ⵉⵣⴳⴰ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⴳ ⵜⵡⵓⵔⵉⵡⵉⵏ ⵏ ⵓⴳⵔⴰⵡ “ ⵜⴰⵙⵏⵜⴰⵢⵜ ⵏ ⵓⵏⵣⵣⵔ ⴰⵏⴰⵎⵎⴰⵙ ⴰⵣⴳⵣⴰⵡ”

ⵙ ⵓⵙⵎⴰⴳⵍ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⵢⴰⵎⵓ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙⵙ ⵄⴰⵣⵉⵣ ⴰⵅⵏⵓⵛ ⴳ ⵜⵡⵓⵔⵉⵙⵉⵏ ⵏ ⵓⴳⵔⴰⵡ “ⵜⴰⵙⵏⵜⴰⵢⵜ ⵏ ⵓⵏⵣⵣⵔ ⴰⵏⴰⵎⵎⴰⵙ ⴰⵣⴳⵣⴰⵡ”, ⵍⵍⵉ ⵉⵍⵍⴰⵏ ⴳ ⵜⵎⴰⵥⵓⵏⵜ ⵏ ⵙⵙⴰⵄⵓⴷⵢⴰ ⵕⵕⵉⵢⴰⴹ ⴰⵙⵙ ⵏ ⵓⵢⵏⴰⵙ 25 ⴽⵟⵓⴱⵕ 2021, ⵉⵎⵉⵏ ⵉⵣⴳⴰ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ, ⵉⵙⵙⵉⵅⴼ ⴰⴽⴰⴱⴰⵕ ⴰⵎⵖⵔⴰⴱⵉ ⵢⴰⵎⵓⵏ ⴳ ⵓⵎⵓⵙⵙⵓ ⴰⴷ, ⵍⵍⵉ ⵢⵓⵎⴰⵏ ⵙ ⵓⵥⵍⴰⵢ ⵎⴰⵙⵙⴰ ⵍⴰⵢⵍⴰ ⴱⵏ ⵄⵍⵉ, ⵜⴰⵎⴰⵡⵙⴰⵙⵜ ⵏ ⵓⵎⵎⴰⵜⵜⵉ ⴰⵏⵥⴹⴰⵕ ⴷ ⵜⴳⵎⵉ ⵜⴰⵙⵓⵍⴰⵏⵜ, ⵙ ⵜⵉⵍⵉⵜ ⵏ ⵓⵎⵙⵇⴰⴷ ⵏ ⵍⵎⵖⵔⵉⴱ ⴳ ⵜⴳⵍⴷⵉⵜ ⵜⴰⵄⵕⴰⴱⵜ ⵏ ⵙⵙⴰⵄⵓⴷⵢⴰ ⵎⴰⵙⵙ ⵎⵚⵟⴰⴼⴰ ⵍⵎⵏⵚⵓⵕⵉ.
ⴰⵎⵓⵏ ⴳ ⵓⴳⵔⴰⵡ ⴷ ⵜⵓⴳⵜ ⵏ ⵉⵎⴰⵡⴰⵏ ⵏ ⵉⵡⴰⵏⴽⵏ ⴷ ⵜⵏⴱⴰⴹⵉⵏ, ⴷ ⵉⵏⵙⵙⵉⵅⴼⵏ ⵉⵎⵣⵣⴳⴰⵔⵏ ⵏ ⵜⵎⵙⵙⵓⵔⵉⵏ ⵜⵉⴽⵙⵡⴰⵜⵉⵏ ⵜⵉⵎⴰⴹⵍⴰⵏⵉⵏ, ⴷ ⵉⵏⵙⵙⵉⵅⴼⵏ ⵏ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵉⴽⴰⴷⵉⵎⵉⵢⵏ ⴷ ⵉⴳⵏⵙⴰⵙ ⵏ ⵉⵎⴳⴳⴰⵢⵏ ⵏ ⵡⴰⵎⵓⵏ ⴰⵎⴷⵏⴰⵏ, ⵥⵥⵓⴱⴱⴰⵏ ⵉⵖⴼⴰⵡⵏ ⵖⴼ ⵓⵔⵣⵣ ⵏ ⵜⴳⵔⵓⵎⵎⴰ ⵏ ⵉⵙⴳⵓⵎⵏ ⵍⵍⵉ ⵉⵙⵙⴽⴰⵏⵏ ⵜⵉⵣⵎⵎⴰⵔ ⵉⵜⵜⵓⴳⴰⵏ ⴳ ⵓⵃⵟⵟⵓ ⵏ ⵜⵡⴰⵏⵏⴰⴹⵟ, ⵙ ⵍⴰⵡⴰⵏ ⴰⴽⴽⵯ ⴳ ⵓⵎⴰⵍⵓ ⵏ ⵓⵙⵏⴼⵍⵏ ⵏ ⵓⵏⵣⵡⵉ ⵍⵍⵉ ⵉⵍⵍⴰⵏ ⴳ ⵓⵎⴰⴹⴰⵍ, ⴷ ⵉⵏⴰⵥⴰⵕⵏ ⵍⵍⵉ ⴷ ⴰⴽⴽⴰⵏ ⴳ ⵎⴰⵜⵜⴰ ⵓⵙⵡⵉⵔ.
ⴳ ⵜⴳⵓⵔⵉ ⵏⵏⵙ ⵙ ⵓⵣⵎⵣⵣⵓ ⴰⴷ, ⵉⵙⵙⵓⵜⴳ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⵙ ⵜⵙⵏⵜⴰⵢⵜ ⴰⴷ ⵍⵍⵉ ⵉⵙⵙⴽⴰⵏⵏ ⵜⴰⵏⵏⴰⵢⵜ ⵏ ⵜⴳⵍⴷⵉⵜ ⵜⴰⵄⵕⴰⴱⵜ ⵜⴰⵙⴰⵄⵓⴷⵉⵜ ⴳ ⵓⵍⵎⴰⵡⴰⵢ ⵏ ⵉⵏⴰⵥⴰⵕⵏ ⵉⴷⵙⵍⴰⵏⵏ ⵉⵇⵇⵏⵏ ⵙ ⵜⵡⴰⵏⵏⴰⴹⵜ ⴷ ⵜⵓⵎⴰⵏⵜ ⵏ ⵓⵙⵏⴼⵍ ⵏ ⵓⵏⵣⵡⵉ, ⴰⵔ ⵜⵙⵙⴽⴰⵏ ⴰⵙⵖⵓⵏ ⵏⵏⵙ ⵉⴳⵣⴰⵏ ⵙ ⵓⵙⵔⵓⵙ ⵏ ⵜⴽⴰⵕⴹⴰ ⵏ ⵓⴱⵔⵉⴷ ⵉⴼⴰⵡⵏ ⵜⵓⴳⴳⵓⵎ, ⵉⵜⵜⴰⵡⵙⵏ ⴳ ⵓⵙⴷⵓⵙ ⵏ ⵜⵣⵎⵎⴰⵔ ⵉⵜⵜⴰⵡⵉⵏ ⵖⵔ ⴰⴼⵔⴰⴳ ⵉ ⵡⴰⴽⴰⵍ ⴷ ⵓⴳⴰⵎⴰ ⴳ ⵜⵎⵏⴰⴹⵜ, ⴰⵔ ⵜⵜⵓⵎⵓ ⵙ ⵜⴰⵍⵖⴰ ⵉⴷⵓⵙⵏ ⵜⵕⵡⵓ ⴳ ⵜⵣⵎⵎⴰⵔ ⵜⵉⴳⵔⴰⵖⵍⴰⵏⵉⵏ ⵍⵍⵉ ⵉⵜⵜⵓⴳⵓⵏ ⴳ ⵓⵙⵏⵜⵉ ⵏ ⵜⵔⵙⴰⵍ ⵏ ⵜⴳⵎⵉ ⵜⴰⵙⵓⵍⴰⵏⵜ ⵉⵜⵜⴼⵔⴰⴳⵏ ⵉ ⵜⵡⵏⵏⴰⴹⵜ ⴰⵔ ⵜⵜⴹⵎⴰⵏ ⵉⵎⴰⵍ ⵉⵙⵙⵓⴷⴷⴰⵏ ⵉ ⵜⵙⵓⵜⵉⵡⵉⵏ ⴷ ⵉⴷⴷⴰ.
ⵉⵙⵙⵏⵜⵎ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⵎⴰⵙ ⵉⴳⴰ ⵓⵎⵙⴰⵙⴰ ⵏ ⴱⴰⵔⵉⵣ ⵖⴼ ⵓⵏⵣⵡⵉ, ⴳ ⵡⴰⵀⵉⵍ ⵏ ⵉⵡⵜⵜⴰⵙ, ⵏ ⵜⴳⵎⵉ ⵜⴰⵙⵓⵍⴰⵏⵜ ⵏ ⵓⵙⴳⴳⵯⴰⵙ ⵏ 2030, ⵙⵏⴰⵜ ⵜⵏⵇⵇⴰⴹ ⵉⵙⵜⴰⵡⵀⵎⵎⴰⵏ ⴳ ⵓⵙⴷⵓⵙ ⵏ ⵜⵇⵓⵔⵉ ⵏ ⵓⵏⵣⵡⵉ ⴰⵎⴰⴹⵍⴰⵏ ⴷ ⵓⵙⵏⴼⵍ ⵖⵔ ⵜⴳⵎⵉ ⵎⵉ ⵉⴷⵔⵓⵙ ⵓⴽⴰⵔⴱⵓⵏ, ⴳ ⵢⴰⵜ ⵜⵙⴳⴰ, ⴷ ⵓⵙⴷⵓⵙ ⵏ ⵓⴼⵔⴰⴽ ⴰⵎⵏⵏⴰⴹ ⵓⵍⴰ ⴰⴳⵣⴰⵢ ⵏ ⵜⴷⵍⵙⴰ ⵏ ⵓⵙⵉⴷⴼ ⵏ ⵜⵙⵓⵍⴰⵏⵜ ⵉ ⵇⵇⴰⵃ ⵉⴳⵔⴰⵏ ⵉⴷⵎⵙⴰⵏⵏ, ⴳ ⵜⵙⴳⴰ ⵢⴰⴹⵏⵉⵏ.
ⵉⵏⵄⵜ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙ ⵜⵙⴽⵓⵜⵜⴰ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙ ⵓⵣⵣⴳⴰⵔ ⵏ ⵜⵉⵔⴰⵜ ⵜⴰⵙⵔⵜⴰⵏⵜ ⴷ ⵉⴽⴽⴰⵏ ⵉⵙⵡⴰⵍⴰⵜⵏ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵙ ⵜⴰⵎⴳⴰ ⵏ ⵜⵉⵔⴰⵜ, ⴰⵖⴰⵡⴰⵏ ⵉⵎⴷⴰⵏ ⵉⴱⵏⴰⵏ ⵖⴼ ⵜⵎⵢⴰⴷⴰⵙⵜ ⵜⴰⵎⵙⵉⴷⴼⵜ ⴷ ⵜⵎⴷⵔⴰⵡⵜ ⵜⴰⵎⴰⵙⴰⵢⵜ ⴳ ⵜⵙⵔⵜⵉⵜ ⵏ ⵓⵏⵣⵡⵉ ⵏ ⵜⵎⴰⵣⵉⵔⵜ, ⵉⵎⵙⴰⵙⴰⵏ ⴷ ⵉⵎⵙⵓⵔⴰⵙ  ⴷ ⵉⵡⵜⵜⴰⵙⵏ ⵉⵙⵜⵔⵜⵉⵊⵉⵏ ⵉⵏⴰⵎⵓⵔⵏ ⵏ ⵜⴳⵎⵉ ⵜⴰⵙⵓⵍⴰⵏⵜ, ⵍⵍⵉ ⵉⵜⵜⵡⴰⵜⴰⵙⵏ ⴰⵎⵎⴰⵜⵜⵉ ⵙ ⵜⴷⴰⵎⵙⴰ ⵜⴰⵣⴳⵣⴰⵡⵜ, ⴳ ⵓⵎⵙⴰⵙⴰ ⴰⴽⴷ ⵜⵣⵎⵎⴰⵔ ⵜⵉⴳⵔⴰⵖⵍⴰⵏⵉⵏ ⴳ ⵢⵉⴳⵔ ⴰⴷ, ⵓⵍⴰ ⴰⴽⴷ ⵜⵖⵜⴰⵙⵉⵏ ⵏ ⵜⵙⵇⵇⵉⵎⵜ ⵜⵓⵏⴱⵉⴹⵜ ⵏ ⵉⵎⵓⵣⴰⵢⵏ ⵏ ⵓⵏⵇⵡⵉ, ⴷ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ.
ⵖⵉⴽⵍⵍⵉ ⴷ ⵉⵙⵏⵎⴰⵍⴰ ⵎⴰⵙⵙ ⴰⵅⵏⵓⵛ ⵉⵎⵙⵓⵔⴰⵙ ⵏ ⵓⵏⵣⵡⵉ ⴷ ⵜⵓⵖⴰⵍⵉⵏ ⵜⵓⵣⴷⵉⵔⵉⵏ ⵏ ⵜⵓⵎⴰⵏⵜ ⵏ ⵓⵙⵏⴼⵍ ⵏ ⵓⵏⵣⵡⵉ ⵖⴼ ⵉⵎⵙⴷⴷⵉ ⵏ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵖⴼ ⵜⵓⴷrt n ingrawn ibyulujiyn d sslamt n wammasn d waydatn igamann, ulⴰ ⵖⴼ ⵜⴷⵓⵙⵉ ⵜⴰⴳⴷⵓⴷⴰⵏⵜ, ⵉⵙⵙⴽⵜⵉ ⵏⵡⵉⵙ ⵍⵎⵖⵔⵉⴱ, ⵙ ⵓⴼⵔⴰⴽ ⵏⵏⵙ ⵙ ⵓⵣⵓⵛⵛⵍ ⵏ ⵓⵙⴷⵓⵙ ⵏ ⵉⵎⵙⴷⴷⵉ ⵏ ⵜⴳⵎⵉ ⵎⵉ ⵉⴷⵔⵓⵙ ⵓⴽⴰⵔⴱⵓⵙ, ⵢⵓⵙⵉ ⵜⴰⵙⵏⵜⴰⵢⵜ ⵏ ⵓⵙⵎⵓⵜⵜⴳ ⵏ ⵓⵖⴰⵡⴰⵙ ⴰⵏⴰⵎⵓⵔ ⵏ ⵓⵏⵣⵡⵉ 2020-2030, ⵍⵍⵉ ⵉⵡⴰⵜⵙⵏ ⴰⵙⴷⵓⵙ ⵏ ⵜⵣⵎⵔⵜ ⵖⴼ ⵓⵙⵏⵏⵓⵎ, ⴷ ⵓⵙⵖⴰⵡⵍ ⵏ ⵓⵎⵎⴰⵜⵜⵉ ⵙ ⵜⴷⴰⵎⵙⴰ ⵎⵉ ⵉⴷⵔⵙⵓ ⵓⴽⴰⵕⴱⵓⵏ, ⴷ ⵓⵣⵓⴳⴳⵣ ⵏ ⵜⵙⵔⵜⴰⵢ ⵜⵉⵏⴰⵎⵓⵔⵉⵏ ⵉⵇⵇⵏⵏ ⵙ ⵓⵏⵣⵡⵉ ⴳ ⵓⵙⵡⵉⵔ ⴰⴷⵖⵔⴰⵏ, ⴷ ⵓⵙⵙⵔⵇⴱ ⵏ ⵓⵙⵏⵓⵍⴼⵓⵏ ⴷ ⵓⵙⴰⵍⵉ ⵏ ⵓⵙⵡⵉⵔ ⵏ ⵓⴼⵔⴰⴽ ⵃⵎⴰ ⴰⴷ ⵔⴰⵔⵏ ⵖⴼ ⵜⵏⵥⴰⵕⵉⵏ ⵏ ⵓⵙⴱⴷⴷⵉ ⵏ ⵓⵙⵏⴼⵍ ⵏ ⵓⵏⵣⵡⵉ.
ⵉⴱⴷⵔ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⵜⵙⵎⵓⵜⵜⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴳ ⵓⵎⵙⴰⵙⴰ ⴰⴽⴷ ⵜⴰⵏⵏⴰⵢⵜ ⵜⴰⵙⵜⵔⴰⵜⵉⵊⵉⵜ ⵜⴰⵖⵣⵓⵔⴰⵏⵜ ⵏ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵖⴰⵡⴰⵙ ⴰⵏⴰⵎⵓⵔ ⴰⵎⵙⵉⵣⵡⵔ ⵏ ⵓⵙⵏⵔⵏⵉ ⵙ ⵡⴰⵎⴰⵏ ⵏ ⵜⵉⵙⵙⵉ ⴷ ⵡⴰⵎⴰⵏ ⵏ ⵓⵙⴻⵙⵙⵉ 2020-2027, ⵙ ⵡⴰⵜⵉⴳ ⵉⵍⴽⵎⵏ 11 ⵎⵍⵢⴰⵕ ⴹⵓⵍⴰⵕ/ ⵉⵡⴰⵜⵙ ⵓⵖⴰⵡⴰⵙ ⴰⴷ ⴰⴷ ⵉⵙⵃⴷⵓⴷⵉ ⵉⵙⵓⴳⵉⵎ  ⵡⴰⵎⴰⵏ ⴷ ⵜⵙⴰⴳⵔⴰ ⵏ ⵡⴰⵎⴰⵏ, ⵙ ⵓⵥⵍⴰⵢ ⴳ ⵢⵉⴳⵔ ⵏ ⵜⴼⵍⵍⴰⵃⵜ ⴷ ⵡⴰⵍⴰⵙ ⵏ ⵓⵙⵎⵔⵙ ⵏ ⵡⴰⵎⴰⵏ ⵉⵊⵊⴰⵏ, ⴷ ⵓⵙⵉⴹⴼⵓⵜ ⵏ ⵡⴰⵎⴰⵏ ⵏ ⵢⵉⵍⴻⵍ.
ⵉⵙⵙⵏⵜⵎ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵙ ⵉⴳⴰ ⵓⵛⵛⵉⵍ ⴰⴷ ⵏⵙⵓⴷⵙ ⴰⵎⵢⴰⵡⴰⵙ ⴰⵏⵎⵏⴰⴹ ⴳ ⵓⵢⵏⵏⴰ ⵉⵇⵇⵏ ⵏ ⵜⵎⵏⵜⵉⵍⵉⵏ ⵏ ⵓⵙⵏⴼⵍ ⵏ ⵓⵏⵣⵡⵉ, ⵢⴰⵙⵉ ⵏ ⵜⵖⴰⵔⴰⵙⵜ ⴱⴰⵀⵔⴰ ⵉⵎⵢⴰⵎⴰⵥⵏ ⵜⵎⵓⵔⵙ ⵜⵎⴷⵓ ⴳⵔ ⵉⴼⵔⴷⵉⵙⵏ ⵎⵢⴰⵏⴰⵡⵏⵉⵏ ⵏ ⵡⴰⵎⵓⵏ ⴰⴳⵔⴰⵖⵍⴰⵏ, ⴽⵓ ⵢⴰⵏ ⴳ ⵡⴰⵏⵙⴰ ⵏⵏⵙ ⴷ ⵢⵉⴹⵉⵚ ⵏⵏⵙ, ⴳ ⵓⴱⵔⵉⴷ ⵏ ⵓⵙⵎⵓⵏ ⵏ ⵜⴰⵏⵏⴰⵢⵉⵏ ⴷ ⵡⵓⴽⵓⵙ ⵏ ⵉⴼⵔⴰⴳⵏ ⵍⵍⵉ ⵉⵍⵍⴰⵏ ⴳ ⵓⴱⵔⵉⴷ ⵏ ⵡⴰⴷⴰⴼ ⵖⵔ ⴰⵙⵥⵕⴼ ⵏ ⵓⵏⵣⵡⵉ, ⴷ ⵓⵙⴰⵍⵉ ⴳ ⵓⵙⵡⵉⵔ ⵏ ⵜⵎⵢⴰⵖⵜ ⴷ ⵓⵎⵙⵎⴰⴷ ⴳⵔ ⵓⵙⵥⵕⴼ ⴰⴳⵜⵉⴼⵔⴷⵉⵙⵏ ⴷ ⵓⵙⵥⵕⴼ ⴰⵏⴰⵎⵓⵔ ⵉⵥⵍⵉⵏ ⵙ ⵓⵏⵣⵡⵉ.