ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵢⵓⴳⴳⴰ ⴰⵙⴳⵎⴹ ⵏ ⵓⵎⵙⴰⵙⴰ ⴰⵙⴰⵜⵉ ⵏ ⵡⴰⵏⵏⴰⵍ ⵏ ⵡⵓⵏⴳⵉⵙⵏ ⵏ ⵉⴽⵎⵎⵓⴹⵏ ⵏ ⵜⴰⴳⴰⵏⵉⵏ - ⵢⵓⵍⵢⵓⵙ 2022
- ⴰⵙⵙⵓⴹⵏ ⵏ 290 ⵎⵍⵢⵓⵏ ⴷⵔⵀⵎ ⵏ ⵓⵣⵓⴳⴳⵣ ⵏ ⵜⵓⵎⴰⵢⵉⵏ ⵎⵢⴰⵏⴰⵡⵏⵉⵏ
- ⴰⵏⵏⴰⵍ ⵏ ⵡⵉⵍⵍⵉ ⵉⵜⵜⵓⴹⵕⵕⴰⵏ ⵉ ⵡⴰⵍⴰⵙ ⵏ ⵓⵙⵖⵔⵜ ⴷ ⵜⴽⵏⵏⴰⵡⵜ ⵏ ⵜⴳⵯⵎⵎⴰ ⵏⵏⵙⵏ
- ⴰⵙⵙⵉⴼⵙⵓⵙ ⵏ ⵢⵉⴹⵉⵚⵏ ⵖⴼ ⵉⴽⵙⵙⴰⵏ ⵏ ⵡⵓⵍⵍⵉ ⴷ ⵜⵣⵉⵣⵡⴰ ⴳ ⵜⵎⵏⴰⴹⵉⵏ ⵜⵉⵎⵏⵜⴰⵢ
- ⵓⵥⵓ ⵏ ⵉⵙⴽⵯⵍⴰ ⴳ ⵜⴰⴳⴰⵏⵉⵏ ⴷ ⵓⵙⵖⵔⵜ ⵏ ⵡⴰⴷⴷⴰⴳⵏ ⵉⵜⵜⴰⵔⵓⵏ ⵉⵜⵜⵓⴹⵕⵕⴰⵏ
- ⴰⵣⵣⴳⵉⵔ ⵏ ⵉⵙⵖⵏⵓⵜⵏ ⵏ ⵜⴳⵎⵉ ⵜⴰⴷⵎⵙⴰⵏⵜ ⵉⵎⴷⴰⵏ ⴳ ⵜⵙⴳⴳⵯⵉⵏ ⵉⵜⵜⵓⴹⵕⵕⴰⵏ
- ⴰⵙⵖⵏⵓ ⵏ ⵢⵉⴼⴹ ⵏ ⵓⵙⵓⵍⴼ ⵏ ⵜⵡⵓⵔⵉ ⵉⵎⵎⵔⵏⴰⵏ ⵉ ⵜⵙⴳⴰ ⵏ ⵟⴰⵏⵊⴰ ⵜⵉⵜⵡⴰⵏ ⵍⵃⵓⵙⵉⵎⴰ ⴳ ⵓⵙⴰⵜⵉ ⵏ ⵓⵖⴰⵡⴰⵙ “ⴰⵡⵔⴰⵛ”
ⵙ ⵓⵙⵎⵀⵍ ⵏ ⵜⵙⵖⵍⴰⴼ ⵜⵉⴳⵍⴷⴰⵏⵉⵏ ⵜⵉⵎⴰⵜⵜⴰⵢⵉⵏ, ⵢⵓⴳⴳⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ; ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵙⵙ ⵏ ⵓⵙⵉⵎⵡⴰⵙ 22 ⵢⵓⵍⵢⵓⵣ 2022, ⵜⴰⴼⵓⴳⵍⴰ ⵏ ⵓⵙⴳⵎⴹ ⵖⴼ ⵓⵎⵙⴰⵙⴰ ⵏ ⵓⵣⵓⴳⴳⵣ ⵏ ⵜⴳⵔⵓⵎⵎⴰ ⵏ ⵜⵎⴳⴳⵉⵢⵉⵏ ⵜⵉⵎⵖⴰⵡⴰⵍ ⵉ ⵓⵙⵡⵓⵜⵜⵓ ⵏ ⵢⵉⴹⵉⵚ ⵏ ⵉⴽⵎⵎⵓⴹⵏ, ⵍⵍⵉ ⵉⵍⵍⴰⵏ ⴳ ⵡⴰⵢⵢⵓⵔ ⵏ ⵢⵓⵍⵢⵓⵣ 2022, ⵖⴼ ⵜⵉⵍⴰⵍⵜ ⵜⴰⵏⴼⵍⴰⵃⵜ ⴷ ⵜⴰⴳⴰⵏⵉⵏ, ⴷ ⵡⴰⵏⵏⴰⵍ ⵏ ⵉⵎⵣⴷⴰⵖ ⵉⵜⵜⵓⴹⵕⵕⴰⵏ. ⵉⵍⴽⵎ ⵡⴰⵜⵉⴳ ⵏ ⵓⵣⵓⴳⴳⵣ ⵏ ⵜⵎⴳⴳⵉⵢⵉⵏ ⴰⴷ 290 ⵎⵍⵢⵓⵏ ⴷⵔⵀⵎ.
ⵜⵙⵙⴳⵎⴹ ⴰⵎⵙⴰⵙⴰ ⴰⵙⴰⵜⵉ ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ, ⵜⴰⵎⴰⵡⵙⴰⵙⵜ ⵏ ⵜⴷⵎⵙⴰ ⴷ ⵓⵥⵕⴼ, ⴷ ⵎⴰⵙⵙⴰ ⴼⴰⵟⵉⵎⴰ ⵣⵣⵀⵔⴰ ⵍⵎⵏⵚⵓⵕⵉ, ⵜⴰⵎⴰⵡⵙⴰⵙⵜ ⵏ ⵓⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵓⵙⴽⵡⴰ ⴷ ⵓⵣⴷⵓⵖ ⴷ ⵜⵙⵔⵜⵉⵜ ⵏ ⵜⵖⵔⵎⵜ, ⴷ ⵎⴰⵙⵙ ⵎⵓⵃⵎⵎⴰⴷ ⵚⴰⴹⵉⵇⵉ, ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ, ⴷ ⵎⴰⵙⵙ ⵢⵓⵏⵙ ⵙⴽⴽⵓⵔⵉ, ⴰⵎⴰⵡⵙⴰⵙ ⵏ ⵓⵙⵉⴷⴼ ⴰⴷⵎⵙⴰⵏ ⴷ ⵜⵎⵙⵙⵏⵜⵉⵜ ⵜⴰⵎⵥⵥⵢⴰⵏⵜ, ⴷ ⵜⵡⵓⵔⵉ ⴷ ⵜⵙⵓⴳⴰⵔ, ⴷ ⵎⴰⵙⵙ ⵎⵓⵃⵎⵎⴰⴷ ⵎⵀⵉⴷⵉⵢⴰ ⵍⵡⴰⵎⵉ ⵏ ⵜⵎⵏⴰⴹⵜ ⵏ ⵟⴰⵏⵊⴰ ⵜⵉⵟⵡⴰⵏ ⵍⵃⵓⵙⵉⵎⴰ, ⴷ ⵎⴰⵙⵙ ⵙⴰⵄⵉⴷ ⵥⵏⵉⴱⵕ, ⵍⵡⴰⵎⵉ ⵏ ⵜⵎⵏⴰⴹⵜ ⵏ ⴼⴰⵙ ⵎⴽⵏⴰⵙ, ⴷ ⵎⴰⵙⵙ ⵄⵓⵎⴰⵔ ⵎⵓⵕⵓ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵜⵙⴳⴰ ⵏ ⵟⴰⵏⵊⴰ ⵟⵉⵟⵡⴰⵏ ⵍⵃⵓⵙⵉⵎⴰ, ⴷ ⵎⴰⵙⵙ ⵄⴱⴷⵍⵡⴰⵃⴷ ⵍⴰⵏⵚⴰⵕⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵜⵙⴳⴰ ⵏ ⴼⴰⵙ ⵎⴽⵏⴰⵙ.
ⵔⴰⴷ ⵢⴰⵎⵓ ⵓⵎⵙⴰⵙⴰ ⴰⴷ, ⵍⵍⵉ ⵉⵡⴰⵜⵙⵏ ⴰⵙⵙⵉⴼⵙⵓⵙ ⵏ ⵡⴰⴹⴼⴰⵕⵏ ⵏ ⵉⴽⵎⵎⵓⴹⵏ ⵉⵎⴳⴳⵓⵔⴰ ⵍⵍⵉ ⵉⴽⴽⵔⵏ ⴳ ⵡⴰⵢⵢⵓⵔ ⵏ ⵢⵓⵍⵢⵓⵙ 2022 ⵖⴼ ⵉⵎⵣⴷⴰⵖ ⵉⵜⵜⵓⴹⵕⵕⴰⵏ, ⵜⵉⵎⴳⴳⵉⵢⵉⵏ ⵖⴼ ⵜⵣⴰⵔⴰⵢⵜ ⵜⴰⵎⴰⴷⴰⵙⵜ ⴷ ⵜⵏⴰⵎⵎⴰⵙⵜ ⵃⵎⴰ ⴰⴷ ⵜⵜⵓⵏⵏⴰⵍⵏ ⵉⵎⵣⴷⴰⵖⵏ ⵖⴼ ⵓⵙⵖⵔⵜ ⴷ ⵜⴽⵏⵏⴰⵡⵜ ⵏ ⵜⴳⵯⵎⵎⴰ ⵉⵜⵜⵓⴹⵕⵕⴰⵏ; ⵍⵍⵉ ⵉⵜⵜⵓⵙⵉⵟⵟⵏⴻⵏ ⵖⵓⵔ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ, ⴷ ⵡⵓⵥⵓ ⵏ ⵉⵙⴽⵯⵍⴰ ⴳ ⵜⴰⴳⵏⵉⵏ, ⵍⵍⵉ ⵉⵅⵍⴰⵏ ⵉⴽⵎⵎⵓⴹⵏ ⴷ ⵡⴰⵍⴰⵙ ⵏ ⵓⵙⵖⵔⵜ ⵏ ⵡⴰⴷⴷⴰⴳⵏ ⵉⵜⵜⴰⵔⵓⵏ ⵉⵜⵜⵓⴹⵕⵕⴰⵏ ⴳ ⵡⴰⵍⴰⵙ ⵏ ⵡⵓⵥⵓ ⵏ ⵉⵙⴽⵯⵍⴰ ⴳ ⵡⴰⵜⵜⴰⵢ ⵏ 9330 ⵀⵉⴽⵟⴰⵕ, ⴷ ⵓⵙⴷⵓⵙ ⵏ ⵉⵎⴰⵙⵙⵏ ⵏ ⵡⴰⵔⴰⵢ ⵙⴳ ⵉⴽⵎⵎⵓⴹⵏ ⵉⵎⴰⵢⵏⵓⵜⵏ ⴷ ⵓⵙⵃⴷⵓⴷⵉ ⵏⵏⵙ ⴷ ⵓⵙⵙⵉⴼⵙⵓⵙ ⵏ ⵢⵉⴹⵉⵚⵏ ⵉⴹⵕⵕⴰⵏ ⵏ ⵉⴽⵎⵎⵓⴹⵏ ⵖⴼ ⵉⴽⵙⵙⴰⴱⵏ ⵏ ⵡⵓⵍⵍⵉ ⴷ ⴰⵢⵜ ⵜⵣⵉⵣⵡⴰ ⴷ ⵓⵙⵖⵏⵓ ⵏ 1000 ⵏ ⵓⵙⵓⵍⴼ ⵏ ⵜⵡⵓⵔⵉ ⵉⵎⵎⵔⵏⴰⵏ ⴳ ⵜⵎⵏⴰⴹⵜ ⵏ ⵟⴰⵏⵊⴰ ⵜⵉⵟⵡⴰⵏ ⵍⵃⵓⵙⵉⵎⴰ ⵉ ⵓⵙⴰⵃⴰ ⵏ ⵡⵉⵍⵍⵉ ⵜⵜⵓⴹⵕⵕⴰⵏⵉⵏ ⴷ ⵉⴳⵎⴰⵎⵏ ⵏ ⵜⴰⵡⵊⵉⵡⵉⵏ ⵏⵏⵙⵏ ⴰⴷ ⵙⵡⵓⵔⵉⵏ ⴳ ⵓⵙⴰⵜⵉ ⵏ ⵓⵖⴰⵡⴰⵙ ⴰⵡⵔⴰⵛ.
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙⵙ ⵄⴰⵣⵉⵣ ⴰⵅⵏⵓⵛ ⵎⴰⵙ ⵎⵎⵓⵙⵙⴰⵏⵜ ⵜⵔⵓⴱⴱⴰ ⵏ ⵓⴽⵛⵛⵓⵎ ⵉⴹⴼⴰⵕⵏ ⵉ ⵜⴰⴳⴳⴰⵉⵏ ⵜⵉⴳⵍⴷⴰⵏⵉⵏ, ⴷ ⵜⵊⴹⵕⵎⵜ ⵜⴰⴳⵍⴷⴰⵏⵜ, ⴷ ⵜⴰⴳⴳⴰⵍⵉⵏ ⵏ ⵜⵡⵉⵙⵉ, ⴷ ⵡⴰⵔⴰⵢ ⵓⵖⵔⵉⵎ, ⴷ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵡⴰⵎⴰⵏ ⴷ ⵜⴰⴳⴰⵏⵉⵏ, ⵙ ⵓⵣⵣⴳⵉⵔ ⵏ ⵜⵙⵖⵍⴰⴼ ⵜⵉⴳⵍⴷⴰⵏⵉⵏ ⵜⵉⵎⴰⵜⵜⴰⵢⵉⵏ, ⵃⵎⴰ ⴰⴷ ⵙⵅⵙⵉⵏ ⵉⴽⵎⵎⵓⴹⵏ ⴰⵡⵙⵏ ⵉⵎⵣⴷⴰⵖ ⵉⵜⵜⵓⴹⵕⵕⴰⵏ ⴷⴼⵔⴳⵏ ⴰⵙⵏ ⵏⵉⵜⵏⵉ ⴷ ⵡⴰⵢⴷⴰⵜⵏ ⵏⵏⵙⵏ, ⵉⵎⴽⵉⵍⵍⵉ ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⴰⴽⵜⴰⵔ ⴰⵖⵣⵓⵔⴰⵏ ⵏ ⵉⵎⵏⴽⵛⴰⵎⵏ ⵎⵢⴰⵏⴰⵡⵏⵉⵏ ⵍⵍⵉ ⵉⴽⴽⵔⵏ ⴰⴷ ⵙⵅⵙⵉⵏ ⵉⴽⵎⵎⵓⴹⵏ.
ⵉⵖⵔⴰ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵉ ⵉⵎⵏⴽⵛⴰⵎⵏ ⵉⵢⴰⵏⴰⵡⵏⵉⵏ ⴰⴷ ⵣⵓⴳⴳⵣⵏ ⵙⵔⵉⴷ ⵜⵉⵎⴳⴳⵉⵢⵉⵏ ⵜⵉⵎⵖⴰⵡⴰⵍ ⵃⵎ ⴰⴷ ⵙⵙⵉⴼⵙⵓⵙⵏ ⵖⴼ ⵢⵉⴹⵉⵚ ⵏ ⵓⴽⵎⵎⵓⴹ ⵖⴼ ⵜⵉⵍⴰⵍⵜ ⵏ ⵜⴼⵍⵍⴰⵃⵜ ⴷ ⵜⴰⴳⴰⵏⵉⵏ, ⴷ ⵡⴰⵏⵏⴰⵍ ⵏ ⵉⵎⵣⴷⴰⵖ ⵉⵜⵜⵓⴹⵕⵕⴰⵏ ⵙⴳ ⵉⴽⵎⵎⵓⴹⵏ ⵍⵍⵉ ⵉⵍⵍⴰⵏ ⴳ ⵡⴰⵢⵢⵓⵔ ⵏ ⵢⵓⵍⵢⵓⵣ 2022.
