ⴰⵙⵏⵜⵉ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙⵙ ⵚⴹⵉⵚⵜ ⵏ ⵓⵙⴼⵙⵔ “ⴰⵍⵢⵓⵜⵉⵙ” ⴰⴳⵔⴰⵖⵍⴰⵏ ⴳ ⴰⴳⴰⴷⵉⵔ

ⵏⵏⵓⵕⵥⵎⵏⵜ, ⴰⵙⵙ ⵏ ⵓⴽⵕⴰⵙ ⴳ ⴰⴳⴰⴷⵉⵔ, ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙⵙ ⵚⴹⵉⵚⵜ ⵏ ⵓⵙⴼⵙⵔ “ⴰⵍⵓⵜⵉⵙ” ⴰⴳⵔⴰⵖⵍⴰⵏ, ⵙ ⵢⵉⵍⵉ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵄⴰⵣⵉⵣ ⴰⵅⵏⵓⵛ.
ⵉⵎⴽⵉⵏⵏⴰ ⵉⵍⵍⴰ ⴳ ⵜⴼⵓⴳⵍⴰ ⵏ ⵓⵕⵥⵥⵓⵎ ⵏ ⵓⵎⵓⵙⵙⵓ ⴰⴷ, ⵍⵍⵉ ⵉⵜⵜⵓⵙⵏⵎⴰⵍⴰⵏ ⵙ ⵢⵉⵡⵣ ⴰⵎⴰⵜⴰⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ, ⵉⵃⵎⵎⴰⴷ ⵚⴰⴹⵉⵇⵉ, ⴷ 32 ⵏ ⵓⴽⴰⴱⴰⵕ ⵙⴳ ⵉⵡⴰⵏⴽⵏ ⵎⵣⴰⵔⴰⵢⵏⵉⵏ ⵙⴳⵙⵏ 13 ⵏ ⵓⵎⴰⵡⵙⴰⵙ ⵙⴳ ⵜⵎⵉⵣⴰⵔ ⵏ ⵉⴼⵔⵉⵇⵉⵢⴰ.
ⵜⵜⵓⵙⵏⵎⴰⵍⴰⵏⵜ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⴰⴷ ⵙⴳ 1 ⴰⵔ 5 ⴱⵕⴰⵢⵕ ⴳ ⵡⴰⵎⵎⴰⵙ ⵏ ⵉⵙⴼⵙⴰⵔ ⴳ ⵜⵖⵔⵎⵜ ⵏ ⴰⴳⴰⴷⵉⵔ ⵙ ⵜⵎⴰⵜⴰⵔⵜ : “ ⵜⴰⵙⵓⵍⴰⵏⵜ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵓⵙⴳⵎⵉ ⵏ ⵉⵎⵓⴷⴷⵓⵔⵏ ⵏ ⵡⴰⵎⴰⵏ : ⵜⴰⵎⵙⵙⵉⵍⵉⵜ ⵏ ⵜⴷⴰⵎⵙⴰ ⵜⴰⵏⵉⵍⵉⵜ ⵜⴰⵖⵣⵓⵔⴰⵏⵜ ⵜⵉⵎⵕⵡⵉⵜ”, ⵙ ⵜⵉⵍⵉⵜ ⵏ ⵚⴱⵍⵢⵓⵏ ⵉⴳⴰⵏ ⴰⵏⴱⴳⵉ ⵏ ⵡⵓⴷⴷⵓⵔ.
ⵢⴰⵎⵓ ⴳ ⵓⵙⴼⵙⵔ ⴰⴷ, ⵜⵙⵏⵎⴰⵍⴰ ⵜⵎⵙⵎⵓⵏⵜ ⴰⵙⴼⵙⵔ ⴰⵍⵢⵓⵜⵉⵙ, ⴳ ⵓⵣⴰⵔⵓ ⵉⴽⴽⴰⵏ ⵏⵏⵉⴳ 16 ⵉⴼⴹ ⵎⵉⵜⵔ ⴰⵎⴽⴽⵓⵥ, 337 ⵏ ⵓⵎⵙⴼⵙⵔ ⵙⴳ ⵉⵎⴳⴳⴰⵢⵏ ⴳ ⵢⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⵎⴳⵓⵔⵉ ⴷ ⵓⵙⵏⴼⵍ ⵏ ⵉⴼⴰⵔⵙⵏ ⵉⵢⵍⴰⵏⵏ ⴷ ⵉⵎⵓⴷⴷⵓⵔⵏ ⵏ ⵡⴰⵎⴰⵏ, ⵔⴰⴷ ⵉⵍⴷⵉ ⵓⵙⴼⵙⵔ ⴰⴷ ⵓⴳⴳⴰⵔ ⵏ 50 ⵏ ⵢⵉⴼⴹ ⵏ ⵓⵏⵔⵣⵓⴼ.
ⵉⴳⴰ ⵓⵎⵓⵙⵙⵓ ⴰⴷ, ⴰⵣⵎⵣⵣⵓ ⵉ ⵉⵏⵔⵣⴰⴼ ⴷ ⵉⵎⵣⵣⵓⵍⴰⵏⵏ ⴷ ⵉⵎⵙⵙⴰⵔⵓⵜⵏ ⴷ ⵓⴳⴷⵓⴷ ⴰⴷ ⵉⵙⵉⵏⵏ ⵜⴰⵣⵣⵓⵍⵉⵏ ⴷ ⵜⵉⵍⴰⵍ ⴷ ⵜⵏⵓⴼⴰ ⵉⵥⵍⵉⵏ ⵙ ⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⵓⵙⴳⵎⵉ ⵏ ⵉⵎⵓⴷⴷⵓⵔⵏ ⵏ ⵡⴰⵎⴰⵏ.
ⵉⵎⴽⵉⵍⵍⵉ ⵉⵙⵏⴰⵎⵎⴰⵙ ⵖⴼ ⵜⴻⵜⵉⴽⵏⵓⵍⵓⵊⵉⵢⵉⵏ ⵜⵉⵎⵙⵏⵓⵍⴼⴰ ⵉⵍⴰⵏ ⴰⵜⵉⴳ ⴰⵎⵔⵏⵓ ⴰⵎⴰⵜⴰⵢ ⴳ ⵓⵙⵙⵉⵜⴳ ⴷ ⵜⴳⵎⵉ ⵜⴰⵙⵓⵍⴰⵏⵜ ⵏ ⵉⵙⴷⴷⵉⵜⵏ ⴰⴷ ⵍⵍⵉ ⵉⴳⴰⵏ ⴰⴼⵔⴷⵉⵙ ⴰⵖⵙⵙⴰⵏ ⴳ ⵜⴷⴰⵎⵙⴰ ⵜⴰⵏⵉⵍⵉⵜ.
ⵙ ⵓⵣⵎⵣⵣⵓ ⴰⴷ, ⵉⵔⵣⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴰⵔ ⵉⴳⵊⴷⴰ ⵏ ⵓⵙⴼⵙⵔ ⵙ ⵙⴰ ⵍⵍⵉ ⵉⴷⵍⵏ ⵎⴰⵕⵕⴰ ⵉⵙⴷⴷⵉⵜⵏ ⵏ ⵡⴰⵜⵉⴳ ⵍⵍⵉ ⴳ ⵢⴰⵎⵓ ⵉⴳⵊⴷⵉ ⴰⵎⵔⵙⵍⴰⵏ, ⵉⴳⵊⴷⵉ ⴰⴳⵔⴰⵖⵍⴰⵏ, ⵉⴳⵊⴷⵉ ⵏ ⵓⵙⵏⴼⵍ ⴷ ⵓⵙⵙⵉⵜⴳ ⵏ ⵜⵎⵀⴰⵍ, ⵉⴳⵊⴷⵉ ⵏ ⵉⵎⴰⵜⵜⵉⵡⵏ ⵉⵢⵍⴰⵏⵉ, ⵉⴳⵊⴷⵉ ⵏ ⵓⵙⴼⵍⵓⵍ, ⵉⴳⵊⴷⵉ ⵏ ⵜⴳⵎⵉ ⵜⴰⵙⵓⵍⴰⵏⵜ, ⵉⴳⵊⴷⵉ ⵏ ⵓⵙⵎⵓⵙⵙⵓ.
 ⵉⵙⵙⵏⵜⵎ ⵎⴰⵙⵙ ⴰⵅⵏⵓⵛ, ⴳ ⵜⵙⴳⵓⵔⵉ ⵏⵏⵙ ⵉ ⵜⵖⵎⵙⴰ, ⵉⵙ ⴷⴰ ⵉⵜⵜⵓⵎⵓ ⵓⵙⴼⵙⵍ ⴰⵍⵢⵓⵜⵉⵙ ⴰⴳⵔⴰⵖⵍⴰⵏ ⴳ ⵜⴷⵉⵏⴰⵎⵜ ⵍⵍⵉ ⵉⵍⵍⴰⵏ ⴳ ⵢⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ, ⵎⵇⵇⴰⵔ ⴷ ⵉⴹⵉⵚ ⴷ ⵉⴽⴽⴰⵏ ⴰⴱⴰⵢⵢⵓⵕ ⴽⵓⴼⵉⴷ-19, ⵉⵙⵙⵎⵜⵔ ⵉⵙ ⵍⴽⵎⵏ ⵉⵚⵉⴼⵉⴹⵏ ⵍⵍⵉ ⵉⵙⵍⵍⵡⴰ ⵢⵉⴳⵔ ⴰⴷ ⴳ ⵓⵙⴳⴳⵯⴰⵙ ⵏ 2022 ⵓⴳⴳⴰⵔ ⵏ 28 ⵎⵍⵢⴰⵕ ⴷⵔⵀⵎ ⵉⵜⵜⴳⴰⵏ ⵜⵉⵔⵏⵉ  ⵢⵉⵡⴹⵏ 16 ⴳ ⵜⵉⴳⵎⵉⴹⵉ.
ⴳ ⵜⵙⴳⴰ ⵏⵏⵙ, ⵉⵙⵙⵏⵜⵎ ⵎⴰⵙⵙ ⵚⴰⴹⵉⵇⵉ, ⵉⵙ ⴷ ⵉⴳⴰ ⵓⵙⴼⵙⵔ ⴰⴷ ⵍⵍⵉ ⵉⴱⴷⴷⴰⵏ ⵙ ⵜⵎⵏⵜⵉⵍⵜ ⵏ ⵓⵡⵔⵔⵄ ⵏ ⴽⵓⴼⵉⴷ-19, ⴰⵣⵎⵣⵣⵓ ⵉ ⵓⵙⴼⵙⵔ ⵏ ⵉⵙⵏⵓⵍⴼⵓⵜⵏ ⵉⵎⴰⵢⵏⵓⵜⵏ ⴳ ⵢⵉⵔ ⵏ ⵓⵔⵣⵣⵓ ⴰⵎⴰⵙⵙⴰⵏ ⴷ ⵜⵎⴳⴳⴰ ⵏ ⵡⴰⴹⴰⴼ ⴷ ⵜⵏⴼⵔⵓⵜ ⵜⴰⵢⵍⴰⵏⵜ, ⵓⵍⴰ ⵉⵎⴰⵙⵙⵏ ⵏ ⵓⵙⵙⵉⵜⴳ ⵏ ⵉⴼⴰⵔⵙⵏ ⵉⵢⵍⴰⵏⵏ ⴷ ⵓⵙⵙⴷⵓⵙ ⵏ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ ⴷ ⵓⵙⵏⴼⵍ ⵏ ⵜⵎⵓⵣⴰⵢⵜ ⴳ ⵢⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ.
ⴳ ⵜⵙⴳⴰ ⵢⴰⴹⵏⵉⵏ, ⵙⴼⴰⵡⵏ ⵉⵎⵙⵏⵎⴰⵍⴰⵏ ⵉⵙ ⴰⵔ ⵉⵎⵎⴰⵍ ⵓⵙⵏⵎⴰⵍⴰ ⵏ ⵉⵎⵊⵕⵉ ⴰⴷ ⴰⴽⵙⵡⴰⵜ ⵜⵉⵅⵅⵉⵜⵔⵜ ⵏ ⵢⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴳ ⵓⵥⵟⵟⴰ ⴰⴷⵎⵙⴰⵏ ⴰⵏⴰⵎⵓⵔ, ⵙⵏⵄⵜⵏ ⵉⵙ ⵉⵍⴽⵎ ⵓⴼⴰⵔⵙ ⴰⵏⴰⵎⵓⵔ ⵏ ⵉⵢⴰⴼⵓⵜⵏ ⵏ ⵜⴳⵯⵎⵔⵜ ⵜⴰⵢⵍⴰⵏⵜ 1.55 ⵎⵍⵢⵓⵏ ⵟⵓⵏ ⴳ ⵓⵙⴳⴳⵯⴰⵙ ⵏ 2022, ⴰⵢⵍⵍⵉ ⵉⵙⵙⴽⵔⵏ ⴳ ⵜⴳⵍⴷⵉⵜ ⴰⴷ ⵜⴰⵎⵥ ⵜⴰⵙⴽⵯⴼⵍⵜ ⵉⵣⵡⴰⵔⵏ ⵉⵏⴳⵔ ⵉⵎⵙⵢⴰⴼⵓⵜⵏ ⵉⴼⵔⵉⵡⵉⵜⵏ ⴷ ⵜⵙⴽⵯⴼⵍⵜ ⵜⵉⵙⵙ 14 ⴳ ⵓⵎⴰⴹⴰⵍ.
ⵉⵣⵎⵎⴻⵎ ⵓⴼⴰⵔⵙ ⴰⵏⴰⵎⵓⵔ ⴷ ⵓⵖⵣⵓⵔⴰⵏ ⵏ ⵉⵚⵉⴼⵉⴹⵏ ⵙⴼ ⵉⵢⴰⴼⵓⵜⵏ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴳ ⵓⵙⴳⴳⵯⴰⵙ ⵏ 2022 ⵜⵉⵔⵏⵉ ⵙ ⵓⵙⵖⵍ ⵏ 10 ⴳ ⵜⵉⴳⵎⵉⴹⵉ ⴷ 13 ⴳ ⵜⵉⴳⵎⵉⴹⵉ ⵙ ⵓⴹⴼⴰⵕ ⴳ ⵓⵙⵎⵣⴰⵣⴰⵍ ⴰⴽⴷ ⵓⵙⴳⴳⵯⴰⵙ ⵏ 2021, ⵡⴰⵅⵅⴰ ⴷ ⵜⴰⵖⵜⴰⵙⵜ ⵏ ⵜⵎⴰⵡⴰⵙⵜ ⵙ ⵜⵓⵙⵙⵔⴰ ⵏ ⵉⵎⵉⵔ ⵏ ⵓⵏⴱⴷⵓ ⵉ ⵜⴳⵯⵎⵔⵜ ⵏ ⵓⵣⴰⵢⵣ ⴳ ⵉⴼⴼⵓⵙ ⵏ ⴱⵓⵊⴷⵓⵔ ⴷ ⵓⵣⵣⴳⴰⵔ ⵏ ⵉⵎⵉⵔ ⵏ ⵓⵙⵓⵏⴼⵓ ⴰⴱⵢⵓⵍⵓⵊⵉ ⴳ ⵜⵙⴳⴰ ⴰⴷ ⵉⴽⴽⴰⵏ ⵏⵏⵉⴳ ⵜⴰⵎ ⵏ ⵉⵢⵢⵉⵔⵏ, ⵉⵎⵉⵍ ⵜⴻⵜⵜⵓⴳⴰ ⵜⵖⵜⴰⵙⵜ ⴰⴷ ⵃⵎⴰ ⴰⴷ ⵢⵓⵖⵓⵍ ⵓⵙⴰⵜⵉⵎ ⴰⴷ ⵍⵍⵉ ⵎⵉ ⵉⴷⵔⵓⵙ ⵓⴳⵓⴷⵉ ⵏⵏⵙ ⴽⵉⴳⴰⵏ.
ⵜⵙⵙⵏⴽⴷ ⵜⵙⵓⵜⵍⵜ ⴰⴷ ⴰⵖⴰⵡⴰⵙ ⴱⴰⵀⵔⴰ ⵉⴱⵖⵓⵔⵏ ⵙ ⵉⵏⵎⵓⵇⵇⴰⵔⵏ ⴷ ⵜⵉⵏⴰⵡⵉⵏ ⵍⵍⵉ ⵉⵙⵏⴰⵎⵎⵙⵏ ⵙ ⵓⵥⵍⴰⵢ ⵖⴼ ⵜⵙⵓⴳⴰⵔ ⵏ ⵉⵎⵓⴷⴷⵓⵔⵏ ⵏ ⵡⴰⵎⴰⵏ ⵙ ⵓⵡⵜⵜⴰⵙ ⵏ ⵜⵙⵓⵍⴰⵏⵜ ⴷ ⵓⵙⵙⴷⵓⵙ ⵏ ⵜⴷⴰⵎⵙⴰ ⵜⴰⵏⵉⵍⵉⵜ ⴷ ⵓⵙⵢⴰⴼⵓ ⵏ ⵓⵙⴰⵍⵉ ⴳ ⵓⵎⴰⵙⵙⴰⵏⵉⵏ ⴷ ⵜⴻⵜⵉⴽⵏⵓⵍⵓⵊⵉⵜ ⴷ ⵓⵙⵏⵓⵍⴼⵓ ⵉ ⵡⴰⵏⵏⴰⵍ ⵏ ⵜⴳⵎⵉ ⵜⴰⵙⵓⵍⴰⵏⵜ ⵉ ⵢⵉⴳⵔ ⴷ ⵜⵍⵓⵖⵉ ⵏ ⵉⵙⴷⴷⵉⵜⵏ ⵏ ⵓⴼⴰⵔⵙ ⴰⵎⵙⴰⴷⵓⵔ ⵉ ⵜⴳⵯⵎⵔⵜ ⵜⴰⵢⵍⴰⵏⵜ.
ⴰⵔ ⵉⴳⴳⴰⵔ ⵓⵙⴼⵙⵔ ⵜⵉⴼⴰⵡⵜ ⵓⵍⴰ ⵖⴼ ⵓⵙⵎⵓⵜⴳ ⵏ ⵜⵙⵓⵜⴰ ⴷ ⵉⴷⴷⴰⵏ ⵏ ⵉⵎⵓⵙⵏⴰⵡⵏ ⴷ ⵉⵎⴰⵡⴰⵢⵏ ⵏ ⵉⴳⴰⵔⴰⵡⵏ ⴷ ⵜⴰⵣⵣⵓⵍⵉⵏ ⵏ ⵉⵎⴰⵍ ⵃⵎⴰ ⴰⴷ ⵜⵜⵢⵉⴽⴽⵉⵏ ⵉⵏⴰⵥⴰⵕⵏ ⵏ ⵉⵎⴰⵍ ⴳ ⵜⴷⴰⵎⵙⴰ ⵜⴰⵏⵉⵍⵉⵜ.
ⵜⵙⵜⵉ ⵜⵙⵓⵜⵍⵜ ⴰⴷ ⵙ ⵓⵏⵏⵓⵕⵥⵎ ⵏⵏⵙ ⴰⴳⵔⴰⵖⵍⴰⵏ ⴷ ⵡⵓⵎⵓ ⵏ 49 ⵏ ⵓⵡⴰⵏⴽ, ⵉⵏⴳⵔⴰⵙⵜⵏ 22 ⵏ ⵓⵡⴰⵏⴽ ⴰⴳⵎⴰⵎ ⴳ ⵓⴳⵔⴰⵡ ⴰⵎⴰⵡⵙⴰⵙ ⵖⴼ ⵓⵎⵢⴰⵡⴰⵙ ⴳ ⵢⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴳⵔ ⵉⵡⴰⵏⴽⵏ ⵉⴼⵔⵉⵇⵉⵢⵏ ⵍⵍⵉ ⵉⵍⵍⴰⵏ ⵖⴼ ⵓⴳⴰⵔⴰⵡ ⴰⵟⵍⴰⵏⵟⵉ (COMHAFAT)