ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵕⴰⵙ 19 ⴽⵜⵓⴱⵕ 2022
ⵜⴳⴰ ⵜⵏⴱⴰⴹⵜ, ⴰⵙⵙ ⵏ ⵓⴽⵕⴰⵙ 22 ⵜⵉⵔⵡⴰⵢⵉⵏ 1444, ⵉⵎⵙⴰⵙⴰⵏ ⴰⴽⴷ 19 ⴽⵜⵓⴱⵕ 2022, ⴰⴳⵔⴰⵡ ⵏ ⵜⵏⴱⴰⴹⵜ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵉⵜⵜⵓⵙⵜⴰⵢⵏ ⵉ ⵓⵎⵔⴰⵔⴰ ⵏ ⵡⴰⵡⴰⵍ ⴷ ⵓⵙⵖⵣⵏ ⵅⴼ ⵓⵙⵏⴼⴰⵔ ⴰⵣⵔⴼⴰⵏ ⵏ ⵓⵙⴳⴳⵯⴰⵙ ⴰⵥⵕⴼⴰⵏ ⵏ 2023, ⴷ ⵉⴹⵕⵏ ⴰⴽⵉⴷⵙ ⵉⵎⵓⵏⵏ, ⴷ ⵓⵙⵏⴼⴰⵔ ⵏ ⵓⵎⵕⵚⵓⵎ.
ⴹⴰⵕⵜ ⵓⵙⵖⵣⵏ ⵏ ⵓⵙⵇⵇⵉⵎ ⴰⵎⴰⵡⵙⴰⵙ ⵍⵍⵉ ⵅⴼ ⵢⵓⴳⴳⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴰⴷ ⵜ ⵢⴰⵊⵊ ⵕⴱⴱⵉ ⴰⵙⵙ ⵏ ⵓⵙⵉⵏⴰⵙ 18 ⴽⵜⵓⴱⵕ 2022 ⵅⴼ ⵉⵙⵡⴰⵍⵜⵏ ⵉⴽⵙⵡⴰⵜⵏ ⵉ ⵓⵙⵏⴼⴰⵔ ⴰⵣⵔⴼⴰⵏ ⵏ ⵜⵥⵕⴼⵜ ⵏ ⵓⵙⴳⴳⵯⴰⵙ ⵏ 2023, ⵉⵎⵔⴰⵔⴰ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵜⵜⵓⴳⵏ ⴰⵙⵙ ⵏ ⵓⴽⵕⴰⵙ ⵅⴼ ⵉⴼⵔⵓⵔⵓⵢⵏ ⵏ ⵓⵙⵏⴼⴰⵔ ⴰⴷ ⵉⵙⵖⵣⵏ ⵜ. ⵉⵜⵜⵓⴳ ⵓⵙⵏⴼⴰⵔ ⵏ ⵓⵣⵔⴼ ⴰⴷ ⵙ ⵓⵎⵙⴰⵙⴰ ⴰⴽⴷ ⵉⵙⵡⴰⵍⴰⵜⵏ ⵉⴳⵍⴷⴰⵏⵏ ⵢⴰⵜⵜⵓⵢⵏ ⵉⵍⵍⴰⵏ ⴳ ⵜⵉⵏⴰⵡⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ, ⵎⵛⵉⵏⵏⴰ ⴷ ⵢⵓⵡⵉ ⵅⴼ ⵜⵉⴳⴳⵉ ⵏ ⵓⵖⴰⵡⴰⵙ ⵏ ⵜⵏⴱⴰⴹⵜ ⵏⵏⵉ ⵉⵎⵙⴰⵙⴰⵏ ⴷ ⵜⵎⵙⵓⴼⵖⵉⵏ ⵏ ⵓⵎⴷⵢⴰⵏ ⴰⵏⴳⵎⴰⵏ ⴰⵎⴰⵢⵏⵓ.
ⵅⴼ ⵓⵢⵏⵏⴰ, ⵉⴱⴷⴷⴰ ⵓⵙⵏⴼⴰⵔ ⴰⵣⵔⴼⵏ ⵏ ⵜⵥⵕⴼⵜ ⵏ ⵓⵙⴳⴳⵯⴰⵙ ⵏ 2023 ⵅⴼ ⵉⵙⵉⵣⵡⵉⵔⵏ ⵙ ⵏⵖ ⴰⴷ ⵜⵏ ⵏⵙⴳⵣⵍ ⴳ ⴽⴽⵓⵥⵜ ⵏ ⵡⴰⴳⵓⵎⵏ ⵉⴳⴰⵏ: ⴰⵙⴱⴷⴷ ⵏ ⵜⵔⵙⴰⵍ ⵏ ⵓⵡⴰⵏⴽ ⴰⵏⴰⵎⵓⵏ; ⴷ ⵓⵙⴷⵓⵢ ⴰⴷⵎⵙⴰⵏ ⴰⵏⴰⵎⵓⵔ ⵙ ⵡⴰⵏⵏⴰⵍ ⵏ ⵓⵙⵙⴰⵔⵓ; ⵜⵉⴽⴽⵉ ⵏ ⵜⵏⵣⵣⴰⵔⴼⵓⵜ ⵜⴰⴼⵔⴽⴰⵏⵜ; ⴰⵙⴷⵡⵍ ⵏ ⵜⵎⴰⵔⵉⵏ ⵜⵉⵥⵕⴼⴰⵏⵉⵏ ⴰⴼⴰⴷ ⴰⴷ ⵜⵜⵓⴹⵎⴰⵏⵏⵜ ⵜⵙⵏⴳⴷⴷⴰⵢⵉⵏ. ⵙ ⵢⵉⵙⵢ ⵙ ⵉⵎⴰⵢⵏⵓⵜⵏ ⵏ ⵓⵎⵏⴰⴹ ⴰⴳⵔⴰⵖⵍⴰⵏ ⴷ ⵜⵎⵔⵏⵉⵡⵉⵏ ⵜⵉⴷⵎⵙⴰⵏⵉⵏ ⴷ ⵜⵥⵕⴼⴰⵏⵉⵏ ⵜⵉⵏⴰⵎⵓⵔⵉⵏ, ⵉⵜⵜⵓⵙⴽⴰⴽ ⵓⵙⵏⴼⴰⵔ ⴰⵣⵔⴼⴰⵏ ⵏ ⵜⵥⵕⴼⵜ ⵏ ⵓⵙⴳⴳⵯⴰⵙ ⵏ 2023 ⵅⴼ ⵜⵓⵔⴷⴰⵡⵉⵏ ⵉⵙⵡⵜⵜⴰⵏ ⴰⵙⵖⵍ ⵜⵉⴳⵎⵉ ⴳ 4% ⴷ ⵓⵙⵖⵍ ⵏ ⵓⴼⵓⴽⵜⵉ ⴳ 4% ⴳ ⵓⵡⵜⵜⵓ ⵏ 2% ⴷ ⵓⴳⴳⴰⵎⵉ ⵜⵎⵙⴰⵙⵜⴰⵍⵜ ⴳ ⵡⵓⵜⵜⵓ ⵏ 4,5%
ⵙ ⵎⴰⵏ ⴰⵢⴰ ⴰⵙⵏⴼⴰⵔ ⵏ ⵓⵣⵔⴼ ⵏ ⵜⵥⵕⴼⵜ ⵏ ⵓⵙⴳⴳⵯⴰⵙ ⵏ 2023 , ⵎⵛⵉⵏⵏⴰ ⵉⵙⵙⵓⵜⵔⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ, ⵉⴳⴰ ⴰⵣⵓⵍⵣ ⵉⴷⵜⵜⴰⵏ ⵉ ⵜⵔⵙⴰⵍ ⵏ ⵓⵡⴰⵏⴽ ⴰⵏⴰⵎⵓⵏ, ⴷ ⵓⵙⵏⵜⵉ ⴰⵎⵢⴰⴳⴰⵏ ⵏ ⵓⵎⵏⵏⵉ ⵏ ⵜⵏⵜⴰⵎⵜ ⵜⴰⵏⴰⵎⵓⵔⵜ ⵜⴰⵎⴰⵢⵏⵓⵜ ⵉ ⵓⵙⵙⴰⵔⵓ, ⴷ ⵜⵎⵔⴰⵔⵓⵜ ⵏ ⵉⵙⴰⵜⵓⵔⵏ ⵏ ⵓⵙⴰⴷⵔ ⵉⵖⵓⴷⴰⵏ ⵉ ⵎⴰⵕⵕⴰ ⵉⵏⴰⵎⵓⵔⵏ.
ⴰⵙⵉⵡⴹ ⴰⵏⵖⵎⴰⵙ (ⵜⵓⵏⵖⵉⵍⵜ ⵙ ⵜⵄⵕⴰⴱⵜ) ⴳ ⵜⵓⴹⴼⵉⵕⵉⵏ
ⵎⵛⵉⵏⵏⴰ ⵉⵎⵔⴰⵔⴰ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⵡⴰⵍ ⵉⵙⵖⵣⵏ ⵅⴼ ⵉⵎⵕⵚⵓⵎⵏ ⵉⵇⵇⵏ ⵖⵔ ⵓⵙⵏⴼⴰⵔ ⴰⵣⵔⴼⴰⵏ ⵏ ⵜⵥⵕⴼⵜ, ⴷ ⵎⵉⵏ ⵉⵣⴷⵉⵏ ⴰⴽⴷ ⵜⵡⵓⵔⵉⵡⵉⵏ ⵏ ⵓⴳⵏⵙⴰⵙ ⵏ ⵓⵙⵥⵕⴼ ⴷ ⵓⵕⵟⵟⴰⵍ, ⴰⵢⵏⵏⴰ ⵉⴳⴰⵏ:
ⴰⵙⵏⴼⴰⵔ ⵏ ⵓⵎⵕⵚⵎ ⵓⵟⵟⵓⵏ 2.22.8006 ⵙ ⵜⵓⴽⴽⵉ ⵏ ⵜⵏⴱⴰⴹⵜ ⵉ ⵓⵎⴰⵡⵙⴰⵙ ⵏ ⵜⴷⴰⵎⵙⴰ ⴷ ⵜⵥⵕⴼⵜ ⴳ ⵓⵢⵏⵏⴰ ⵉⵇⵇⵏ ⵖⵔ ⵉⵕⵟⵟⴰⵍⵏ ⵏ ⵉⴳⵯⵏⵙ ⴷ ⵜⵉⴳⴳⵉ ⵏ ⵜⴱⵔⵉⴷⵉⵏ ⵎⴰⵕⵕⴰ ⵉⵇⵇⵏ ⵙ ⵜⵥⵕⴼⵜ;
ⴰⵙⵏⴰⴼⴰⵔ ⵏ ⵓⵎⵕⵚⵓⵎ ⵓⵟⵟⵓⵏ 2.22.807 ⵙ ⵜⵉⴽⴽⵉ ⵏ ⵜⵏⴱⴰⴹⵜ ⵉ ⵓⵎⴰⵡⵙⴰⵙ ⵏ ⵜⴷⴰⵎⵙⴰ ⴷ ⵜⵥⵕⴼⵜ ⴳ ⵎⵉⵏ ⵉⵇⵇⵏ ⵖⵔ ⵓⵙⵥⵕⴼ ⵏ ⴱⵕⵕⴰ;
ⴰⵙⵏⴰⴼⵔ ⵏ ⵓⵎⵕⵚⵓⵎ ⵓⵟⵟⵓⵏ 2.22.808 ⵙ ⵜⵉⴽⴽⵉ ⵏ ⵜⵏⴱⴰⴹⵜ ⵉ ⵓⵎⴰⵡⵙⴰⵙ ⵏ ⵜⴷⴰⵎⵙⴰ ⴷ ⵜⵥⵕⴼⵜ ⴰⴷ ⵉⴳⴳ ⵜⵓⵇⵇⵏⵉⵡⵉⵏ ⵏ ⵉⵕⵟⵟⴰⵍⵏ ⵜⵜⴰⴼ ⴰⴷ ⵉⵜⵜⵓⴼⵔⵓ ⵓⵎⵔⵡⴰⵙ ⵏ ⴱⵕⵕⴰ ⵉⵥⵥⴰⵢⵏ ⴷ ⵜⵎⵢⴰⵇⵇⴰⵏⵉⵏ ⵏ ⵓⴹⴰⴽⴰⵍ ⵏ ⵉⵎⵉⵣⵉⵢⵏ ⵏ ⵡⴰⵜⴰⵉⴳⵏ ⵏ ⵓⵚⴰⵃⴰ ⴷ ⵓⵇⵕⴹ.
ⵉⵙⵎⴷ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵉⵡⵓⵔⵉⵡⵉⵏ ⵏⵏⵙ, ⵙ ⵓⵎⵔⴰⵔⴰ ⵏ ⵡⴰⵡⴰⵍ ⴷ ⵓⵙⵖⵣⵏ ⵅⴼ ⵓⵙⵏⴼⴰⵔ ⴰⵎⵕⵚⵓⵎ ⵓⵟⵟⵓⵏ 2.22.818 ⵙ ⵓⵙⴱⴷⴷⵉ ⵏ ⵓⵙⵎⴰⴷ ⵏ ⵢⵉⵍⵉ ⵏ ⵜⵏⴼⵓⵍⵜ ⵏ ⵓⵙⴽⵛⵎ ⵉⵜⵜⵓⴱⵣⵣⴻⵣⵏ ⵅⴼ ⵉⴼⵓⵏⴰⵙⵏ ⵉⵏⴰⵎⵢⴰⵔⵏ, ⵉⵙⵏⴽⴷ ⵜ ⵎⴰⵙⵙⴼⴰⵡⵣⵉ ⵍⵇⵊⵄ, ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵜⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵜⵥⵕⴼⵜ, ⵉⵜⵜⵓⵙⵎⴰⴳⵍⵏ ⵙ ⵜⵎⵙⴰⵙⵜⴰⵍⵜ.
ⵢⵓⵙⴷ ⵓⵙⵏⴼⴰⵔ ⴰⴷ ⵜⵜⴰⴼ ⴰⴷ ⵉⵙⵙⴼⵙⵉⵙ ⵜⴰⵙⵙⴰⵙⵜ ⵏ ⵜⵔⴷⵙⵉ ⵏ ⵡⴰⵎⴰⵏ ⵏⵏⴰ ⵜⵙⵙⵏ ⵜⵎⴰⵣⵉⵔⵜ ⵏⵏⵖ ⴰⵙⴳⴳⵯⴰⵙ ⴰⴷ ⴷ ⵡⴰⵜⵉⴳⵏ ⵢⴰⵜⵜⵓⵢⵏ ⵏ ⵡⵓⵜⵛⵉ ⵏ ⵡⴰⵛⵜⴰⵍ ⵙ ⵓⵎⵍⴻⵍⵍⵉ ⵏ ⵉⴳⴰⴷⴰⵣⵏ ⵉⴳⵔⴰⵖⵍⴰⵏ ⴷ ⵜⵔⵏⵉⵡⵜ ⴳ ⵡⴰⴳⴳⵯⴰⵜⵏ ⵏ ⵓⵙⵢⴰⴼⵓ ⵏ ⵓⴽⵙⵓⵎ ⴰⵣⴳⴳⵯⴰⵖ.
ⵉⴳⴰ ⵓⵡⵜⵜⴰⵙ ⵏ ⵓⵏⵙⴼⴰⵔ ⴰⴷ ⴰⴷ ⵉⵙⵙⵓⴷⵓ ⵓⴳⴰⴷⴰⵣ ⵙ ⵡⵓⵏⵣⵉⵍ ⵙ ⵓⵎⵡⵏ ⵏⵏⵙ ⵙ ⵓⴽⵙⵓⵎ ⵏ ⵓⴼⵓⵏⴰⵙ, ⵙ ⵡⵓⴽⵓⵙ ⵏ ⵢⵉⵍⵉ ⵓⵙⵎⵉⴷ ⵏ ⵜⵏⴼⵓⵍⵜ ⵏ ⵓⵙⴽⵛⵎ ⵏ ⵉⴼⵓⵏⴰⵙ ⵉⵜⵜⵓⴳⵏ ⵅⴼ ⵡⵉⵙ ⴷ ⵉⵙⴽⵛⴰⵎⵏ ⵉⴼⵓⵏⴰⵙⵏ ⵉⵏⴰⵎⵢⴰⵔⵏ ⵙⴳ ⵉⵙⴷⴷⵉⵜⵏ ⵏ ⵓⴼⴰⵔⵙ ⵏ ⵓⴽⵙⵓⵎ ⵍⵍⵉ ⵎⵉ ⵓⵔ ⵉⵣⴳⴳⵔ ⵓⵙⵜⴰⵍ ⵏⵏⵙ 550 ⵏ ⴽⵉⵍⵓ ⴰⵔ 31 ⵛⵓⵜⴰⵏⴱⵉⵔ 2023. ⴰⵢⴷⴷⵖ ⵏ ⵜⵉⴳⴳⵉ ⵓⵔ ⵜⵓⵎⵥ ⵖⴰⵙ ⵢⴰⵏ ⵡⵓⵟⵟⵓⵏ ⵙⴳ ⵉⵖⴼⴰⵡⵏ ⵏ ⵉⴼⵓⵏⴰⵙⵏ ⵉⴷⵔⵓⵙⵏ ⵙⴳ ⵓⴼⴰⵔⵙⵏ ⴰⵏⴰⵎⵓⵔ ⴷ ⵓⵔ ⵉⵍⵉ ⵓⵙⴽⵛⵎ ⵏⵏⵙⵏ ⵓⴹⵓⵚ ⵓⵣⴷⵉⵔ ⵅⴼ ⵢⵉⴳⵔ ⵏ ⵓⴽⵙⵓⵎ ⴰⵣⴳⴳⵯⴰⵖ ⴳ ⵍⵎⵖⵔⵉⴱ. ⴰⵡⴷ ⴰⵢⴷⴷⵖ ⵏⵏⴰ ⵉⵜⵜⵓⴳⵏ ⵢⵓⵡⵉ ⴷ ⵅⴼ ⵢⴰⵏ ⵡⴰⵏⴰⵡ ⵏ ⵉⴼⵓⵏⴰⵙⵏ ⵉⴳⴰⵏ ⵖⴰⵙ ⵉ ⵜⵖⵔⵙⴰ ⵙ ⵜⵎⴰⵎⴽⵜ ⵏⵏⴰ ⵉⴷⴷⴰⵏ ⴰⴷ ⵜⵜ ⵓⵙⵡⵜⵜⵓ ⵉ ⵉⵎⵙⴽⵛⵎⵏ.
