ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵙⵙⵉⵅⴼ ⵜⴰⵙⵎⵓⵏⵉ ⵏ ⵜⵡⵓⵔⵉ ⵏ ⵓⵙⵙⵉⴷⵔ ⵏ ⵢⵉⴳⵔ ⵏ ⵜⵎⴰⵍⵍⴰⵢⵜ ⴷ ⵉⵙⵎⵓⵜⵜⵓⴳⵏ ⵉⵜⵜⵓⴳⴰⵏ ⵉ ⵓⵙⵏⵓⴱⴳ ⵏ ⵢⵉⵎⵉⵔ ⵏ ⵜⵎⴰⵍⵍⴰⵢⵜ
ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵙⵙ ⵏ ⵓⴽⵡⴰⵙ 19 ⵎⴰⵢⵢⵓ 2022, ⵜⴰⵙⵎⵓⵏⵉ ⵉⵥⵍⵉⵏ ⵉ ⵜⵓⴱⴷⴷⴰ ⵖⴼ ⵜⵎⴳⴳⵉⵢⵉⵏ ⵉⵜⵜⵓⴳⴰⵏ ⵉ ⵓⵙⵙⵉⴷⵔ ⵏ ⵢⵉⴳⵔ ⵏ ⵜⵎⴰⵍⵍⴰⵢⵜ ⴹⴰⵕⵜ ⵙⵉⵏ ⵉⵙⴳⴳⵯⴰⵙⵏ ⵏ ⵜⴰⵙⵙⴰⵙⵜ ⵜⴰⴷⵓⵙⴰⵏⵜ ⵜⴰⵎⴰⴹⵍⴰⵏⵜ, ⵙ ⵓⵥⵍⴰⵢ ⵙ ⵓⵣⵎⵎⴻⵎ ⵏ ⴽⵔⴰ ⵏ ⵜⵎⴰⵜⴰⵔⵉⵏ ⵜⵓⵎⵏⵉⴳⵉⵏ ⵍⵍⵉ ⵉⵖⵉⵢⵏ ⴰⴷ ⵉⵜⵓⵙⵙⴰⵔⵓ ⵉ ⵓⵙⵏⵓⴱⴳ ⴰⵎⵓⴼⴰⵢ ⵏ ⵢⵉⵎⵉⵔ ⴰⵎⴰⵢⵏⵓ ⵏ ⵜⵎⴰⵍⵍⴰⵢⵜ, ⴰⵢⵍⵍⵉ ⵉⵣⵎⵔⵏ ⴰⴷ ⵢⵓⵎⵓ ⴳ ⵡⴰⵍⴰⵙ ⵏ ⵜⵙⵏⵉⵍⴰⵡⵜ ⵏ ⵜⵏⴽⵔⴰ ⵜⴰⵎⴰⵢⵏⵓⵜ ⵏ ⵢⵉⴳⵔ.
ⵉⵍⵍⴰ ⴳ ⵜⵙⵎⵓⵏⵉ ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ, ⵜⴰⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵓⵥⵕⴼ, ⴷ ⵎⴰⵙⵙⴰ ⴼⴰⵟⵉⵎ ⵣⵣⵀⵔⴰ ⵄⵎⵎⵓⵔ ⵜⴰⵎⴰⵡⵙⴰⵙⵜ ⵏ ⵜⵎⴰⵍⵍⴰⵢⵜ ⴷ ⵜⵏⵉⴹⵉ ⴷ ⵜⴷⴰⵎⵙⴰ ⵜⴰⵏⴰⵎⵓⵏⵜ ⴷⵜⵡⵉⵣⵉ, ⴷ ⵎⴰⵙⵙ ⵎⵚⵟⴰⴼⴰ ⴱⴰⵢⵜⵜⴰⵙ, ⴰⵎⵡⵙⴰⵙ ⴰⵎⴰⵔⵉ ⵖⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵉⵜⵜⵓⵙⵎⴰⴳⵍⵏ ⵙ ⵉⵎⵢⴰⵙⵙⴰⵜⵏ ⴰⴽⴷ ⵓⴱⵕⵍⴰⵎⴰⵏ, ⴰⵙⵙⵉⵡⵍ ⵙ ⵢⵉⵙⵎ ⵏ ⵜⵏⴱⴰⴹⵜ, ⴷ ⵎⴰⵙⵙ ⵄⴰⴷⵉⵍ ⵍⴼⴰⵇⵉⵔ ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⵙⵉⵔⴰ ⴰⵏⴰⵎⵓⵔ ⴰⵎⵖⵔⵉⴱⵉ ⵏ ⵜⵎⴰⵍⵍⴰⵢⵜ, ⴷ ⵎⴰⵙⵙ ⵄⵉⵎⴰⴷ ⴱⵔⵇⴰⴷ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵎⵙⵙⵓⵔⵜ ⵜⴰⵎⵖⵔⵉⴱⵉⵜ ⵏ ⵜⵎⵙⴷⴰⴳⵜ ⵏ ⵜⵎⴰⵍⵍⴰⵢⵜ.
ⵜⵙⵙⵏⴽⴷ ⴳ ⵜⵙⵎⵓⵏⵉ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵏ ⵜⵎⴰⵍⵍⴰⵢⵜ ⴷ ⵜⵏⵉⴹⵉ ⴷ ⵜⴷⴰⵎⵙⴰ ⵜⴰⵏⴰⵎⵓⵏⵜ ⴷ ⵜⵡⵉⵣⵉ ⵜⴰⵏⵏⴰⵢⵜ ⵏ ⵜⵎⴰⵡⴰⵙⵜ ⵃⵎⴰ ⴰⴷ ⴷ ⵜⵓⵖⵓⵍ ⵜⵉⵍⴰⵍⵜ ⵏ ⵜⵎⴰⵍⵍⴰⵢⵜ ⵙ ⵜⴳⴰⵎⴰ ⵏⵏⵙ ⴳ ⵎⴰ ⵏⵏ ⵓⵔ ⵢⴰⴳⴳⵓⴳⵏ ⴰⴽⴷ ⵓⵡⵜⵜⴰⵙ ⵏ ⵓⵣⵎⵎⴻⵎ ⵏ ⵓⴽⵛⵛⵓⵎ ⴰⵢⵢⵓⵔⴰⵏ ⵏ ⵉⵎⴰⵍⵍⴰⵢⵏ ⴳ ⵜⵉⴳⵉⵔⴰ ⵏ ⵓⵙⴳⴳⵯⴰⵙ ⵢⵓⴳⴷⴰⵏ ⵏⵖ ⵢⵓⴳⵔ ⴰⵢⵍⵍⵉ ⵉⵜⵜⵓⵣⵎⵎⴻⵎⵏ ⴷⴰⵜ ⵏ ⵜⴰⵙⵙⴰⵙⵜ.
ⵉⵎⴽⵉⵍⵍⵉ ⵜⵡⴰⵜⵙ ⵜⴰⵏⵏⴰⵢⵜ ⵏ ⵜⵎⴰⵡⴰⵙⵜ ⵜⵉⵔⵏⵉ ⵏ ⵡⵟⵟⵓⵏ ⵏ ⵉⵎⴰⵍⵍⴰⵢⵏ, ⴷ ⵡⵓⵖⵓⵍ ⵙⴳ ⵜⵉⵣⵡⵓⵔⵉ ⵏ ⵓⵙⴳⴳⵯⴰⵙ ⵏ 2023 ⵙ ⵓⵙⵡⵉⵔ ⵍⵍⵉ ⵉⵜⵜⵓⵣⵎⵎⴰⵎⵏ ⴰⵙⴳⴳⵯⴰⵙ ⵏ 2019, ⵍⵍⵉ ⵉⴳⴰⵏ ⴰⵙⴳⴳⵯⴰⵙ ⵓⵎⵏⵉⴳ ⴳ ⵎⴰ ⵉⵥⵍⵉⵏ ⵙ ⵉⵎⴰⵍⵍⴰⵢⵏ.
ⴳⵔ ⵉⵣⵔⵉⵔⵉⴳⵏ ⵉⵣⵓⵔⴰⵔⵏ ⵍⵍⵉ ⵖⴼ ⵜⵙⴽⵓⵜⵜⴰ ⵜⴰⵏⵏⴰⵢⵜ ⴰⴷ :
ⴰⵙⴼⵍⵙ ⵏ ⵡⵓⵟⵟⵓⵏ ⴰⴽⴽⵯ ⴰⵎⵇⵇⵔⴰⵏ ⵏ ⵉⵙⵖⵉⵏ ⵏ ⵉⵎⴰⵍⵍⴰⵢⵏ ⴷ ⵉⴷⴷⴰⵏ ⵙ ⵜⵎⴰⵣⵉⵔⵜ ⵏⵏⵖ ⴰⴽⴷ ⵜⵎⵙⵙⵓⵔⵉⵏ ⵏ ⵜⴰⵢⵍⴰⵍⵜ;
ⴰⵙⴱⵓⵖⵍⵓ ⵏ ⵓⵙⵙⵉⴷⵔ ⴰⵎⴰⵍⵍⴰⵢ ⴷ ⵜⵉⴳⴳⵉ ⵏ ⵉⵎⵣⵉⵣⵣⵍⵏ ⵉⴱⴰⵔⴰⵡⵏ ⵏ ⵓⵕⵡⵡⵊ ⴷ ⵜⵎⴷⵔⴰⵡⵉⵏ ⴰⴽⴷ ⵉⵎⵙⵙⵓⴷⵙⵏ ⵏ ⵉⵎⵓⴷⴷⵓⵜⵏ ⵉⵎⴹⵍⴰⵏⵏ ⴷ ⵜⴷⴽⴽⵯⴰⵏⵉⵏ ⵜⵉⵎⵓⵟⵟⵓⵏⵉⵏ;
ⴰⵙⵎⵙⴰⵙⴰ ⵏ ⵓⴼⵙⴰⵔ ⴰⵎⴰⵍⵍⴰⵢ ⴰⴽⴷ ⵜⵓⵜⵔⴰ, ⴷ ⵜⵙⵜⵔⴰⵜⵉⵊⵉⵜ ⵏ ⵓⵙⵙⵉⴷⵔ ⴰⵎⴰⵍⵍⴰⵢ ⵉⵥⵍⵉⵏ ⵉⵡⴰⵜⵙⵏ ⴰⵙⵙⵔⵇⴱ ⵏ ⵓⵙⵙⴰⵔⵓ ⴳ ⵜⵎⵙⵙⵏⵜⴰⵢ ⵜⵉⵎⵥⵥⵢⴰⵏⵉⵏ ⴷ ⵜⵏⴰⵎⵎⴰⵙⵉⵏ ⴳ ⵢⵉⴳⵔ ⵏ ⵓⵡⵔⴰⵔ ⴷ ⵓⵎⵓⵙⵙⵓ.
ⵉⵙⵙⵓⵔⵔⵙ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵇⵇⴰⵃ ⵉⵎⵏⴽⵛⴰⵎⵏ ⴰⴷ ⴽⴽⵔⵏ ⵙ ⵉⵙⵓⴳⴰⵎ ⵉⵙⴼⴳⴰⵏⵏ ⴳ ⵢⵉⴳⵔ ⵃⵎⴰ ⴰⴷ ⵢⵉⵍⵉ ⵓⴹⴼⴰⵕ ⵏ ⵓⵙⴰⵡⵔ ⵏ ⵓⵙⵙⵉⴷⵔ ⵏ ⵢⵉⴳⵔ ⵏ ⵜⵎⴰⵍⵍⴰⵢⵜ, ⵉⵖⵔ ⵉ ⵉⵎⴳⴳⴰⵢⵏ ⵎⵢⴰⵏⴰⵡⵏⵉⵏ ⵏ ⵢⵉⴳⵔ ⴰⴷ ⵙⵖⵔⵜⵏ ⵜⵓⵙⴽⴰⵡⵉⵏ ⵏ ⵉⵙⵏⵙⴰ ⵃⵎⴰ ⴰⴷ ⵜⵖⵓⴷⵓ ⵜⵉⵕⵡⵉ ⵏ ⵜⵡⵓⵔⵉⵡⵉⵏ ⵉⵜⵜⵓⴼⴽⴰⵏ ⵉ ⵉⵎⵣⴷⴰⵏ.
ⵉⵎⴽⵉⵍⵍⵉ ⵉⵖⵔⴰ ⵉ ⵎⴰⵕⵕⴰ ⵉⴳⵔⴰⵏ ⵓⵏⴱⵉⴹⵏ ⴰⴷ ⴹⴼⴰⵔⵏ ⵉⴳⵔ ⵏ ⵜⵎⴰⵍⵍⴰⵢⵜ ⴰⵔⴷ ⵉⵙⵙⵓⵖⵓⵍ ⵜⵓⵊⵉⵜ ⵏⵏⵙ ⵢⵓⵎⵓ ⴷ ⵜⵙⵏⵉⵍⴰⵡⵜ ⵏ ⵜⵏⴽⵔⴰ ⵔⴰⴷⵎⵙⴰⵏⵜ, ⵉⵙⴷⴷⵉⴷ ⵖⴼ ⵜⵉⵏⴷⵉ ⵏ ⵡⵓⵎⵎⵓⵢⴷ ⵖⴼ ⵓⵣⵓⴳⴳⵣ ⵏ ⵜⵎⴳⴳⵉⵢⵉⵏ ⵎⵢⴰⵏⴰⵡⵏⵉⵏ ⵍⵍⵉ ⵉⵔⴰⵏ ⴰⴷ ⵉⵙⵙⵉⴷⵔ ⵉⴳⵔ ⵢⴰⵡⴹ ⵉⵡⵜⵜⴰⵙⵏ ⵏⵏⵙ.
