ⵉⵕⵥⵎ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙⵙ ⵙⴰⵜ ⵏ ⵓⵙⴼⵙⵔ “ⴰⵍⵢⵓⵜⵉⵙ” ⴰⴳⵔⴰⵖⵍⴰⵏ ⴳ ⴰⴳⴰⴷⵉⵔ
ⵉⵕⵥⵎ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵄⴰⵣⵉⵣ ⴰⵅⵏⵓⵛ, ⴰⵙⵙ ⵏ ⵓⴽⵕⴰⵙ 5 ⴱⵕⴰⵢⵕ 2025 ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙⵙ ⵙⴰⵜ ⵏ ⵓⵙⴼⵙⵔ “ⴰⵍⵢⵓⵜⵉⵙ” ⴰⴳⵔⴰⵖⵍⴰⵏ ⴳ ⴰⴳⴰⴷⵉⵔ, ⵍⵍⵉ ⵉⵜⵜⵓⵙⵏⵎⵍⴰⵏ ⴷⴷⴰⵡ ⵜⵉⵍⴰⵍ ⴷ ⵢⵉⵡⵣ ⵢⴰⵜⵜⵓⵢⵏ ⵏⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵔⴱⴱⵉ. ⵉⵃⴰⴹⵕ ⴳⵉⵙ ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ, ⵎⴰⵙⵙ ⴰⵃⵎⴰⴷ ⵍⴱⵡⵡⴰⵔⵉ ⴷ ⵜⴰⵎⴰⵔⵉⵜ ⵏ ⵡⴰⵏⴽ ⵉⵜⵜⵓⵙⵎⴰⴳⴰⵍⵏ ⵙ ⵜⴳⵎⵔⵜ ⵜⴰⵢⵍⴰⵏⵜ, ⵎⴰⵙⵙⴰ ⵣⴰⴽⵢⴰ ⴷⴷⵔⵉⵡⵉⵛ ⴷ ⵍⵡⴰⵍⵉ ⵏ ⵜⵙⴳⴰ ⵏ ⵙⵓⵙ ⵎⴰⵙⵙⴰ ⴰⵏⴱⴰⴹ ⵏ ⵜⵏⵎⵏⴰⴹⵜ ⴰⴳⴰⴷⵉⵔ ⵉⴷⴰⵡⵜⴰⵏⴰⵏ, ⵎⴰⵙⵙ ⵙⴰⵄⵉⴷ ⴰⵎⵥⴰⵥⵉ.
ⵜⵜⵓⵙⵏⵎⴰⵍⴰⵏⵜ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⴰⴷ ⵙⴳ 6 ⴰⵔ 9 ⴱⵕⴰⵢⵕ ⴰⴷ ⴳ ⵡⴰⵎⵎⴰⵙ ⵏ ⵉⵙⴼⵙⴰⵔ ⴳ ⵜⵖⵔⵎⵜ ⵏ ⵓⴳⴰⴷⵉⵔ ⵙ ⵜⵎⴰⵜⴰⵔⵜ : “ ⴰⵔⵣⵣⵓ ⴷ ⵓⵙⵏⴼⵍⵓⵍ ⵉ ⵢⴰⵜ ⵜⴳⵯⵎⵔⵜ ⵜⴰⵢⵍⴰⵏⵜ ⵜⴰⵙⵓⵍⴰⵏⵜ”, ⵙ ⵜⵉⵍⵉⵜ ⵏ ⴼⵕⴰⵏⵙⴰ ⵉⴳⴰⵏ ⴰⵏⴱⴳⵉ ⵏ ⵡⵓⴷⴷⵓⵔ. ⴰⵔ ⵜⵎⵎⴰⵍⴰ ⵜⵙⵓⵜⵍⵜ ⴰⴷ ⵜⵎⵔⵉⵙⵜ ⵉⴷⵔⵔⵏ ⵏ ⵜⴳⵍⴷⵉⵜ ⵃⵎⴰ ⴰⴷ ⵉⴳ ⵓⵣⵔⵔⵓ ⴰⵎⴰⵙⵙⴰⵏ ⵢⴰⵏ ⵓⵏⴱⴷⴰⴷ ⴰⵙⵜⵕⴰⵜⵉⵊⵉ ⵏ ⵓⵙⴷⴷⵔ ⵏ ⵉⵙⵓⴳⴰⵎ ⵏ ⵉⵙⵍⵎⴰⵏ ⴷ ⵓⵎⵃⵉⵣⵡⴰⵔ ⵏ ⵜⵎⵙⵙⵏⵜⴰⵢ ⵜⵎⵖⵔⵉⵔⵉⵢⵉⵏ.
ⵙ ⵓⵣⵎⵣⵣⵓ ⴰⴷ, ⵉⵔⵣⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵙⵎⵎⵓⵙ ⵏ ⵉⵙⵓⵏⴰⴹ ⵏ ⵓⵙⴼⵙⵔ ⵖ ⵉⵍⵍⴰ : ⴰⵙⴰⵏⵓⴹ ⴰⵎⵔⵙⵍⴰⵏ, ⴷ ⵓⵙⴰⵏⵓⴹ ⴰⴳⵔⴰⵖⵍⴰⵏ ⴷ ⵓⵙⴰⵏⵓⴹ ⵏ ⵓⵙⵏⴼⵍ ⴷ ⵓⵙⵙⵉⵜⴳ ⴷ ⵜⵡⵓⵔⵉⵡⵉⵏ ⴷ ⵓⵙⴰⵏⵓⴹ ⵏ ⵉⵎⴰⵜⵜⵉⵡⵏ ⵉⵢⵍⴰⵏⵉ ⴷ ⵓⵙⴰⵏⵓⴹ ⵏ ⵜⵙⴳⵎⵉⵍⵜ.
ⵉⵙⵙⵏⵜⵎ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰ ⵙ ⵉⴳⴰ ⵓⵎⴰⴳⴳⵓⵎ ⵏ ⵜⵎⴰⵣⵉⵔⵜ ⵏⵏⵖ ⵙ ⵜⵏⵏⵓⴱⴹⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⴷⴰⵔⵙ ⵢⵉⵍⵉ ⵢⴰⵏ ⵡⴰⵜⵉⴳ ⴰⴷⵙⵍⴰⵏ ⴳ ⵜⴰⵙⵖⵉⵡⵙⵜ ⵏ ⵜⴳⵯⵎⵜ ⵜⴰⵢⵍⴰⵏⵜ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵙⵖⵓⴷⵓ ⵏ ⵜⵎⴳⵓⵔⵉⵏ ⵉⵣⴷⵉⵏ ⵙ ⵉⴳⵔ ⴰⴷ. ⵎⴰⵢⴰⵏ ⵔⴰⴷ ⵢⴰⵡⵉ ⵉⵣⵎⴰⵣ ⵏ ⵜⵡⵓⵔⵉ ⴷ ⵓⵙⵉⴳⵜ ⵏ ⵉⵙⵙⴰⵔⵓⵜⵏ ⵍⵍⵉ ⵔⴰⴷ ⵉⴷⴷⵓ ⵙ ⵜⴳⵍⴷⵉⵜ ⴷ ⵉⵎⵢⴰⵡⴰⵙⵏ ⵉⵢⴰⴼⵓⵜⵏ ⵏ ⵉⵎⴰⵍ ⴳ ⵉⴳⵔ ⴰⴷ.
ⵉⵣⴰⵢ ⴷ ⵉⵏⵏⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰ ⵙ ⵓⵔⵣⵣⵓ ⴰⵎⴰⵙⵙⴰⵏ ⵢⴰⵜ ⵜⵖⴰⵔⴰⵙⵜ ⵉⴷⵓⵙⵏ ⴳ ⵜⵙⵜⵕⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵜⴳⵎⵉ ⴳ ⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵓⵙⵖⵓⴷⵓ ⵏ ⵓⵎⵓⵜⵜⵉ ⵙ ⵜⴷⴰⵎⵙⴰ ⵜⴰⵣⴳⵣⴰⵡⵜ ⵍⵍⵉ ⵔⴰⴷ ⵢⴰⵡⵙ ⴳ ⵜⴳⵎⵉ ⵜⴰⵙⵓⵍⴰⵏⵜ, ⵉⵙⵅⵉⵜⵔ ⴳ ⵜⵎⴳⴳⵉⵢⵉⵏ ⵏ ⵜⵏⴱⴰⴹⵜ ⵍⵍ ⵉⴹⴼⴰⵕⵏ ⵉⵙⵏⴼⵍⵏ ⵉⵍⵍⴰ ⴳ ⵉⴳⵔ ⴰⴷ ⴷ ⵓⵙⵖⵓⴷⵓ ⵏ ⵜⵎⵙⵙⵓⴳⴰⵔ ⵎⵏⵉⴷ ⵉⵏⴰⵥⴰⵕⵏ ⵉⵡⵏⵏⴰⴹⵏ.
ⴰⵔ ⵉⵎⵎⴰⵍ ⵓⵙⵏⵎⴰⵍⴰ ⵏ ⵉⵎⵊⵕⵉ ⴰⴷ ⴰⴽⵙⵡⴰⵜ ⵜⵉⵅⵅⵉⵜⵔⵜ ⵏ ⵢⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴳ ⵓⵥⵟⵟⴰ ⴰⴷⵎⵙⴰⵏ ⴰⵏⴰⵎⵓⵔ, ⵙⵏⵄⵜⵏ ⵉⵙ ⵉⵍⴽⵎ ⵓⴼⴰⵔⵙ ⴰⵏⴰⵎⵓⵔ ⵏ ⵉⵢⴰⴼⵓⵜⵏ ⵏ ⵜⴳⵯⵎⵔⵜ ⵜⴰⵢⵍⴰⵏⵜ 1.42 ⵎⵍⵢⵓⵏ ⵟⵓⵏ ⴳ ⵓⵙⴳⴳⵯⴰⵙ ⵏ 2024, ⴰⵢⵍⵍⵉ ⵉⵙⵙⴽⵔⵏ ⴳ ⵜⴳⵍⴷⵉⵜ ⴰⴷ ⵜⴰⵎⵥ ⵜⴰⵙⴽⵯⴼⵍⵜ ⵉⵣⵡⴰⵔⵏ ⵉⵏⴳⵔ ⵉⵎⵙⵢⴰⴼⵓⵜⵏ ⵉⴼⵔⵉⵡⵉⵜⵏ ⴷ ⵜⵙⴽⵯⴼⵍⵜ ⵜⵉⵙⵙ 13 ⴳ ⵓⵎⴰⴹⴰⵍ.
ⵉⵇⵇⴰⵏ ⴷ ⴰⴷ ⵏⵙⴽⵯⵜⵉ ⵉⴳⴰ ⵉⴳⴳⴰⵔ ⵓⵙⴼⵙⵔ “ⴰⵍⵢⵓⵜⵉⵙ” ⵢⴰⵜ ⵢⵓⵣⵎⵣ ⵢⴰⵜⵜⵓⵢⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⵃⵎⴰ ⴰⴷ ⵢⵉⵍⵉ ⵓⵙⵙⴰⴳⵯ ⵙ ⵉⵙⵏⴼⵓⵍⵓⵏ ⵉⵎⴰⵢⵏⵓⵜⵏ ⴳ ⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵓⵙⵏⴼⵍ ⵏ ⵢⴰⴼⵓⵜⵏ ⴰⵢⵍⴰⵏⵏ ⴷ ⵜⵙⴳⵎⵉⵍⵜ. ⵉⵙⵏⵓⴱⴱⴳ ⴰⵙⴳⴳⵯⴰⵙ ⴰⴷ ⴳ ⵜⵙⵓⵜⵍⵜ ⵜⵉⵙ ⵙⴰⵜ ⵎⴰ ⵉⵜⵜⴳⴰⵏ 523 ⵏ ⵓⵎⵙⴼⵙⵔ ⴷ ⵉⴷⴷⴰⵏ ⵣⵣⵖ ⵏ 54 ⵏ ⵓⵡⴰⵏⴽ, ⵖ ⵍⵍⴰⵏⵜ 4 ⵜⵎⵉⵣⴰⵔ ⵍⵍⵉ ⴷ ⵉⴷⴷⴰⵏ ⴳ ⵜⵉⴽⴽⴽⵍⵉⵜ ⵜⴰⵎⵣⵡⴰⵔⵓⵜ ⵖ ⵜⵍⵍⴰ ⴽⵓⵔⵢⴰ ⵏ ⵉⴼⴼⵓⵙ ⴷ ⵍⵉⵏⴳⵍⵉⵣ ⴷ ⵍⵀⵉⵏⴷ ⴷ ⵙⵙⴰⵍⵟⴰⵏⴰ ⵏ ⵄⵓⵎⵎⴰⵏ.
