ⵉⵎⵙⵏⴰⵍⴰⵜⵏ ⵏ ⵓⵏⵙⵙⵉⵡⵅⴼ ⵏ ⵜⵏⴱⴰⴹⵜⵜ ⴷ ⵓⵎⴰⵡⵙⴰⵙ ⵏ ⵜⴷⴰⵎⵙⴰ ⴷ ⵜⵥⵕⴼⵜ ⴷ ⵡⴰⴱⴰⴹ ⴰⵎⴳⵓⵔⴰⵏ ⴷ ⵜⵎⴰⵟⵟⵓⵏⵜ ⵏ ⴼⵕⴰⵏⵚⴰ

ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙⵙ ⵃⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⴽⵡⴰⵙ 25 ⵉⴱⵔⵉⵔ ⴳ ⵕⵕⴰⴱⴰⵟ, ⵉⵎⵙⵏⴰⵍⴰⵜⵏ ⴷ ⴱⵓⵕⵏⵓ ⵍⵓⵎⵉⵕ, ⴰⵎⴰⵡⵙⴰⵙ ⴰⴼⵕⴰⵏⵚⴰⵡⵉ ⵜⴷⴰⵎⵙⴰ ⴷ ⵜⵥⵕⴼⵜ ⴷ ⵡⴰⴱⴰⴹ ⴰⵎⴳⵓⵔⴰⵏ ⴷ ⵜⵎⴰⵟⵟⵓⵏⵜ ⵍⵍⵉ ⴷ ⵉⵙⴽⵔⵏ ⵢⴰⵜ ⵜⵔⵣⵉⴼⵜ ⵏ ⵜⵡⵓⵔⵉ ⵙ ⵜⴳⵍⴷⵉⵜ.
ⵢⵉⵡⵉⵏ ⴷ ⵙ ⵙⵉⵏ ⴳ ⵉⵎⵙⵏⴰⵍⴰⵜⵏ ⴰⴷ, ⵍⵍⵉⵖ ⵜⵃⴰⴹⵕ ⵜⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵜⵥⵕⴼⵜ, ⵏⴰⴷⵢⴰ ⴼⵜⵜⴰⵃ ⵄⴰⵍⴰⵡⵉ ⴷ ⵓⵎⴰⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⵍⵏ ⵙ ⵜⵎⵙⴰⵙⵍⵜ ⵎⴰⵙⵙ ⴼⴰⵡⵣⵉ ⵍⵇⵊⵄ, ⵅⴼ ⵜⵣⴷⴰⵢⵉⵏ ⵢⴰⵜⵜⵢⵓⵏ ⵉⵥⵍⵉⵏ ⵉⵍⵍⴰⵏ ⵏⴳⵔ ⵍⵎⵖⵔⵉⴱ ⴷ ⴼⵕⴰⵏⵚⴰ ⴷ ⵜⵉⵔⵉⵜ ⵏ ⵜⵎⵉⵣⴰⵔ ⵙ ⵙⵏⴰⵜ ⴰⴷ ⴷⴷⵓⵏ ⴳ ⵜⵖⴰⵔⴰⵙⵜ ⵏ ⵜⵎⴷⵔⴰⵡⵜ ⵜⴰⵙⵜⵕⴰⵜⵉⵊⵉⵜ ⵉⵟⵟⴰⴼⵏ ⵎⵏⵏⴰⵡ ⵉⵎⵏⴰⴷⵏ ⴷⴷⴰⵡ ⵜⵉⵎⵓⵖⵔⴰ ⵏ ⴱⴰⴱⴰ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰ ⵡⵉⵙ ⵚⴹⵉⵚ ⴰⴷ ⵜ ⵉⵙⵔⵏⵓ ⵔⴱⴱⵉ ⴷ ⵓⵏⵙⵙⵉⵅⴼ ⵏ ⴼⵕⴰⵏⵚⴰ ⵉⵎⴰⵏⵡⵉⵍ ⵎⴰⴽⵕⵓⵏ.
 

ⵉⵙⵙⵉⵎⵖⵓⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵜⵕⵥⵉ ⵏ ⵜⵣⴷⴰⵢⵉⵏ ⵏⴳⵔ ⵍⵎⵖⵔⵉⴱ ⴷ ⴼⵕⴰⵏⵚⴰ ⴷ ⴰⴷ ⵢⵉⵍⵉ ⵓⵙⴱⵓⵖⵍⵓ ⵏⵏⵙⵏⵜ ⴳ ⵉⵙⵡⵉⵔ ⴰⴽⴽⵯ ⵙ ⵜⵖⴰⵔⴰⵙⵜ ⵏ ⵓⵎⵛⴰⵡⴰⵕ ⵉⴷⵓⵙⵏ.
ⴱⵉⴷⵏ ⴳ ⵉⵎⵙⵏⴰⵍⴰⵜⵏ ⵅⴼ ⵉⵏⵎⵉⴷⵏ ⵏ ⵓⵎⵢⴰⵡⴰⵙ ⴰⵎⴳⵓⵔⴰⵏ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ ⴳ ⵜⵓⴳⵜ ⵏ ⵉⴳⵔⴰⵏ ⵢⴰⵜⵜⵢⵓⵏ, ⵙⵍⴰⵀⵡⴰⵏ ⴰⴽⴽⵯ ⵉⴳⵔ ⵏ ⵓⵀⵉⴷⵕⵓⵊⵉⵏ ⴰⵣⴳⵣⴰ. ⵖⵉⴽⵍⵍⵉ ⴳⴰⵏ ⵉⵎⵙⵏⴰⵍⴰⵜⵏ ⵢⴰⵜ ⵜⵉⵣⵉ ⵏ ⵓⵙⵖⵓⴷⵓ ⴷ ⵜⵡⵓⵔⵉ ⵍⵍⵉ ⵜⴳⴳⴰ ⵜⵙⵏⵓⵔⴰⵢⵜ ⵜⴰⴼⵕⴰⵏⵚⴰⵡⵉⵜ ⵏ ⵜⴳⵎⵉ ⴳ ⵓⵙⵡⵓⴷⴷⵓ ⵏ ⵉⵙⴳⴷⴷⵏ ⴷ ⵉⵖⴰⵡⵙⴰⵙⵏ ⵏ ⴳⵎⵉ ⵍⵍⵉ ⵜⵙⵏⵜⵉ ⵜⴳⵍⴷⵉⵜ ⵏ ⵍⵎⵖⵔⵉⴱ.
ⵎⴹⴰⴽⴰⵕⵏ ⵙ ⵙⵉⵏ ⵅⴼ ⵡⴰⵜⵉⴳ ⵏ ⵓⵙⵖⵓⴷⵓ ⵏ ⵓⵎⵢⴰⵡⴰⵙ ⴰⴷⴰⵎⵙⴰⵏ ⴷ ⵓⵙⵖⵏⵣⵉ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ, ⵙⵍⴰⵀⵡⴰⵏ ⴰⴽⴽⵯ ⵍⵍⵉⵖ ⵜⴳⴰ ⴼⵕⴰⵏⵚⴰ ⴰⵎⴷⵔⴰⵡ ⴰⵎⵣⵡⴰⵔⵓ ⵉ ⵍⵎⵖⵔⵉⴱ ⴳ ⵉⴳⵔ ⵏ ⵜⵎⴰⵍⵍⴰⵢⵜ ⴷ ⵉⵙⵙⴰⵔⵓⵜⵏ ⵉⴱⵕⵕⴰⵏⵉⵢⵏ. ⵖⵉⴽⵍⵍⵉ ⵍⴽⵎⵏ ⵉⵙⵏⴼⴰⵍⵏ ⵏ ⵜⵏⵙⵖⵣⵉⵜ ⴳ ⵓⵙⴳⴳⵯⴰⵙ 2023 ⵎⴰ ⵉⵜⴳⴳⴰⵏ 163.1 ⵎⵍⵢⴰⵕ ⵏ ⴷⴷⵔⵀⵎ ⵍⵍⵉ ⵢⵓⴼⴰⵏ ⵙ 33% ⵉⵖ ⵜ ⵏⵎⵙⴰⵙⴰ ⴷ ⵓⵙⴳⴳⵯⴰⵙ ⵏ 2021.
ⵙⴰⵡⵍⵏ ⴰⵡⴷ ⴳ ⵓⵍⵎⵓⵇⵇⴰⵔ ⴰⴷ ⵅⴼ ⵓⴳⵔⴰⵡ ⴰⵎⵖⵔⵉⴱⵉ-ⴰⴼⵕⴰⵏⵚⴰⵡⵉ ⵢⵓⵜⵜⵢⵓⵏ ⵍⵍⵉ ⵎⵓ ⵔⴰⴷ ⵜⵉⵍⵉ ⵜⵙⵓⵜⵍⵜ ⵏⵏⵙ ⵜⵉⵙ 15 ⴳ ⵜⴰⵎⴰⵣⵉⵔⵜ ⵏⵏⵖ, ⵙⵍⴰⵀⵡⴰⵏ ⴰⴽⴽⵯ ⵍⵍⵉⵖ ⵜⴳⴰ ⵢⴰⵏ ⵉⵎⵉⵙ ⵏ ⵓⵙⴷⵓⵙ ⴷ ⵓⵙⵏⴼⵍ ⵏ ⵜⵎⴷⵔⴰⵡⵜ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ.