ⵉⴳⴳⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵎⴹⴰⴽⴰⵕⵏ ⴷ ⵜⵏⵙⵙⵉⵅⴼⵜ ⵏ ⵍⴱⴰⵏⴽ ⵏ ⵓⵕⵓⴱⴱⴰ ⵏ ⵡⵍⵍⴰⵙ ⵏ ⵜⵓⵚⴽⴰ ⴷ ⵜⴳⵎⵉ
ⵉⴳⴳⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⴽⵡⴰⵙ 05 ⴷⵓⵊⴰⵏⴱⵉⵔ2024 ⴳ ⵕⵕⴱⴰⵟ, ⵉⵎⴹⴰⴽⴰⵕⵏ ⴷ ⵜⵏⵙⵙⵉⵅⴼⵜ ⵏ ⵍⴱⴰⵏⴽ ⵏ ⵓⵕⵓⴱⴱⴰ ⵏ ⵡⵍⵍⴰⵙ ⵏⵜⵓⵚⴽⴰ ⴷ ⵜⴳⵎⵉ ⵎⴰⵙⵙⴰ ⵓⴷⵉⵍ ⵕⵏⵓ ⴱⴰⵙⵙⵓ Odile Renaud-Basso, ⵜⵃⴰⴹⵕ ⴷⵉⴷⵙⵏ ⴰⵡⴷ ⵜⵎⵡⴰⵙⴰⵙⵜ ⵏ ⵜⴷⴰⵎⵙⴰ ⴷ ⵜⵥⵕⴼⵜ, ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ. ⴳⴰⵏ ⴳ ⵉⵎⴹⴰⴽⴰⵕⵏ ⴰⴷ ⵢⴰⵜ ⵜⵉⵣⵉ ⵍⵍⵉⵖ ⵙⴰⵡⵍⵏ ⵅⴼ ⵉⵚⵏⴼⴰⵕⵏ ⵍⵍ ⵜⴳⴳⴰ ⵜⴳⵍⴷⵉⵜ ⵙ ⵜⵏⵏⵓⴱⴹⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵔⴱⴱⵉ.
ⵖⵉⵍⵍⴰ ⵉⵍⵍⴰ ⵓⵙⵎⵖⵔ ⵏ ⵓⵙⵜⴰⵢ ⵏ ⵍⵎⵖⵔⵉⴱ ⴰⴷ ⵉⵙⵏⵎⴰⵍⴰ ⵜⴰⵙⵓⵜⵍⵜ ⵜⵉⵙ ⵙⵎⵎⵓⵙⵜ ⵏ ⵓⵙⴳⵔⴰⵡ ⵏ ⵉⴼⵕⵉⵇⵢⴰ ⵏ ⵓⵙⵙⴰⵔⵓ ⵍⵍⵉ ⵉⵜⵜⵓⵙⴽⴰⵔⵏ ⴷⴰⵡ ⵏ ⵓⴼⵔⴰⴳ ⴰⴳⵍⴷⴰⵏ ⵢⴰⵜⵜⵓⵢⵏ ⵣⵖ 4 ⴰⵔ 6 ⴷⵓⵊⴰⵏⴱⵉⵔ ⴰⴷ ⴳ ⵕⵕⴱⴰⵟ, ⵙ ⵜⵔⴰⵡⴰⵜ ⵏ ⵉⵎⴰⴷⵔⴰⵡⵏ ⵉⵎⴰⵜⴰⵢⵏ ⵏ ⵓⵙⵔⵅⵓ ⴷ ⵓⵙⵡⵓⴷⴷⵓ ⵏ ⵉⵚⵏⴼⴰⵕⵏ ⵍⵍⵉ ⵔⴰⴷ ⵢⴰⵡⵙ ⴳ ⵜⴳⵎⵉ ⵏ ⵜⵎⵏⵥⴰⵡⵜ ⵉⴼⵕⵉⵇⵢⴰ.
ⵉⵙⵎⵖⵕ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵜⴷⵉⵏⴰⵎⵉⵜ ⵏ ⵍⴱⴰⵏⴽ ⵏ ⵓⵕⵓⴱⴱⴰ ⵏ ⵡⴰⵍⵍⴰⵙ ⵏ ⵜⵓⵚⴽⴰ ⴷ ⵜⴳⵎⵉ ⴳ ⵓⴹⴼⵉⵕ ⵏ ⵉⵚⵏⴼⴰⵕⵏ ⵏ ⵜⵓⵚⴽⵉⵡⵉⵏ ⵜⵉⵏⴰⴹⴰⵡⵉⵏ ⴷ ⵜⵡⵉⵙⵉ ⵏ ⵓⵖⴰⵡⵍ ⵏ ⵓⵎⵓⵜⵜⵉ ⴰⵎⵥⴹⴰⵕ ⴳ ⵜⵎⴰⵉⵔⵜ ⵏⵏⵖ, ⵙ ⵓⵎⵙⴰⵙⴰ ⵏ ⵉⵥⵉⵕ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵃⴼⴹ ⵔⴱⴱⵉ. ⵉⵙⴷⴷⵉⴷ ⵙ ⵡⴰⵜⵉⴳ ⵏ ⵓⵙⵔⵓⵙ ⵏ ⵜⵙⵕⴰⵜⵉⵊⵉⵜ ⵜⴰⵎⴰⵢⵏⵓⵜ ⵍⵍⵉ ⵉⵙⵎⵓⵏ ⵍⵎⵖⵔⵉⴱ ⴷ ⵍⴱⴰⵏⴽ ⵏ ⵓⵕⵓⴱⴱⴰ 2024-2029 ⵃⵎⴰ ⴰⴷ ⵢⵉⵍⵉ ⵓⴹⴼⵉⵕ ⵏ ⵉⵚⵏⴼⴰⵕⵏ ⵏ ⵜⴷⴰⵎⵙⴰ ⵜⴰⵣⴳⵣⴰⵡⵜ ⴳ ⵜⴳⵍⴷⵉⵜ, ⴷ ⵜⵡⵉⵙⵉ ⵏ ⵓⵎⵃⵉⵣⵡⴰⵔ ⵏ ⵉⴳⵔ ⵉⵎⵥⵍⵉⵢ ⴷ ⵓⵙⴷⵓⵙ ⵓⵣⴷⴷⵓⵢ ⴰⵏⴰⵎⵓⵏ ⴷ ⵓⴽⴰⵔⴰⵢ ⵏ ⵉⵙⵏⵓⵃⵢⵓⵜⵏ ⵉⵙⴳⴰⵡⴰⵏⵏ.
ⴳ ⵎⵏⵉⴷ ⵏⵏⵙ, ⵜⵙⴷⴷⵉⴷ ⵎⴰⵙⵙⴰ ⵓⴷⵉⵍ ⵕⵏⵓ ⴱⴰⵙⵙⵓ Odile Renaud-Basso, ⵎⴰ ⵙ ⵉⵍⵍⴰ ⴷⴰⵔⴽ ⵍⴱⴰⵏⴽ ⵏ ⵓⵕⵓⴱⴱⴰ ⵏ ⵡⵍⵍⴰⵙ ⵏⵜⵓⵚⴽⴰ ⴷ ⵜⴳⵎⵉ ⵜⵓⴳⵜ ⵉⵙⵙⴰⵔⵓⵜⵏ ⵉⵙⵜⴰⵡⴳⵎⵎⴰⵏ ⴳ ⵍⵎⵖⵔⵉⴱ ⵎⵓ ⵉⵣⵔⵉ ⵡⴰⵜⵉⴳ ⵏⵏⵙ 400 ⵎⵍⵢⵓⵏ ⵢⵓⵕⵓ ⴳ ⵓⵙⴳⴳⵯⴰⵙ ⴰⴷ ⵉⴱⴹⴰⵏ ⵅⴼ ⵉⴳⵔⴰⵏ ⵓⵎⵓⵜⵜⵉ ⴰⵎⵥⴹⴰⵕ ⴷ ⵜⴰⵔⴰⵡⵙⴰⵏⵜ ⵏ ⵓⴽⴰⵕⴱⵓⵏ ⴷ ⵓⵙⵉⴷⴼ ⵏ ⵜⵎⵖⴰⵔⵜ ⴷ ⵓⵙⵎⵓⵟⵟⵏ ⵏ ⵜⴷⴰⵎⵙⴰ, ⵜⵏⵏⴰ ⴰⵡⴷ ⵎⴰ ⵙ ⴷ ⵜⵎⵣⵡⵓⵔⴰ ⵜⵎⴰⵜⴰⵢⵉⵏ ⵍⵍⵉ ⴼ ⵉⵙⵡⵓⵔⵉ ⵍⴱⴰⵏⴽ ⵏ ⵓⵕⵓⴱⴱⴰ ⵎⵙⴰⵙⴰⵏⵜ ⴷ ⵜⵉⵎⵣⵡⵓⵔⴰ ⵏ ⵜⴳⵎⵉ ⵍⵍⵉ ⵅⴼ ⵉⵙⵡⵓⵔⵉ ⵜⴳⵍⴷⵉⵜ.
ⵉⵎⴷⴰⴽⴰⵕⵏ ⵉⵎⵙⵜⴳⴳⴰⵔⵏ ⵙ ⵙⵉⵏ ⵅⴼ ⵅⴼ ⵡⴰⵏⴰⵡⵏ ⵏ ⵜⵉⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵏⴳⵔ ⵍⵎⵖⵔⵉⴱ ⴷ ⵍⴱⴰⵏⴽ ⵏ ⵉⵕⵓⴱⴱⴰ ⵏ ⵡⵍⵍⴰⵙ ⵏ ⵜⵓⵚⴽⴰ ⴷ ⵜⴳⵎⵉ ⵍⵍⵉⵖ ⵜⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⵢⴰⵏ ⵉⴳⵔ ⵏ ⵜⵡⵓⵔⵉⵡⵉⵏ ⵏ ⵍⴱⴰⵏⴽ ⴳ ⵓⵙⴳⴳⵯⴰⵙ ⵏ 2012, ⴹⵕⴰⵜ ⵎⴰⵢⴰⵏⵏ ⵜⵙⵢⴰⴼⴰ ⴳ ⵜⵓⴳⵜ ⵏ ⵉⵙⵙⴰⵔⵓⵜⵏ ⵏ ⵎⴰ ⵉⵜⵜⴳⴰⵏ 4.74 ⵏ ⵎⵍⵢⴰⵕ ⵏ ⵓⵕⵓ, 77% ⴳⵉⵙ ⵜⵜⴰⵡⴼⴽⴰⵏ ⵉ ⵓⵙⴷⵓⵙ ⵏ ⵉⴳⵔ ⵉⵎⵥⵍⵉⵢ.
