ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵙⵏⵓⴱⴳ ⴰⵏⵙⴼⴰⵡ ⴰⴼⵉⴷⵉⵔⴰⵍⵉⵢ ⵉ ⵜⴳⴷⵓⴷⴰⵏⵜ ⵏ ⵏⵏⴰⵎⵙⴰ
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵙⵙ ⵏ ⵓⵙⵉⵏⴰⵙ 28 ⴱⵕⴰⵢⵕ 2023, ⵙ ⵢⵉⵍⵉ ⵏ ⵎⴰⵙⵙ ⵏⴰⵚⵕ ⴱⵓⵕⵉⵟⴰ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵕⵉⵇⵉⵢ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⴰⵏⵙⴼⴰⵡ ⴰⴼⵉⴷⵉⵔⴰⵍⵉⵢ ⵉ ⵜⴳⴷⵓⴷⴰ ⵏ ⵏⵏⴰⵎⵙⴰ, ⵎⴰⵙⵙ ⴽⴰⵕⵍ ⵏⵉⵀⴰⵎⵕ, ⵏⵏⴰ ⴷ ⵉⴳⴰⵏ ⵉⵊⵊ ⵏ ⵓⵔⵣⴰⴼ ⴰⵡⵓⵔⵉⵡⵉⵢ ⵙ ⵜⵎⴰⵣⵉⵔⵜ ⵏⵏⵖ, ⵅⴼ ⵜⵉⴳⴰⵡⵜ ⵏ ⵓⵙⴳⵔⴰⵡ ⴰⴷⴰⵎⵙⴰⵏ ⴰⵎⵖⵔⴰⴱⵉⵢ ⴰⵏⴰⵎⵙⴰⵡⵉⵢ, ⵉⵎⵓⵏ ⴷ ⴷ ⵢⴰⵏ ⵓⴽⴰⴱⴰⵕ ⴰⵏⴼⵔⴰⵔ ⴳ ⵍⵍⴰⵏ ⵉⵔⴳⴰⵣⵏ ⵏ ⵜⵡⵓⵔⵉ.
ⴳ ⵓⵙⵙⵏⵜⵉ ⵏ ⵓⵏⵎⵓⵇⵇⴰⵔ, ⴽⵓ ⵢⴰⵏ ⵉⵙⵙⵉⵜⴳ ⵉⵎⵢⴰⵙⵙⴰⵜⵏ ⵏ ⵜⴰⵡⵎⴰⵜ ⵉⵣⴷⵉⵏ ⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⵏⵏⴰⵎⵙⴰ ⵜⴰⵎⵓⵏⴰⵏⵜ, ⵏⵏⴰ ⵉⵍⵍⴰⵏ ⴷⴷⴰⵡ ⵓⵃⵟⵟⵓ ⵏ ⵉⵎⵓⵣⴰⵔ ⵏ ⵜⵎⵉⵣⴰⵔ ⵙ ⵙⵏⴰⵜ, ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵕⴱⴱⵉ ⴰⴷ ⵜ ⵉⵏⵚⵕ, ⴷ ⵓⵏⵎⵖⵓⵔ ⴰⴽⵙⵡⴰⵜ ⵎⴰⵙⵙ ⴰⵍⵉⴽⵙⵏⴷⵔ ⴼⴰⵏ ⴷⵉⵔⴱⵉⵍⵉⵏ.
ⵎⵛⵉⵏⵏⴰ ⴽⵓ ⵢⴰⵏ ⵉⴱⵓⵔⵣ ⵙ ⵉⵎⵢⴰⵙⵙⴰⵜⵏ ⵉⵎⵣⵔⵓⵢⵏ ⵉⵡⵜⵏ ⵙ ⵉⵥⵓⵕⴰⵏ ⵏⵏⴰ ⵉⵣⴷⵉⵏ ⵜⵉⵎⵉⵣⴰⵔ ⵙ ⵙⵏⴰⵜ, ⵉⴷⴷⵖ ⵉⵎⴰⵏ ⵓⵔⵣⴰⴼ ⴰⴷ, ⴷ ⵓⵙⵙⴽⵜⵉ ⵏ 240 ⵏ ⵜⵙⴽⵔⴰⵡⵜ ⵏ ⵉⵎⵢⴰⵙⵙⴰⵜⵏ ⵉⴷⵓⴱⵍⵓⵎⴰⵙⵉⵢⵏ ⴳⵔ ⵍⵎⵖⵔⵉⴱ ⴷ ⵏⵏⴰⵎⵙⴰ. ⵙ ⵜⵎⵍⴷⴰ ⴰⴷ, ⵜⵙⵙⵏⴽⴷ ⵎⴰⵙⵙⴰ ⴰⵏⴰ ⴱⴰⵏⴽⵓⴼⵉⵜⵛ ⵜⴰⵎⵙⵇⴰⴷⵜ ⵏ ⵏⵏⴰⵎⵙⴰ ⴳ ⵍⵎⵖⵔⵉⴱ, ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵜⵉⴼⵉⵍⵉⵏ ⵜⵉⵥⵓⵕⴰⵏⵉⵏ ⵉⵣⵎⵎⴻⵎⵏ ⵉⵥⵓⵕⴰⵏ ⵙ ⵡⵜⵏ ⵉⵎⵢⴰⵙⵙⴰⵜⵏ ⵉⴷⵓⴱⵍⵓⵎⴰⵙⵉⵢ ⵊⴰⵔ ⵜⵎⵉⵣⴰⵔ ⵙ ⵙⵏⴰⵜ.
ⴳ ⵓⵏⵎⵓⵇⵇⴰⵔ, ⵉⵙⴷⴷⵉⴷ ⴽⵓ ⵓⴼⵓⵍ ⴰⵜⵉⴳ ⵏ ⵓⵙⴳⵔⴰⵡ ⴰⴷⴰⵎⵙⴰⵏ ⴰⵎⵖⵔⴰⴱⵉⵢ ⴰⵏⴰⵎⵙⴰⵡⵉⵢ, ⵉⵜⵜⵢⴰⴳⴳⴰⵏ ⴳ ⵜⵎⴰⵣⵉⵔⵜ ⵏⵏⵖ ⴳ ⵓⵣⵎⵣ ⵏ ⴳⵔ 27 ⴱⵕⴰⵢⵕ ⴷ 1 ⵎⴰⵕⵚ 2023, ⵉⴷⴷⵖ ⵉⴳⴰ ⵢⴰⵜ ⵜⵎⵍⴷⴰ ⵏ ⵓⵙⵙⵓⴷⵙ ⵏ ⵓⵎⵢⴰⵡⴰⵙ ⴰⴷⴰⵎⵙⴰⵏ, ⵏⵏⴰ ⴷ ⵢⵉⵡⵉⵏ ⴰⴳⵎⴹ ⵏ ⵜⵎⵢⴰⵇⵇⴰⵏⵜ ⵉⵛⵛⴰⵔⵏ ⴳⵔ ⵜⴰⵎⵓⵏⵜ ⵜⴰⵎⴰⵜⵓⵜ ⵉ ⵜⵔⵎⵉⵙⵜ ⵏ ⵜⵎⵚⵕⵉⵢⵜ ⵜⴰⴷⴰⵎⵙⴰⵏⵜ ⵜⴰⵏⴰⵎⵙⴰⵡⵉⵢⵜ.
ⴳ ⵜⵉⴳⵉⵔⴰ ⵏ ⵓⵏⵎⵓⵇⵇⴰⵔ ⴰⴷ ⵏⵏⴰⵏ ⵉⵎⴰⵙⴰⵢⵏ ⵙ ⵙⵙⵉⵏ ⵉⵙ ⵙⵡⴰⵏⴼⴰⵏ ⴳ ⵜⴳⵎⵉ ⵉⵙⵙⵏ ⵓⵎⵔⴰⵔⴰ ⴰⵏⵙⴱⴰⴱⴰⵏ ⴳⵔ ⵕⴱⴰⵟ ⴷ ⴼⵢⵉⵏⵏⴰ, ⴷ ⵓⵙⵎⵖⵔ ⵏ ⵜⵙⴰⵔⵡⵉⵡⵉⵏ ⵏ ⵏⵏⴰⵎⵙⴰ ⴳ ⵍⵎⵖⵔⵉⴱ ⴳ ⵉⵙⴳⴳⵯⴰⵙⵏ ⴰⴷ ⵉⵎⴳⴳⵓⵔⴰ. ⴳ ⵓⵏⵎⵓⵇⵇⴰⵔ ⴱⴷⴷⴰⵏ ⵡⵓⴼⵓⵍⵏ ⵙ ⵙⵙⵉⵏ ⵅⴼ ⵓⵎⵢⴰⵡⴰⵙ ⴰⵎⴳⵓⵔⴰⵏ ⵉⵖⵓⴷⴰⵏ ⵉⵍⵍⴰⵏ ⴳ ⵢⵉⴳⵔ ⵏ ⵜⵎⴳⵓⵔⵉ ⵏ ⵜⵀⵉⵔⵉⵜⵉⵏ ⴳⵔ ⵜⵎⵉⵣⴰⵔ ⵙ ⵙⵏⴰⵜ, ⵉⵏⵏⴰ ⵍⵎⵖⵔⵉⴱ ⴷ ⵏⵏⴰⵎⵙⴰ ⵙ ⵉⵅⵚⵚⴰ ⴰⴷ ⵎⵙⵏⴼⴰⵍⵏ ⵜⴰⵎⵓⵣⴰⵢⵜ ⵅⴼ ⵜⴳⵎⵉ ⵏ ⵉⵙⵖⵏⵓⵜⵏ ⵉⵛⵛⴰⵔⵏ ⵣⴷⵉⵏ ⵙ ⵜⵕⵡⵉ ⵏ ⵜⵛⴰⵛⵜ ⴷ ⵜⵣⵎⵔⵜ ⵉⵜⵜⵓⵙⵎⴰⵢⵢⵓⵏⵓⵏ., ⵎⵛⵉⵏⵏⴰ ⵙⴰⵡⵍⵏ ⴳ ⵓⵏⵎⵓⵇⵇⴰⵔ ⴰⴷ ⵅⴼ ⵡⴰⵟⵟⴰⵚ ⵏ ⵜⵎⵙⴰⵔⵉⵏ ⵜⵏ ⵉⵛⵛⴰⵔⵏ ⵢⵉⵍⵉ ⴷⴰⵔⵙⵏⵜ ⵛⵉⴳⴰⵏ ⵏ ⵡⴰⵜⵉⴳ ⵏⵏⴰ ⴳ ⵜⵍⵍⴰ ⵜⵎⵙⴰⵔⵜ ⵏ ⵜⵏⵣⵔⵓⴼⵜ ⵜⴰⵎⵖⵔⴰⴱⵉⵢⵜ, ⴷ ⵓⵎⵢⴰⵡⴰⵙ ⴳⵔ ⵍⴱⵕⵍⴰⵎⴰⵏ ⵏ ⵜⵎⵉⵣⴰⵔ ⵙ ⵙⴰⵏⵜ, ⴷ ⵜⵎⵙⴰⵔⵜ ⵏ ⵜⵏⵣⵡⴰⴳⵜ ⴷ ⵜⵏⴼⵔⵓⵜ, ⴷ ⵓⵎⵢⴰⵡⴰⵙ ⴰⵣⵔⴼⴰⵏ ⴷ ⵓⴷⵍⵙⴰⵏ. ⴰⵔⵣⴰⴼ ⴰⴷ, ⴼⵓⴽⴽⴰⵏⵜ ⵙ ⵓⵙⵙⵓⴼⵖ ⵏ ⵢⴰⵜ ⵜⵏⵎⵎⴰⵍⵜ ⵉⵛⵛⴰⵔⵏ ⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⵏⵏⴰⵎⵙⴰ ⵜⴰⵎⵓⵏⴰⵏⵜ, ⵉⵙⴷⵓⵙⵏ ⵜⴰⴷⵉⵏⴰⵎⵉⵢⵜ ⵜⴰⵎⵉⵍⴰⵡⵜ ⵉ ⵓⵎⵢⴰⵡⴰⵙ ⵉⵛⵛⴰⵔⵏ ⴳⵔ ⵜⵎⵉⵣⴰⵔ ⵙ ⵙⵏⴰⵜ ⴳ ⵢⵉⴳⵔⴰⵏ ⵉⵎⵢⴰⵏⴰⵡⵏ.
