵉ ⵖⴰ ⵢⵉⵍⵉⵏ ⴳ ⵎⵕⵕⴰⴽⵛ ⵙ 6 ⵏ ⵉⵙⵏⵜⴰⵍ ⵉⵏⵜⵜⵉⵢⵏ : ⵜⴰⵎⴰⵜⵓⵜ ⵜⴰⵥⵕⴼⴰⵏⵜ ⴷ ⵜⵎⵓⵟⵟⵓⵏⵜ, ⵜⵉⴳⵎⵉ ⵜⴰⵙⵓⵍⴰⵏⵜ, ⴰⵎⵓⴽⵏ ⵏ ⵜⵎⵔⵙⴰⵍⵉⵏ ⵜⵉⵥⵕⴼⴰⵏⵉⵏ ⵜⵉⵎⴰⴹⵍⴰⵏⵉⵏ, ⵜⵓⵥⵡⵉⵕⵜ ⴳ ⵜⵡⵓⵔⵉⵡⵉⵏ ⵓⵙⵍⵍⵡⵓ, ⴰⵥⵟⵟⴰ ⵏ ⵓⴼⵔⴰ ⴰⵏⴰⵎⵓⵏ, ⴰⵎⵙⴰⵔⵓⴼ ⴷ ⵓⵎⵢⵉⴷⵉⵔ.
ⴰⴷ ⴷ ⵏⵙⵙⴽⵯⵜⵉ ⵎⴰⵙ ⴷ ⴰⵙⵏⵎⵉⵍⵉ ⵏ ⵉⴳⵔⴰⵡⵏ ⴰⴷ ⵉⴳⴰ ⵢⴰⵏ ⵓⵏⵎⵓⴳⴳⴰⵔ ⴰⵙⴳⴳⵯⵙⴰⵏ ⵉ ⵉⵙⵎⵓⵏⴰⵏ ⵉⵎⴳⴳⴰⵢⵏ ⵉⵎⴰⴹⵍⴰⵏⵏ ⵢⴰⵜⵜⵓⵢⵏ ⴳ ⵓⵙⵡⵉⵔ ⵏ ⵜⴷⴰⵎⵙⴰ ⴷ ⵜⵥⵕⴼⵜ, ⵃⵎⴰ ⴰⴷ ⵔⵣⵓⵏ ⵉⴼⵙⵙⴰⵢⵏ ⵉ ⵉⵏⴰⵥⴰⵕⵏ ⵏ ⵢⵉⵎⴰⵍ.