ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⵙⵉⵎⵡⴰⵙ 28 ⵎⴰⵕⵚ 2025
ⵉⵜⵜⴰⵡⵙⴽⴰⵔ ⴰⵙⵙ ⵏ ⵓⵙⵉⵎⵡⴰⵙ 27 ⵕⴰⵎⴰⴹⴰⵏ1446 ⵉⵎⵙⴰⵙⴰⵏ ⴰⴽⴷ28 ⵎⴰⵕⵚ 2025 ⴰⵙⵇⵇⵉⵎ ⵏ ⵜⵏⴱⴰⴹⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ. ⵉⵥⵍⵉ ⵓⴳⵔⴰⵡ ⴰⴷ ⵙ ⵓⵙⴼⵍⴷ ⵏ ⵙⵉⵏ ⵉⵙⵎⵏⵉⴷⵏ ⵉⵣⵓⵏⴰⵏⵏ ⴷ ⵓⵎⴹⴰⴽⴰⵕ ⵅⴼ ⵜⵓⴳⵜ ⵏ ⵉⵙⵏⵜⴰⵢ ⵏ ⵉⴹⵕⵉⵚⵏ ⵓⵙⵍⵉⴳⵏⵏ ⵙ ⵓⵎⵙⴰⵙⴰ ⴰⴽⴷ ⵓⵎⴰⴳⵔⴰⴷ ⵡⵉⵙ 92 ⵏ ⵓⴷⵓⵙⵜⵓⵔ.
ⴳ ⵜⵣⵡⵓⵔⵉ ⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⴰⴷ, ⵙ ⵓⵣⵎⵣⵣⵓ ⵏ ⵍⵄⵉⴷ ⵎⵥⵥⵉⵏ, ⵉⵙⵎⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵉⵙⵎ ⵏⵏⵙ ⴷ ⵉⵙⵎ ⵏ ⵉⴳⵎⴰⵎⵏ ⵏ ⵜⵏⴱⴰⴹⵜ ⵙ ⵉⵙⵔⵖⵓⴷⵏ ⵉⵣⴷⴷⵉⴳⵏ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵙⵔⵏⵓ ⵔⴱⴱⵉ ⴷ ⵜⵡⵊⴰ ⵜⴰⴳⵍⴷⴰⵏⵜ ⵜⴰⵎⴰⵖⵓⵜ ⴷ ⵓⴳⴷⵓⴷ ⴰⵎⵖⵔⴰⴱⵉ ⴽⵓⵍⵍⵓⵜ. ⵖⵉⴽⵍⵍⵉ ⵉⵜⵜⵔ ⴳ ⴱⴰⴱ ⵏ ⵉⴳⵡⵏⵡⴰⵏ ⴰⴷ ⴼⵍⵍⴰⵖ ⵉⵙⴽⵛⵎ ⵜⴰⴼⵓⴳⵍⴰ ⵅⴼ ⵜⵎⴰⵣⵉⵔⵜ ⵏⵏⵖ ⵙ ⵜⵏⴼⴰⵔⵉⵜ ⴷ ⵜⴳⵎⵉ ⴷ ⵓⴱⵓⵖⵍⵓ.
ⴹⴰⵕⴰⵜ ⵎⴰⵢⴰⴷ, ⵉⴹⴼⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⵙⵎⵏⵉⴷ ⵅⴼ ⵏ ⵉⵙⴳⵓⵎⵏ ⵉⵅⴰⵜⴰⵔⵏ ⵓⵙⴳⴳⴷ ⴰⵏⵎⵍⴰⵏ, ⵉⵙⵎⵏⵉⴷ ⵜⵜ ⵎⴰⵙⵙ ⵎⵓⵃⵎⵎⴰⴷ ⵙⴰⵄⴷ ⴱⵕⵕⴰⴷⴰ, ⴰⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ.
ⵉⵙⵡⵍ ⵓⵏⵙⵎⵏⵉⴷ ⵏ ⵎⴰⵙⵙ ⴰⵎⴰⵡⵙⴰⵙ ⵅⴼ ⵉⵚⵏⴼⴰⵕⵏ ⵉⵜⵜⵡⵕⵥⴰⵎⵏ ⴳ ⵓⵙⴰⵜⵉ ⵏ ⵓⵣⵣⵓⴳⵣ ⵏ ⵜⵖⴰⵔⴰⵙⵜ 2022-2026 ⵃⵎⴰ ⴰⴷ ⵜⵍⵉ ⵢⴰⵜ ⵜⵉⵏⵎⵍ ⵜⴰⴳⴷⵓⴷⴰⵏⵜ ⵉⵍⴰⵏ ⵜⵉⵔⵡⵉ ⵙ ⵓⵎⴰⵜⴰ ⴷ ⵖⵉⴽⵍⵍⵉ ⴷ ⵉⴷⴷⴰⵏ ⴳ ⵓⵙⵍⴳⵏ ⴰⵙⴰⵜⵉ 51.17 ⵉⵥⵍⵉⵏ ⵙ ⵓⵖⴰⵡⴰⵙ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ.
ⵉⵙⴰⵡⵍ ⵓⵙⵏⵎⵉⴷ ⵅⴼ ⵉⴳⵔ ⵏ ⵓⵙⵍⵎⴷ ⴰⵎⵏⵣⵓ ⵍⵍⵉ ⵢⵉⵡⴹⵏ 80% ⴳ ⵓⵙⵎⴰⵜⴰ ⵏⵏⵙ ⵃⵎⴰ ⴰⴷ ⵢⵉⵍⵉ ⵓⵙⵎⴰⵜⴰ ⴰⴽⴽⵯ ⴳ ⵓⵙⴳⴳⵯⴰⵙ 2028, ⵙ ⵜⵖⴰⵔⴰⵙⵜ ⵏ ⵓⵙⵔⵓⵙ ⵏ ⵢⴰⵏ ⵡⴰⵏⴰⵡ ⵏ ⵓⵙⵡⵓⴷⴷⵓ ⵉⵙⵏⴼⵍⵏ ⵉⴷⵓⵙⵏ ⴷ ⵓⵙⵙⵓⵊⴷ ⵏ ⵢⴰⵏ ⵓⴼⵙⵔ ⵏ ⵜⵉⵕⵡⵉ. ⵖⵉⵍⵍⵉ ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰ ⵙ ⴷ ⴰⵣⵣⵓⴳⴳⵯⵥ ⴷ ⵓⵙⵡⵓⴷⴷⵓ ⵏ ⵡⴰⵏⴰⵡ ⴰⴱⵉⴷⴰⵖⵓⵊⵉ ⴰⵎⴰⵢⵏⵓ ⵙ ⵓⵙⵔⵓⵙ ⵏ ⵓⵚⵏⴼⴰⵕ « ⵜⵎⵔⵙⴰⵍ ⵏ ⵓⴱⵓⵔⵣ » ⴳ ⵓⵙⵡⵉⵔ ⴰⵎⵣⵡⴰⵔⵓ ⴷ ⵓⵙⵡⵉⵔ ⴰⵙⵉⵎⴰⵏ ⴳ ⵜⵙⴳⴳⵉⵡⵉⵏ ⴷ ⵜⵎⵏⴰⴹⵉⵏ ⴰⴽⴽⵯ ⵏ ⵜⴳⵍⴷⵉⵜ ⴷ ⴳ ⵡⴰⵎⵎⴰⵏ ⴰⵖⵔⵎⴰⵏ ⴷ ⴰⵎⵖⵔⵎⴰⵏ ⴷ ⵓⴼⴰⵔⴰⵏ. ⵉⴳⴰ ⵓⵟⵟⵓⵏ ⵏ ⵜⵎⵔⵙⴰⵍ ⴰⴷ 2.626 ⵏ ⵜⵉⵏⵎⵍ ⵜⴰⵎⵣⵡⴰⵔⵓⵜ ⴷ 232 ⵏ ⵓⵙⵉⵏⴰⵏ ⵏ ⵓⵙⵎⴷⵉ ⴷ ⵓⵙⵎⵓⵜⵜⴳ ⴳ ⵉⵔⵉⵎ ⴰⵏⵎⵍⴰⵏ ⵏ ⵓⵙⴳⴳⵯⴰⵙ ⴰⴷ.
ⵉⵙⴰⵡⵍ ⵓⵙⵎⵏⵉⴷ ⴰⵡⴷ ⵅⴼ ⵜⵖⴰⵡⵙⵉⵡⵉⵏ ⵢⴰⴹⵏⵉⵏ ⵉⵥⵍⵉⵏ ⵙ ⵓⵙⵡⴰⵍⴰ ⴰⵏⵎⵍⴰⵏ ⴷ ⵓⵣⵣⵓⵍⴰⵏ ⴷ ⵜⵉⵏⵎⴰⵍ ⵓⵙⵏⴼⵍ ⵡⵉⵙ ⵙⵉⵏ ⴷ ⵜⵏⵎⴰⵍ ⵜⵉⴳⵔⴰⵡⵉⵏ ⵍⵍⵉ ⵉⵜⵜⴰⵡⵙⵏ ⴳ ⵓⵙⴱⴷⴷⵉ ⵏ ⵓⴼⵓⵖ ⵣⵖ ⵜⵉⵏⵎⵍ ⴷ ⵜⵡⵓⵔⵉ ⵉⵥⵉⵍⵏ ⵍⵍⵉ ⵜⴳⴳⴰⵏ ⵡⴰⵎⵎⴰⵙⵏ ⵏ ⵓⵏⵏⵓⵕⵥⵎ ⴳ ⵓⵙⴱⵓⵖⵍⵓ ⵏ ⵜⵎⵙⵙⵓⴳⴰⵔ ⵖⵓⵔ ⵜⵉⵏⴰⵍⵎⴰⴷⵉⵏ ⴷ ⵉⵏⴰⵍⵎⴰⴷⵏ.
ⵢⵉⵡⵉ ⴷ ⴰⵡⴷ ⵓⵙⵎⵏⵉⴷ ⵜⴰⵡⵓⵔⵉ ⵅⴼ ⴰⵢⵍⵍⵉ ⵉⵜⵜⵓⵙⴽⴰⵔⵏ ⵉ ⵉⵎⵙⵖⴰⵏⵏ ⵏ ⵉⴳⵔ ⵏ ⵓⵙⴳⵎⵉ ⵖ ⵉⵍⵍⴰ ⵓⵙⵖⵣⵏ ⵏ ⵓⵏⴳⵔⴰⵡ ⴰⴷⵙⴰⵏ ⴰⵎⴰⵢⵏⵓ ⵉⵥⵍⵉⵏ ⵙ ⵉⵎⵙⵖⴰⵏⵏ ⵏ ⵜⵎⴰⵡⴰⵙⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⴼⵓⵍⴽⵉ ⵏ ⵡⴰⴷⴷⴰⴷⵏ ⵉⵎⵙⵙⵓⴰⵔ ⴷ ⵉⵥⵕⴼⴰⵏⵏ ⵏⵏⵙⵏ ⴷ ⵓⵙⵡⵓⵔⵉ ⵅⴼ ⵜⵏⵏⵓⵣⵖⴰ ⵏ ⵜⵡⵓⵔⵉⵡⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ.
ⴹⴰⵕⴰⵜ ⵎⴰⵢⴰⵏⵏ, ⵉⴹⴼⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⵡⴷ ⵢⴰⵏ ⵓⵙⵎⵏⵉⴷ ⵅⴼ ⵓⵙⵎⵓⵜⵜⴳ ⵍⵍⵉ ⵜⴳⴰ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵉⴳⵔ ⵏ ⵜⵏⴽⵔⴰ ⵙ ⵡⴰⴷⴷⴰⴷⵏ ⵍⵍⵉⴳ ⵜⵍⵍⴰ ⵜⵎⵖⴰⵔⵜ ⴷ ⵉⵙⴽⵉⵍ ⵏⴳⵔ ⵓⵔⴳⴰⵣ ⴷ ⵜⵎⵖⴰⵔⵜ, ⵜⵙⵎⵏⵉⴷ ⵜ ⵎⴰⵙⵙⴰ ⵏⴰⵄⵉⵎⴰ ⴱⵏⵢⴰⵃⵢⴰ, ⵜⴰⵎⵡⵙⴰⵙⵜ ⵏ ⵜⵡⵉⵣⵉ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵡⵓⵊⴰ.
ⵉⴷⴷⴰ ⴷ ⴳ ⵓⵙⵎⵏⵉⴷ ⵉⵣⵎⴰⵣ ⵍⵍⵉⴳ ⵜⵣⵔⵉ ⵜⵡⴰⴷⴰ ⵏ ⵉⵙⴽⵉⵍ ⵏⴳⵔ ⵓⵔⴳⴰⵣ ⴷ ⵜⵎⵖⴰⵔⵜ ⴳ ⵍⵎⵖⵔⵉⴱ ⴷⴷⴰⵡ ⵜⵉⵏⵏⵓⴱⴹⴰ ⵉⴼⴰⵡⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵙⵔⵏⵓ ⵔⴱⴱⵉ, ⵉⴱⵉⴷ ⴰⵡⴷ ⵅⴼ ⵉⵚⵏⴼⴰⵕⵏ ⵉⵣⵔⴼⴰⵏⵏ ⴷ ⵉⵖⴰⵡⵙⵏ ⵓⵏⴱⵉⴹⵏ ⵍⵍⵉ ⵎⵓ ⵉⴳⴰ ⵉⵡⴰⵜⵜⵙⵏ ⴰⵙⴷⵓⵙ ⴰⴷⴰⵎⵙⴰⵏ ⴷ ⵓⵏⴰⵎⵓⵏ ⵏ ⵜⵎⵖⴰⵔⵉⵏ ⴰⵎ ⵜⵎⴷⵔⴰⵡⵉⵏ ⴳ ⵜⴳⵎⵉ ⴷ ⵜⵉⵎⵙⵢⴰⴼⴰⵜⵉⵏ ⴳ ⵜⵢⴰⴼⵓⵜ ⵏⵏⵙ.
ⵖⵉⴽⵍⵍⵉ ⵉⴱⵉⴷⴷ ⵓⵙⵎⵏⵉⴷ ⵅⴼ ⵉⵣⵎⴰⵣ ⴳ ⵜⵡⴰⴷⴰ ⵏ ⵓⵙⴱⵓⵖⵍⵓ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⵙ ⵓⵙⵏⵎⴰⵍⴰ ⵏ ⵜⵢⴰⴼⵓⵜ ⴳ ⵉⴳⵔ ⵏ ⵓⵣⵔⵉⴼⵏ ⵖ ⵉⵣⵡⴰⵔ ⴰⵙⵏⴼⵍ ⵏ ⵓⵙⵍⴳⵏ ⵏ ⵜⵡⵓⵊⴰ ⵍⵍⵉ ⵉⵙⵏⵜⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵙⵔⵏⵓ ⵔⴱⴱⵉ, ⴷ ⵓⵙⵎⵏⵉⴷ ⵏ ⵉⵚⵏⴼⴰⵕⵏ ⵢⴰⴹⵏⵉⵏ ⵓⵣⵔⵉⴼⵏ ⴷ ⵓⵍⴳⵉⵏⵏ ⵉⵥⵍⵉⵏ ⵓⵃⵟⵟⵓ ⵏ ⵉⵣⵔⴼⴰⵏ ⵏ ⵜⵎⴰⵖⴰⵔⵉⵏ.
ⵖⵉⴽⵍⵍⵉ ⵜⵙⴱⴰⵢⵏ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵜⵎⴳⴳⵉⵢⵉⵏ ⵏ ⵜⵏⴱⴰⴹⵜ ⴳ ⵓⵙⵡⵓⴷⴷⵓ ⵏ ⵜⵓⵎⴰⵢⵉⵏ ⵏ ⵜⵖⵔⴰⵙⵜ ⵜⵓⵏⴱⵉⴹⵜ ⵏ ⵉⵙⴽⵉⵍ 2023-2026 ⴷ ⵜⵢⴰⴼⵓⵜ ⵏ ⵜⵡⵓⵔⵉ ⵏ ⵉⴳⵔ ⴰⵎⴰⵡⵙⴰⵙ ⴷ ⵜⵎⵔⵙⴰⵍ ⵍⵍⵉ ⴰⵙ ⵉⴹⴼⴰⵕⵏ ⴳ ⵜⵉⵣⵉ ⵏ 2023-2024 ⴷ ⵜⵎⴳⴳⵉⵢⵉⵏ ⵏ ⵓⵙⵡⵓⴷⴷⵓ ⵏ ⵉⵡⵜⵜⴰⵙⵏ ⵏ ⵓⵖⴰⵡⴰⵙ ⵓⵏⴱⵉⴹ.
- ⵉⴹⴼⴰⵕ ⵓⵙⵇⵇⵉⵎ ⵏ ⵜⵏⴱⵏⴰⴹⵜ ⵜⴰⵡⵓⵔⵉ ⵏⵏⵙ ⵙ ⵓⵎⴹⴰⴽⴰⵕ ⴷ ⵓⵙⵖⵥⵏ ⵏ ⵓⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.25.148 ⵉⵙⵏⴼⵍⵏ ⴰⵎⵕⵙⵓⵎ ⵓⵟⵟⵓⵏ 2.22.433 ⵍⵍⵉ ⴷ ⵉⴼⴼⴰⵖⵏ ⴳ 25 ⴷⵉⵍⵃⵉⵊⵊⴰ 1443 (28 ⵢⵓⵍⵢⵓⵣ 2022) ⵉⵥⵍⵉⵏ ⵙ ⵓⵙⴽⴰⵔ ⵏ ⵜⵙⴳⴰ ⵏ ⵓⵖⴰⵡⵍ ⴰⵎⴳⵓⵔⵉ ⵏ ⵍⵄⵉⵏ ⵊⴰⵡⵀⴰⵕⴰ, ⵉⵙⵎⵏⵉⴷ ⵜ ⵎⴰⵙⵙ ⵕⵢⴰⴹ ⵎⵣⵡⵕ, ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ.
- ⴹⵕⴰⵜ ⵎⴰⵢⴰⵏⵏ, ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓ 2.24.1143 ⵉⵎⵎⴰⵍⴰⵏ ⵜⵙⵓⴳⴰⵔ ⵏ ⵜⴰⵡⵓⵔⵉ ⴷ ⵓⵙⵓⴷⵙ ⵏ ⵉⴳⵔ ⵏ ⵓⵎⵢⴰⵡⴰⴹ, ⵉⵙⵎⵏⵉⴷ ⵜ ⵎⴰⵙⵙ ⵎⵓⵃⵎⵎⴷ ⵍⵎⴰⵀⴷⵉ ⴱⵏⵙⵄⵉⴷ, ⴰⵎⴰⵡⴰⵙⴰⵙ ⵏ ⵜⵄⵄⵓⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ.
