ⵉⵎⵙⴰⵡⴰⵍ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴷ ⵓⵎⴰⵡⵙⴰⵙ ⴰⵎⵣⵡⴰⵔⵓ ⵏ ⵜⴳⵍⴷⵉⵜ ⵏ ⴱⵉⵍⵊⵉⴽⴽⴰ
ⵉⴳⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵡⴰⵢⵏⴰⵙ 15 ⵉⴱⵔⵉⵔ 2024 ⴳ ⵕⵕⴱⴰⵟ, ⵉⵎⵙⴳⴷⴰⵍⵏ ⴰⴽⴷ ⵓⵎⴰⵡⴰⵙⴰⵙ ⴰⵎⵣⵡⴰⵔⵓ ⵏ ⵜⴳⵍⴷⵉⵜ ⵏ ⴱⵉⵍⵊⵉⴽⴽⴰ, ⵎⴰⵙⵙ ⴰⵍⵉⴽⵙⴰⵏⴷⴰⵕ ⴷⵓⴽⵕⵓ ⵍⵍⵉ ⴷ ⵉⵙⴽⵔⵏ ⵢⴰⵜ ⵜⵔⵣⵣⵉⴼⵜ ⵏ ⵜⵡⵓⵔⵉ ⵙ ⵍⵎⵖⵔⵉⴱ. ⵜⵔⵣⵣⵉⴼⵜ ⵍⵍⵉ ⴷ ⵉⴷⴷⴰⵏ ⴳ ⵜⵉⵣⵉ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙ ⴽⵕⴰⴹⵜ ⵏ ⵜⵙⵇⵇⵉⵎⵜ ⵢⴰⵜⵜⵢⵓⵏ ⵉⵛⵛⴰⵔⵏ ⵏ ⵜⵎⴰⴷⵔⴰⵡⵜ ⵍⵎⵖⵔⵉⴱ-ⴱⵉⵍⵊⵉⴽⴽⴰ.
ⵉⵡⵉⵏ ⴷ ⴳ ⵉⵎⵙⴳⴷⴰⵍⵏ ⵏ ⵓⴳⵔⴰⵡ ⴰⴷ, ⵍⵍⵉⵖ ⵉⵃⴰⴹⵕ ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⵏ ⵉⴼⵔⵉⵇⵢⴰ ⴷ ⵉⵎⵖⵔⵉⴱⵉⵏ ⵉⵎⵣⴷⴰⵖ ⵏ ⵜⵉⵎⵉⵣⴰⵔ ⵏ ⴱⵕⵕⴰ, ⵎⴰⵙⵙ ⵏⴰⵚⵕ ⴱⵓⵕⵉⵟⴰ ⴷ ⵜⵎⴰⵡⵙⴰⵙⵜ ⵏ ⵜⵖⴰⵡⵙⵉⵡⵉⵏ ⵏ ⵓⵕⵓⴱⴱⴰ ⴷ ⵜⵙⵖⵏⵣⵉⵜ ⵏ ⴱⵕⵕⴰ ⴷ ⵜⵎⵔⵙⴰⵍ ⵜⵉⴷⵍⵙⴰⵏⵉⵏ ⵜⵉⴼⵉⴷⵉⵕⴰⵍⵉⵏ ⵏ ⵜⴳⵍⴷⵉⴷⵜ ⵏ ⴱⵉⵍⵊⵉⴽⴽⴰ, ⵎⴰⵙⵙⴰ ⵃⴰⵊⵊⴰ ⵍⵃⴱⵉⴱ ; ⵎⴰ ⵙ ⵜⵏ ⵙⵙⵓⵙⵎⵏⵜ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵏⴳⵔ ⵜⵉⵎⵉⵣⴰⵔ ⵙ ⵙⵏⴰⵜ ⴷ ⵓⵙⵎⵓⵜⵜⴳ ⴰⵎⵢⴰⵏⴰⵡ ⴳ ⵜⵉⴳⴰ ⵏ ⵉⵙⴳⴳⵯⴰⵙⵏ ⴰⴷ ⵉⵣⵔⵉⵏ, ⴰⵢⵍⵍⵉ ⵔⴰⴷ ⵢⴰⵡⵙ ⴰⴷ ⵜⵉⵍⵍⵉ ⵢⴰⵜ ⵜⵎⴷⵔⴰⵡⵜ ⵜⴰⵙⵜⵕⴰⵜⵉⵊⵉⵜ ⵍⵍⵉ ⵙ ⵙⵖⴰⵡⵙⴰⵏⵜ ⵜⴳⵍⴷⴰⵢ ⵙ ⵙⵏⴰⵜ ⴷⴷⴰⵡ ⵜⵉⵍⴰⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵔⵏⵓ ⵔⴱⴱⵉ ⴷ ⵓⴳⵍⵍⵉⴷ ⴼⵍⵉⴱ ⵏ ⴱⵉⵊⵉⴽⴽⴰ.
ⵙⴰⵡⵍⵏ ⴰⵡⴷ ⵅⴼ ⵜⵖⴰⵔⴰⵙⵉⵏ ⴷ ⵉⵎⴰⵙⵙⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⴱⵖⵍⵓ ⵏ ⵜⵎⴰⴷⵔⴰⵡⵜ ⵏⴳⵔ ⵕⵕⴱⴰⵟ ⴷ ⴱⵕⵓⴽⵙⵉⵍ ⵃⵎⴰ ⴰⴷ ⵢⵉⵍⵉ ⵓⵙⵏⴼⵍ ⵏ ⵜⵡⵓⵔⵉ ⵉⵍⴰⵏ ⴳ ⵓⵙⵡⵉⵔ ⵏ ⵜⵣⴷⴰⵢⵉⵏ ⵏ ⵜⵉⴷⴷⵓⴽⵍⴰ ⵏ ⵓⵎⵣⵔⵓⵢ ⵉⵖⵓⴷⴰⵏ ⴷ ⴰⴷ ⵢⵉⵍⵉ ⵓⵙⴰⵔⵔⵓ ⴳ ⵉⵙⴷⴷⵔⵏ ⴷ ⵜⵉⵥⴹⵕⵉⵏ ⵍⵍⵉ ⵙⵓⵍ ⵉⵍⵍⴰⵏ ⵖⵓⵔ ⵜⵎⵉⵣⴰⵔ ⵙ ⵙⵏⴰⵜ.
ⴷⴷⴰⵏ ⴷ ⵉⵎⵙⴳⴷⴰⵍⵏ ⴰⴷ ⵖ ⵢⴰⵜ ⵜⵉⵣⵉ ⵍⵍⵉⵖ ⴷ ⴽⵜⵉⵏ ⵜⴰⵙⴳⵓⵔⵉ ⵜⴰⵎⴳⵔⵓⵜ ⵍⵍⵉ ⵅⴼ ⵉⵍⵍⴰ ⵓⵙⵖⵥⵏ ⴳ ⴽⵜⵓⴱⵔ 2022, ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⴰⵙⵔⵜⴰⵏ ⵉⵙⵎⴷⵏ ⴷ ⵓⵙⵎⵔⵙⵍ ⵏ ⵜⵎⴷⵔⴰⵡⵜ ⵍⵎⵖⵔⵉⴱ-ⴱⵉⵍⵊⵉⴽⴽⴰ ⴳ ⵜⵓⴳⵜ ⵏ ⵉⴳⵔⴰⵏ ⵍⵍⵉ ⵉⵥⵍⵉⵏ ⵙ ⵜⵉⵎⵉⵣⴰⵔ ⵙ ⵙⵏⴰⵜ.
