ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵡⴰⵙ 14 ⴷⵓⵊⴰⵏⴱⵉⵔ 2023
ⵉⵜⵜⵓⴳⴰ ⴰⵙⵙ ⵏ ⵓⴽⵡⴰⵙ 30 ⴰⵜⴼⴼⴰⵙ ⵉⵣⵡⴰⵔⵏ 1445, ⵉⵎⵙⴰⵙⴰⵏ ⴰⴽⴷ 14 ⴷⵓⵊⴰⵏⴱⵉⵔ 2023, ⵓⵙⵇⵇⵉⵎ ⵏ ⵜⵏⴱⴰⴹⵜ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⵉⵜⵜⵢⴰⵡⵥⵍⴰⵢⵏ ⵉ ⵓⵎⵔⴰⵔⴰ ⵏ ⵡⴰⵡⴰⵍ ⵅⴼ ⵜⵓⴳⴳⵜ ⵏ ⵉⵙⵏⴼⴰⵔⵏ ⵏ ⵉⴹⵕⵉⵚⵏ ⵉⵣⵔⴼⴰⵏⵏ ⴷ ⵜⵙⵓⵎⵔⵉⵏ ⵏ ⵓⵙⵎⵎⴰ ⴳ ⵉⴷⵖⴰⵔⵏ ⴰⵢⵜⵜⵓⵢⵏⵉⵏ ⵙ ⵎⵉⵏ ⵉⵎⵙⴰⵙⴰⵏ ⴰⴽⴷ ⵉⵎⵉⵔ 92 ⴳ ⵓⴷⵓⵙⵜⵓⵔ.
- ⴳ ⵜⵉⵣⵡⵓⵔⵉ ⵏ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⴷ, ⵉⵙⵎⵔⴰⵔ ⵓⵙⵇⵇⵉⵎ ⵏ ⵜⵏⴰⴱⴹⵜ ⴰⵡⴰⵍ ⵉⵙⵖⵣⵏ ⵅⴼ ⵓⵙⵏⴼⴰⵔ ⴰⵎⵕⵚⵓⵎ ⵓⵟⵟⵓⵏ 2.23.1065 ⵏ ⵓⵙⵎⵙⴰⵙⴰ ⴷ ⵜⵉⴳⴳⵉ ⵏ ⵓⵙⵉⴹⵏ ⵏ ⵉⵎⵣⴷⴰⵖ ⴷ ⵉⵣⴷⵓⵖⵏ ⴳ ⵜⴳⵍⴷⵉⵜ ⴷ ⵜⴼⴰⴷⵉⵡⵉⵏ ⵜⵓⵛⵛⵉⵍⵉⵏ ⵙ ⴷ ⵉⵇⵇⴰⵏ ⴰⴷ ⵉⵍⵉⵏⵜ ⴳ ⵉⵎⴷⵔⴰⵡⵏ ⵏ ⵓⵙⵙⴹⵕⵓ ⵏⵏⵙ, ⵉⵙⵏⴽⴷ ⵜ ⵎⴰⵙⵙ ⵄⴱⴷⵍⵡⴰⴼⵉ ⵍⴼⵜⵉⵜ, ⴰⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ.
- ⴷⴼⴼⵔ ⵎⴰⵏ ⴰⵢⵏⵏⵉ ⵉⵙⵎⵔⴰⵔⴰ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⵡⴰⵍ ⵉⵙⵖⵣⵏ ⵅⴼ ⵓⵙⵏⴼⴰⵔ ⴰⵎⵕⵚⵓⵎ ⵓⵟⵟⵓⵏ 2.23.746 ⵏ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵎⵕⵚⵓⵎ ⵓⵟⵟⵓⵏ 2.18.1008 ⴷ ⵉⴼⴼⵖⵏ ⴳ 23 ⴳ ⵡⵉⵏ ⵉⴳⵯⵔⵔⴰⵎⵏ 1440 (29 ⵉⴱⵔⵉⵔ 2019) ⵉ ⵓⵙⴽⴰⵔ ⵙ ⵓⵣⵔⴼ ⵓⵟⵟⵓⵏ 17.99 ⵉⵇⵇⵏ ⵖⵔ ⵜⵓⴳⵔⵉⵡⵜ ⵏ ⵉⵙⴼⵍⵙⵏ, ⵜⵙⵏⴽⴷ ⵜ ⵎⴰⵙⵙⴰ ⵏⴰⴷⵉⵢⴰ ⴼⵜⵜⴰⵃ, ⵜⴰⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵜⵥⵕⴼⵜ.
ⵉⵙⵙⵓⴷⵓ ⵓⵙⵇⵇⵉⵎ ⵏ ⵜⵏⴱⴰⴹⵜ ⴳ ⵜⵡⵉⵔⵉⵡⵉⵏ ⵏⵏⵙ ⵙ ⵓⵎⵔⴰⵔⴰ ⵏ ⵡⴰⵡⴰⵍ ⴷ ⵓⵙⵖⵣⵏ ⵅⴼ ⵙⵉⵏ ⵉⵙⵏⴼⴰⵔⵏ ⵉⵎⵕⵚⵓⵎⵏ ⵉⵇⵇⵏⵏ ⵖⵔ ⵓⵏⴳⵔⴰⵡ ⵏ ⵓⵙⴼⵍⵙ ⵓⵛⵛⵉⵍ ⴰⴷⵙⵍⴰⵏ ⵅⴼ ⵜⵎⴰⴹⵓⵏⵜ, ⵉⵙⵏⴽⴷ ⵜⵏ ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ, ⴰⵎⴰⵡⵙⴰⵙ ⵏ ⵜⴷⵓⵙⵉ ⴷ ⵜⵏⴼⵔⵓⵜ ⵜⴰⵏⴰⵎⵓⵏⵜ, ⴳ ⵓⵢⵏⵏⴰ ⵉⵜⵜⴳⴳⵏ:
- ⴰⵙⵏⴼⴰⵔ ⴰⵎⵕⵚⵓⵎ ⵓⵟⵟⵓⵏ 2.23.561 ⵏ ⵓⵙⵎⴰⴷ ⵏ ⵡⵓⴹⴼⵉⵕ ⵙ ⵓⵎⵕⵚⵓⵎ ⵓⵟⵟⵓⵏ 2.18.622 ⴳ ⵓⵙⴰⴽⵓⴷ ⵏ 10 ⴰⵜⴼⴼⴰⵙ ⵉⵣⵡⴰⵔⵏ 1440 (17 ⵉⵏⵏⴰⵢⵔ 2019) ⵙ ⵓⵙⴽⴰⵔ ⵙ ⵓⵣⵔⴼ ⵓⵟⵟⵓⵏ 98. 15 ⵉⵇⵇⵏⵏ ⵖⵔ ⵓⵏⴳⵔⴰⵡ ⵏ ⵓⵙⴼⵍⵙ ⵓⵛⵛⵉⵍ ⴰⴷⵙⵍⴰⵏ ⵅⴼ ⵜⵎⴰⴹⵓⵏⵜ ⴷ ⵓⵣⵔⴼ ⵓⵟⵟⵓⵏ 99.15 ⵏ ⵓⵙⵙⴽⴰⵔ ⵏ ⵓⵏⴳⵔⴰⵡ ⵜⵎⵙⴰⴷⵓⵔⵉⵏ, ⵥⵍⵉⵏⵉⵏ ⵙ ⵉⵎⵣⵣⵓⵍⴰⵏⵏ ⴷ ⵉⵎⵙⵡⵓⵔⵉⵢⵏ ⵉⵙⵉⵎⴰⵏⵏ ⴷ ⵉⴷ ⵡⴰⵔ ⵜⵉⵖⵔⴰⴷ ⵍⵍⵉ ⵜⵜⴳⴳⴰⵏⵉⵏ ⴽⵔⴰ ⵏ ⵜⵡⵓⵔⵉ ⵉⵥⵍⵉⵏ.
- ⴰⵙⵏⴼⴰⵔ ⴰⵎⵕⵚⵓⵎ ⵓⵟⵟⵓⵏ 2.23.562 ⵉⵇⵇⵏⵏ ⵖⵔ ⵓⵣⵔⴼ ⵓⵟⵟⵓⵏ 98.15 ⵉⵇⵇⵏⵏ ⵙ ⵓⵏⴳⵔⴰⵡ ⵏ ⵓⵙⴼⵍⵙ ⵓⵛⵛⵉⵍ ⴰⴷⵙⵍⴰⵏ ⵅⴼ ⵜⵎⴰⴹⵓⵏⵜ ⴷ ⵓⵣⵔⴼ ⵓⵟⵟⵓⵏ 99.15 ⵏ ⵜⵉⴳⴳⵉ ⵏ ⵓⵏⴳⵔⴰⵡ ⵉ ⵜⵙⴰⴷⵓⵔⵉⵏ, ⵥⵍⵉⵏⵉⵏ ⵙ ⴽⵔⴰ ⵏ ⵉⵎⵣⵣⵓⵍⴰⵏⵏ ⴷ ⵉⵎⵙⵡⵓⵔⵉⵢⵏ ⵉⵙⵉⵎⴰⵏⵏ ⴷ ⵉⴷ ⵡⴰⵔ ⵜⵉⵖⵔⴰⴷ ⵍⵍⵉ ⵜⵜⴳⴳⴰⵏⵉⵏ ⴽⵔⴰ ⵏ ⵜⵡⵓⵔⵉ ⵉⵥⵍⵉⵏ ⴳ ⵎⵉⵏ ⵉⵇⵇⵏⵏ ⵙ ⵡⵉⵏⵏⴰ ⵉⵜⵜⵓⵙⵎⴰⴳⵍⵏ ⵙ ⵜⵡⵓⵔⵉⵡⵉⵏ ⵏ ⵓⵙⴳⴷ.
ⵉⵔⴳⵍ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵉⵡⵓⵔⵉⵡⵉⵏ ⵏⵏⵙ ⵙ ⵓⵎⵔⴰⵔⴰ ⵏ ⵡⴰⵡⴰⵍ ⴷ ⵓⵙⵖⵣⵏ ⵅⴼ ⵜⵙⵓⵎⵔⵉⵏ ⵏ ⵓⵙⵎⵎⴰⵍ ⴳ ⵉⵎⵓⵔⵏ ⴰⵜⵜⵓⵢⵏⵉⵏ ⵙ ⵎⵉⵏ ⵉⵎⵙⴰⵙⴰⵏ ⴰⴽⴷ ⵉⵎⵉⵔ ⵡⵉⵙ 92 ⴳ ⵓⴷⵓⵙⵜⵓⵔ.
- ⴳ ⵜⵎⴰⵡⴰⵙⵜ ⵏ ⵓⵙⵎⵓⵜⵜⴳ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵓⵥⴽⴰⵡ ⴷ ⵜⵣⴷⵓⵖⵜ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ, ⵉⵜⵜⵓⵙⵎⵎⴰⵍ:
- ⵎⴰⵙⵙ ⴰⵎⵉⵏ ⵉⴷⵉⵔⵉⵙ ⴱⵍⵇⴰⵙⵎⵉ, ⴷ ⴰⵏⵎⵀⴰⵍ ⵉ ⵜⵙⵏⵓⵔⴰⵢⵜ ⵜⴰⵖⵔⵍⴰⵏⵜ ⵏ ⵎⵕⵕⴰⴽⵛ;
- ⴳ ⵜⵎⴰⵡⴰⵙⵜ ⵏ ⵓⵙⵍⵎⴷ ⴰⵏⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⴼⵍⵓⵍ, ⵉⵜⵜⵓⵙⵎⵎⴰⵍ:
- ⵎⴰⵙⵙ ⵄⴱⴷⵍⵍⴰⵀ ⵓⵍⵎⵄⵟⵉ, ⴷ ⴰⵙⵏⴱⴷⴰⴷ ⵉ ⵜⵖⵉⵡⴰⵏⵜ ⵏ ⵜⵙⵏⵓⵊⵊⵉⵜ ⴷ ⵜⵙⴰⵙⴼⴰⵔⵜ ⴳ ⵟⴰⵏⵊⴰ;
- ⵎⴰⵙⵙ ⵎⵓⵃⵎⵎⴰⴷ ⴷⴷⵉⵎⵓⵏⵉ, ⴷ ⴰⵏⵎⵀⴰⵍ ⵉ ⵜⵉⵏⵎⵍ ⵜⴰⵏⴼⵍⵍⴰⵜ ⵏ ⵜⵜⵉⴽⵏⵓⵍⵓⵊⵉⵜ ⴳ ⵓⴳⴰⴷⵉⵔ;
- ⴳ ⵜⵎⴰⵡⴰⵙⵜ ⵏ ⵜⵄⵓⵔⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ - ⵉⴳⵔ ⵏ ⵜⴷⵍⵙⴰ, ⵉⵜⵜⵓⵙⵎⵎⴰⵍ:
- ⵎⴰⵙⵙ ⵍⵎⵀⴷⵉ ⵣⵣⵡⴰⵇ, ⴷ ⴰⵏⵎⵀⴰⵍ ⵉ ⵓⵙⵉⵏⴰⴳ ⴰⵏⴰⵎⵓⵔ ⵏ ⵜⵥⵓⵕⵉⵡⵉⵏ ⴼⵓⵍⴽⵉⵏⵉⵏ.
