ⵉⴳⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵎⵙⴳⴷⴰⵍⵏ ⴷ ⴰⵎⴰⵡⵙⴰⵙ ⴰⵎⵣⵡⴰⵔⵓ ⵏ ⵜⴳⴷⵓⴷⴰⵏⵜ ⵏ ⵏⵏⵉⵊⵉⵔ
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⴽⵡⴰⵙ 7 ⵏⵓⵡⴰⵏⴱⵉⵔ 2024 ⵖ ⵕⵕⴱⴰⵟ, ⵎⴰⵙⵙ ⵄⴰⵍⵉ ⵎⵀⴰⵎⴰⵏ ⵍⴰⵎⵉⵏ ⵣⵉⵏ ⴰⵎⴰⵡⵙⴰⵙ ⴰⵎⵣⵡⴰⵔⵓ ⵏ ⵜⴳⴷⵓⴷⴰⵏⵜ ⵏ ⵏⵏⵉⵊⵉⵔ. ⵉⴳⴰ ⴷⵉⵙ ⵉⵎⵙⴳⴷⴰⵍⵏ ⵅⴼ ⵓⵙⵖⵓⴷⵓ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ ⵏⴳⵔ ⵜⴰⴳⴷⵍⵉⵜ ⵏ ⵍⵎⵖⵔⵉⴱ ⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⵏⵏⵉⵊⵉⵔ ⴷ ⵜⵙⵓⵎⴰⵔ ⵉⵜⵜⵓⵛⵔⴰⴽⵏ, ⵉⵃⴰⴹⵕ ⴰⵡⴷ ⵓⵎⵡⵙⴰⵙ ⵏ ⵜⵖⴰⵡⵙⵉⵇⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⵉⴱⵉⵏ ⵉⵎⵣⴷⴰⵖ ⵏ ⴱⵕⵕⴰ ⵎⴰⵙⵙ ⵏⴰⵚⵕ ⴱⵓⵕⵉⵟⴰ.
ⵉⵙⵎⵖⵔ ⵓⵏⵙⵙⵉⵅⴼ ⵏ ⵜⵏⴰⴱⴰⴹⵜ ⴳ ⵓⴳⵔⴰⵡ ⴰⴷ ⵙ ⵓⵙⵡⵉⵔ ⵏ ⵜⵣⴷⴰⵢⵉⵏ ⵏ ⵜⵉⴷⴷⵓⴽⵍⴰ ⴷ ⵓⵎⵢⴰⵡⴰⵙ ⵉⵍⵍⴰⵏ ⵖⵔ ⵜⵎⵉⵣⴰⵔ ⵙ ⵙⵏⴰⵜ ⵍⵍⵉ ⵉⵙⵡⴰⵏ ⵣⵖ ⵖ ⵓⵙⵓⴳⵔ ⴷ ⵓⵡⵇⵇⵔ ⵍⵍⵉ ⵙ ⵉⵥⵍⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵔⴱⴱⵉ ⵉ ⵜⵎⵉⵣⴰⵔ ⵏ ⵜⵎⵏⵥⴰⵡⵜ ⵏ ⵉⴼⵔⵉⵇⵢⴰ ⵙ ⵓⵎⴰⵜⴰ ⴷ ⵜⵎⵉⵣⴰⵔ ⵏ ⵙⵙⴰⵃⵉⵍ ⵙ ⵜⵓⵥⵍⵉⵢⵉⵏ.
ⵖ ⵎⵏⵉⴷ ⴰⴷ ⵏⵉⵜ, ⵉⵙⴽⵜⵉ ⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵜⵎⵙⵙⵏⵜⵉⵜ ⵏⵡⴰⵟⵍⴰⵚ ⵍⵍⵉ ⵉⵙⵏⵜⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵔⴱⴱⵉ ⵉⵥⵍⵉⵏ ⵙ ⵓⵙⴷⵓⵙ ⵏ ⵓⵙⵉⴷⴼ ⵙ ⵓⴳⴰⵔⵓ ⴰⵟⵍⴰⵏⵜⵉⴽ ⵍⵍⵉ ⵉⴷⴷⴰⵏ ⵖ ⵓⴼⵔⴰⴽ ⵏ ⴱⴰⴱ ⵏ ⵡⴰⴷⵓⵔ ⵙ ⵓⴳⵣⵣⵓⵎ ⴰⴷ ⵏ ⵜⵎⵏⵥⴰⵡⵜ ⵏ ⵉⴼⵔⵉⵇⵢⴰ ⵉⵙ ⴷⴰⵔⵙ ⴰⵣⵔⴼ ⵖ ⵜⵉⵡⵉⵙⵉ ⴳ ⵜⴷⴰⵎⵙⴰ ⵜⴰⵎⴹⵍⴰⵏⵜ ⴷ ⵓⵔⵣⵣⵓ ⵏ ⵓⵔⴳⴳⵉⴳ ⴷ ⵓⴼⵔⴰ.
ⴳⴰⵏ ⵉⵎⴹⴰⴽⴰⵕⵏ ⴰⴷ ⵢⴰⵜ ⵜⵉⵣⵉ ⵍⵍⵉⵖ ⵙⴰⵡⵍⵏ ⵅⴼ ⵉⵏⵥⴰⵕⵏ ⵢⵓⵜⵜⵓⵢⵏ ⵏ ⵓⵎⵢⴰⵡⴰⵙ ⴰⴷⴰⵎⵙⴰⵏ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⵏⵏⵉⵊⵉⵔ ⴷ ⴰⵡⴷ ⵉⵎⴰⵙⵙⵏ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⴷⵓⵙ ⵏ ⵜⵙⴱⴱⴰⴱⵜ ⵜⴰⵙⵉⵏⵔⴰⵏⵜ ⵃⵎⴰ ⴰⴷ ⵜⵍⴽⵎ ⵉⴳⵔⴰⵏ ⵢⴰⴹⵏⵉⵏ ⴷ ⵜⵡⵓⵔⵉⵡⵉⵏ ⵏ ⵓⵙⵙⴰⵔⵓ ⴳⵔ ⵙⵏⴰⵜ ⵜⵎⵉⵣⴰⵔ.
