ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵡⴰⵙ 29 ⵖⵓⵛⵜ 2024
ⵉⵜⵜⴰⵡⵙⴽⴰⵔ ⴰⵙⵙ ⵏ ⵓⴽⵡⴰⵙ 24 ⵚⴰⴼⴰⵕ1446 ⵉⵎⵙⴰⵙⴰⵏ ⴰⴽⴷ 29 ⵖⵓⵛⵜ 2024 ⴰⵙⵇⵇⵉⵎ ⵏ ⵜⵏⴱⴰⴹⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⵉⵥⵍⵉ ⵓⴳⵔⴰⵡ ⴰⴷ ⵙ ⵓⵎⴹⴰⴽⴰⵕ ⵅⴼ ⵜⵓⴳⵜ ⵏ ⵉⵙⵏⵜⴰⵢ ⵏ ⵉⴹⵕⵉⵚⵏ ⵓⵙⵍⵉⴳⵏⵏ ⴷ ⵓⵎⴹⴰⴽⴰⵕ ⵅⴼ ⵉⵙⵓⵎⵓⵔⵏ ⵏ ⵓⵙⵎⴰⵍ ⴳ ⵜⴼⵙⵏⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵙ ⵓⵎⵙⴰⵙⴰ ⴰⴽⴷ ⵓⵎⴰⴳⵔⴰⴷ ⵡⵉⵙ 92 ⵏ ⵓⴷⵓⵙⵜⵓⵔ.
ⴳ ⵜⵣⵡⵓⵔⵉ , ⵉⵙⴽⵯⵜⵉ ⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵙⵔⵖⵓⴷⵏ ⵏⵜⵜⴰⵏ ⴷ ⵉⵎⴰⵡⵙⴰⵙⴰⵏ ⵉ ⴱⴰⴱ ⵏ ⵡⴰⴷⴷⵓⵔ ⵓⴳⵍⵍⵉⴷ ⴰⴷ ⵜ ⵉⵏⵚⵕ ⵔⴱⴱⵉ ⵙ ⵜⵎⵍⴷⴰ ⵏ ⵓⵙⴽⵯⵜⵉ ⵏ ⵜⴳⵔⴰⵡⵍⴰ ⵏ ⵓⴳⵍⵍⵉⴷ ⴷ ⵜⴼⵓⴳⵍⴰ ⵏ ⵉⵄⵔⵔⵉⵎⵏ, ⵉⵜⵜⵔ ⵉ ⴱⴰⴱ ⵏ ⵉⴳⵏⵡⴰⵏ ⴰⴷ ⵜⵓⵔⵉ ⵜⵎⵢⵓⵔⵜ ⴰⴷ ⵅⴼ ⴱⴰⴱ ⵏ ⵉⴳⵏⵡⴰⵏ ⴷ ⵓⴳⴷⵓⴷ ⴰⵎⵖⵔⵉⴱⵉ ⵙ ⵓⵙⵖⵓⴷⵓ ⴷ ⵓⵙⴱⵓⵖⵍⵓ.
ⵉⵙⴽⵯⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵉⵎⵏⵉⴷⵏ ⵉⴳⵍⴷⴰⵏ ⵢⴰⵜⵜⵓⵢⵏ ⵍⵍⵉ ⴷ ⵉⴷⴷⴰⵏ ⴳ ⵉⵏⴰⵡ ⵏ ⵜⴼⵓⴳⵍⴰ ⵏ ⵍⵄⵕⵛ ⴰⵎⴳⴳⴰⵔⵓ ⵍⵍⵉ ⵉⴳⴰⵏ ⵜⴰⵖⵔⴰⵙⵜ ⵏ ⵜⵡⵓⵔⵉ ⵜⵓⵏⴱⵉⴹⵜ ⵖ ⵖⴰⵢⵍⵍⵉ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵜⵎⵓⴽⵔⵉⵙⵜ ⵏ ⵡⴰⵎⴰⵏ ⵍⵍⵉ ⵉⴳⴰⵏ ⵢⴰⵜ ⵜⵖⴰⵡⵙⴰ ⵜⴰⵙⵜⵕⴰⵜⵉⵊⵉⵜ, ⴰⵢⵍⵍⵉ ⵔⴰⴷ ⵉⴱⵣⵣⵉⵣ ⵅⴼ ⵜⵏⴱⴰⴹⵜ ⴰⴷ ⵜⵙⵏⴼⵍ ⵜⴰⵡⵓⵔⵉ ⴷ ⵉⵎⴰⵙⵙⵏ ⵏ ⵜⵙⵔⵜⵉⵜ ⵜⴰⵏⴰⵎⵓⵔⵜ ⵏ ⵡⴰⵎⴰⵏ ⴷ ⵓⵙⵖⴰⵡⵍ ⴷ ⵓⵙⴽⴰⵔⵏ ⵜⵓⴳⵜ ⵏ ⵉⵙⵏⴼⴰⵕⵏ ⵙⵔⵙ ⵉⵣⴷⵉⵏ.
ⵉⵏⵏⴰ ⴰⵡⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰ ⵙ ⴳⴰⵏ ⵉⵎⵏⵉⴷⵏ ⵉⴳⵍⴷⴰⵏⵏ ⵢⴰⵏ ⵓⴱⵔⵉⴷ ⵉⴼⴰⵡⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⵓⵣⵣⵔ ⵏ ⵉⵚⴼⴰⵕⵏ ⵏ ⵓⵙⴳⴷⴷ ⴳ ⵜⵓⴳⵜ ⵏ ⵉⴳⵔⴰⵏ ⵙ ⵜⵖⵔⴰⵙⵜ ⵏ ⵓⵖⴰⵡⵍ ⴷ ⵓⵙⴱⵓⵖⵍⵓ ⵍⵍⵉ ⵙ ⴷ ⵉⵇⵇⴰⵏ, ⴷ ⵓⵙⵙⵉⴳⵯⵣ ⵏ ⵓⵖⴰⵡⴰⵙ ⵓⵏⴱⵉⴹ ⴰⴷ ⵉⴳ ⵜⵉⴷ, ⵖⵉⴽⴰⵏⵏ ⴰⴷ ⴼ ⵔⴰⴷ ⵜⵎⵎⴰⵖ ⵜⵏⴱⴰⴹⵜ ⴰⴷ ⵜⵙⵡⵓⵔⵉ ⵙ ⵜⴰⵏⵏⴰⵢⵉⵏ ⵉⵥⵍⵉⵏ ⵙ ⵓⵙⵍⴳⵏ ⴰⵥⵕⴼⴰⵏ 2025 ⵍⵍⵉ ⵏⵏ ⵉⵡⴹⵏ ⵉ ⵉⴳⵔⴰⵏ ⵉⵎⴰⵡⵙⴰⵙⵏ ⴳ ⵓⵎⵣⵡⴰⵔⵓ ⵏ ⵡⴰⵢⵢⵓⵔ ⴰⴷ.
ⵙ ⵓⵎⵣⴰⵣⴰⵍ ⵏ ⵓⵙⴷⵓⴷ ⵏ ⵉⵏⴱⴷⴰⴷⵏ ⵏ ⵡⴰⵏⴽ ⴰⵏⴰⵎⵓⵏ ⵖⵉⴽⵍⵍⵉ ⵙ ⵉⵔⴰ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵔⴱⴱⵉ, ⵔⴰⴷ ⵜⵙⵡⵓⵔⵉ ⵜⵏⴱⴰⴹⵜ ⵖ ⵓⵣⴳⵏ ⵡⵉⵙ ⵙⵉⵏ ⵏ ⵜⵙⵓⵜⵍⵜ ⴰⴷ ⵜⵎⵉⵎⵔⵉⵜ ⴳ ⵓⵙⵔⵓⵙ ⵏ ⵜⴷⵉⵏⴰⵎⵉⵜ ⵏ ⵓⵙⵙⴰⵔⵓ ⴷ ⵓⵙⴽⴰⵔ ⵏ ⵜⵡⵓⵔⵉⵡⵉⵏ ⵙ ⵜⵖⴰⵔⴰⵙⵜ ⵏ ⵉⵙⵙⴰⵔⵓⵜⵏ ⵖ ⵜⵍⵍⴰ ⵜⴳⵎⵉ ⵜⴰⴷⴰⵎⵙⴰⵏⵔ ⵜⴰⵙⵓⵍⴰⵏⵜ ⵃⵎⴰ ⴰⴷ ⵢⵉⵍⵉ ⵓⵎⵙⴰⵙⴰ ⴰⵙⵜⵕⴰⵜⵉⵊⵉ ⵖ ⵉⵍⵍⴰ ⵉⵥⵉⵕ ⴰⵏⴰⵎⵓⵏ ⴷ ⵓⴷⴰⵎⵙⴰⵏ ⵖ ⵜⴱⵔⵉⴷⵜ ⵏ ⵜⴳⵎⵉ ⵍⵍⵉ ⵉⵔⵙⵔⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⵖ ⵜⴳⵉⵔⴰ ⵏ ⵜⴳⵓⵔⵉ ⵏⵏⵙ, ⵉⵙⴽⵜⵉ ⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵉⵏⴰⵥⴰⵕⵏ ⵎⵇⵇⵓⵔⵏ ⵏ ⵓⴽⵛⵛⵓⵎ ⴰⴷ ⴰⵙⵔⵜⴰⵏ ⵍⵍⵉⵖ ⴷ ⵉⵇⵇⴰⵏ ⴰⴷ ⵜⵉⴳⵓⵜ ⵜⵡⵓⵔⵉ ⴳ ⵓⵙⵡⵓⴷⴷⵓ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵍⵍⵉ ⵔⴰⴷ ⵜⴳ ⵜⵏⴱⴰⴹⵜ ⴷ ⵓⵙⴷⵓⵙ ⵏ ⵏ ⵓⵙⵡⵓⴷⴷⵓ ⵏ ⵉⵙⵏⴼⴰⵕⵏ ⵍⵍⵉ ⵙ ⴷ ⵉⵇⵇⴰⵏ ⴰⴷ ⵜⵜⵓⵙⴽⵉⵔⵏ ⵃⵎⴰ ⴰⴷ ⵜⴳ ⵜⵏⴱⴰⴹⵜ ⵜⴰⵎⴰⵙⴰⵢⵜ ⵏⵏⵙ ⵍⵍⵉ ⵙ ⵜⵜ ⵢⵓⵚⵚⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵉⵏⵚⵕ ⵔⴱⴱⵉ ⴷ ⵜⵉⵔⵉⵜ ⵏ ⵉⵎⵖⵔⵉⴱⵉⵏ ⴰⴽⴽⵯ.
- ⴹⴰⵕⴰⵜ ⵎⴰⵢⴰⴷ, ⵉⵎⴹⴰⴽⴰⵕ ⵉⵙⵖⵥⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⵙⵍⴳⵏ ⵓⵟⵟⵓⵏ 03.23 ⵉⵙⵏⴼⵍ ⴷ ⵓⵙⵖⵓⴷⵓ ⵏ ⵓⵙⵍⴳⵏ 22.01 ⵉⵥⵍⵉⵏ ⵙ ⵓⵙⵍⴳⵏ ⴰⵏⴱⴰⴽⴰⴹ, ⵍⵍⵉⵖ ⵓⵙⵉⵏ ⵙ ⵜⴰⵏⵏⴰⵢⵉⵏ ⴼⵍⵍⴰⵙ ⵉⵜⵜⴰⵡⵏⵏⴰⵏ, ⵉⵃⵢⵉⵍ ⵜ ⵉⴷ ⵎⴰⵙⵙ ⵄⴰⴱⴷⵍⵍⴰⵜⵉⴼ ⵡⴰⵀⴱⵉ, ⴰⵎⴰⵡⵙⴰⵙ ⵏ ⵜⵣⵔⴼⵜ.
- ⴹⴰⵕⴰⵜ ⵎⴰⵢⴰⵏⵏ, ⵉⵎⴹⴰⴽⴰⵕ ⵉⵙⵖⵥⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⵎⵕⵙⵓⵎ ⵓⵟⵟⵓⵏ 2.24.656 ⵉⵙⵏⴼⵍⵏ ⴰⵎⵕⵙⵓⵎ ⵓⵟⵟⵓⵏ 2.09.684 ⵍⵍⵉ ⴷ ⵉⴼⴼⴰⵖⵏ ⵖ 30 ⵕⴰⴱⵉⵄ ⴰⵎⵣⵡⴰⵔⵓ 1431 ⵉⵎⵙⴰⵙⴰⵏ ⴷ 17 ⵎⴰⵕⵚ 2010 ⵉⵥⵍⵉⵏ ⵙ ⵓⵙⴽⴰⵔ ⵏ ⵢⴰⵏ ⵓⵙⵔⵓⵙ ⵉⵍⴻⵍⵍⵉ ⵏ ⵓⵙⴰⴼⵓⴹ ⵏ ⵍⴱⵟⵉⵡⴰ, ⵉⵃⵢⵉⵍ ⵜ ⵉⴷ ⵎⴰⵙⵙ ⵕⵉⵢⴰⴹ ⵎⵣⵓⵔ, ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ.
- ⴰⵢⵍⵍⵉ ⵉⵥⵍⵉⵏ ⵙ ⵓⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.24.657 ⵉⵙⵏⴼⵍⵏ ⴰⵎⵕⵙⵓⵎ ⵓⵟⵟⵓⵏ 2.10.337 ⵍⵍⵉ ⴷ ⵉⴼⴼⴰⵖⵏ ⵖ 16 ⴳ ⵊⵓⵎⴰⴷⴰ ⴰⵎⵣⵡⴰⵔⵓ 1432 ⵉⵎⵙⴰⵙⴰⵏ ⴷ 20 ⵉⴱⵔⵉⵔ 2011 ⵉⵥⵙⵍⵉⵏ ⵙ ⵓⵙⴽⴰⵔ ⵏ ⵓⴷⵖⴰⵔ ⵉⵍⴻⵍⵍⵉ ⵏ ⵓⵚⴰⴼⵓⴹ ‘ⵟⴰⵏⵊⴰ ⵓⵟⵓ ⵎⵓⵜⵉⴼ ⵙⵉⵜⵉ’, ⵔⴰⴷ ⵉⵣⵔⵉ ⵖ ⵢⴰⵏ ⵓⴳⵔⴰⵡ ⵓⵏⴱⵉⴹ ⴷ ⵉⴷⴷⴰⵏ.
ⵉⵙⴳⴳⵯⵔⴰ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⴰⵡⵓⵔⵉ ⵏⵏⵙ ⵙ ⵓⵎⵔⴰⵔⴰ ⵏ ⵡⴰⵡⴰⵍ ⴷ ⵓⵎⵙⴰⵙⴰ ⵅⴼ ⵉⵙⵓⵎⵓⵔⵏ ⵏ ⵓⵙⵎⴰⵍ ⴳ ⵜⴼⵙⵏⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵙ ⵓⵎⵙⴰⵙⴰ ⴰⴽⴷ ⵓⵎⴰⴳⵔⴰⴷ ⵡⵉⵙ92 ⴳ ⵓⴷⵓⵙⵜⵓⵔ.
- ⴳ ⵜⵎⴰⵡⴰⵙⵜ ⵏ ⵓⵇⵡⵡⵓⵎ ⴷ ⵡⴰⵎⴰⵏ ⵉⵜⵜⵓⵙⵏⵎⴰⵍⴰ :
- ⵎⴰⵙⵙ ⵄⴰⴱⴷ ⵍⴼⵜⵜⴰⵃ ⵚⴰⵃⴱⵉ, ⴰⵏⴼⵍⵓⵙ ⴰⵎⴰⵜⴰⵢ.
- ⴳ ⵜⵎⴰⵡⴰⵙⵜ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⴼⵍⵓⵍ, ⵉⵜⵜⵓⵙⵏⵎⴰⵍⴰ :
- ⵎⴰⵙⵙ ⵕⴰⵛⵉⴷ ⴰⵎⵍⵉⵍ, ⴰⵏⵎⵀⴰⵍ ⵏ ⵜⵉⵏⵎⵍ ⵜⴰⵏⴰⵎⵓⵔⵜ ⵏ ⵜⵙⴱⴱⴰⴱⵜ ⴷ ⵓⵙⵡⵓⴷⴷⵓ ⴳ ⵙⵟⵟⴰⵟ ;
- ⴳ ⵜⵎⴰⵡⴰⵙⵜ ⵜⴰⵎⵉⵔⵉⵜ ⵖⵓⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵙⴰⵔⵓ ⴷ ⵓⵏⵎⴰⴳⴰⵔ ⴷ ⵓⵙⵓⵜⴳ ⵏ ⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵉⵜⵜⵓⵙⵏⵎⴰⵍⴰ :
- ⵎⴰⵙⵙ ⵎⵓⵃⵎⵎⴰⴷ ⵄⵙⵙⵓⵙ, ⴰⵏⵎⵀⴰⵍ ⵏ ⵡⴰⵎⵎⴰⵙ ⴰⵙⴳⴰⵡⴰⵏ ⵏ ⵓⵙⵙⴰⵔⵓ ⵏ ⵜⵙⴳⴰ ⵏ ⵓⴳⵍⵎⵉⵎ-ⵡⴰⴷ ⵏⵓⵏ.
