ⵉⵙⵙⵉⵅⴼ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵢⴰⵏ ⵓⴳⵔⴰⵡ ⵉⵥⵍⵉⵏ ⵙ ⵓⵣⵓⴳⴳⵣ ⵏ ⵓⵚⵏⴼⴰⵕ ⵏ ⵜⵙⵖⵉⵢⵜ ⵏ ⵓⵏⴳⵔⴰⵡ ⵏ ⵜⴷⵓⵙⵉ
ⵉⵙⵙⵉⵅⴼ ⵎⴰⵙⵙ ⵄⴰⵣⵉⵣ ⴰⵅⵏⵏⵛ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⴰⵙⵙ ⵏ ⵡⴰⴽⵕⴰⵙ 19 ⴱⵕⴰⵕⵔ 2025 ⴳ ⵕⵕⴱⴰⵟ ⵢⴰⵏ ⵓⴳⵔⴰⵡ ⵉⵥⵍⵉⵏ ⵙ ⵓⵣⵓⴳⴳⵣ ⵏ ⵓⵚⵏⴼⴰⵕ ⵏ ⵜⵙⵖⵉⵢⵜ ⵏ ⵓⵏⴳⵔⴰⵡ ⵏ ⵜⴷⵓⵙⵉ ⵍⵍⵉ ⵅⴼ ⵜⵍⵍⴰ ⵜⵏⵟⵟⵓⴼⵜ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵔⴱⴱⵉ.
ⵓⴳⴳⴰⵏ ⵏⵏ ⴳ ⵓⴳⵔⴰⵡ ⴰⴷ, ⵍⵍⵉⵖ ⵜⵃⴰⴹⵕ ⵜⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵜⵥⵕⴼⵜ ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ ⴷ ⵓⵎⴰⵡⵙⴰⵙ ⵏ ⵜⴷⵓⵙⵉ ⴷ ⵡⴰⵔⴰⵢ ⴰⵏⴰⵎⵓⵏ ⵎⴰⵙⵙ ⴰⵎⵉⵏ ⵜⵜⵀⵕⴰⵡⵉ ⴷ ⵓⵎⴰⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵙⵍⵜ ⵎⴰⵙⵙ ⴼⴰⵡⵣⵉ ⵍⵇⵊⵄ ⴷ ⵓⵏⵎⵀⴰⵍ ⴰⵎⴰⵜⴰⵢ ⵏ ⵜⴼⵏⵉⵇⵜ ⵜⴰⵏⴰⵎⵓⵔⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ ⵎⴰⵙⵙ ⵃⴰⵙⵙⴰⵏ ⴱⵓⴱⵔⵉⴽ, ⵅⴼ ⵎⴰⵏⵉ ⵜⵍⴽⵎ ⵜⵡⵓⵔⵉ ⴳ ⵓⵣⵓⴳⴳⵣ ⵏ ⵓⵖⴰⵡⴰⵙ ⵏ ⵜⵓⵚⴽⴰ ⵏ ⵉⵙⴳⵏⴰⴼ ⵉⵙⴷⴰⵡⴰⵏ ⴷ ⵉⵏⵎⵏⴰⴹⵏ ⴷ ⵉⵙⴳⴰⵡⴰⵏⵏ ⵍⵍⵉ ⵉⵍⴽⵎⵏ 64 ⵏ ⵓⵚⵏⴼⴰⵕ. ⵖⵉⴽⵍⵍⵉ ⵏⵏ ⵓⴳⴳⴰⵏ ⴰⵡⴷ ⵅⴼ ⵎⴰⵏⵉ ⵜⵉⵡⴹ ⵜⵡⵓⵔⵉ ⵏ ⵓⵙⵡⵓⴷⴷⵓ ⵏ ⵓⵖⴰⵡⴰⵙ ⵏ ⵡⴰⵎⵎⴰⵙⵏ ⵏ ⵜⵙⵖⵉⵢⵜ ⵏ ⵡⴰⵎⵎⴰⵙⵏ ⵏ ⵜⴷⵓⵙⵉ ⵉⵎⵏⵣⴰ, ⴰⵔ ⵖⵉⵍⴰⴷ ⵉⵍⵍⴰ ⵜⵙⵖⵉⵢⵜ ⵏ 934 ⵏ ⵡⴰⵎⵎⴰⵙ ⵃⵎⴰ ⴰⴷ ⵉⵡⴹⵏ 1439 ⵏ ⵡⴰⵎⵎⴰⵙ ⵏ ⵜⴷⵓⵙⵉ ⴰⵎⵏⵣⵓ.
ⵖⵉⵍⵍⴰ ⵉⵍⵍⴰ ⵓⵎⴹⴰⴽⴰⵕ ⵅⴼ ⵓⵣⵓⴳⴳⵣ ⵏ ⵓⵖⴰⵡⴰⵙ ⵉⵥⵍⵉⵏ ⵙ ⵓⵙⴽⴰⵔ ⵏ ⵜⵔⵓⴱⴱⴰ ⵜⵓⴷⵓⵙⴰⵏⵉⵏ ⵜⵉⵏⴰⴽⴰⵍⵉⵏ ⵍⵍⵉ ⵔⴰⴷ ⵉⵙⵏⵜⵉ ⴳ ⵢⴰⵜ ⴳ ⵜⵙⴳⴳⵉⵡⵉⵏ ⵏ ⵜⴳⵍⴷⵉⵜ ⵍⵍⵉ ⵔⴰⴷ ⵉⴳ ⴰⵥⵎⵎⴰⵥⵍ ⴰⵎⴰⵣⵡⴰⵔⵓ ⴳ ⵉⴳⵔ ⴰⴷ.
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴳ ⵓⴳⵔⴰⵡ ⴰⴷ ⵎⴰ ⵙ ⵓⵔ ⵉⴳⵉ ⵓⵙⴳⴳⴷ ⴰⴷ ⴰⵎⴰⴷⴷⴰⵙ ⵏ ⵓⵏⴳⵔⴰⵡ ⵏ ⵜⴷⵓⵙⵉ ⵍⵍⵉ ⵜⴳⴳⴰ ⵜⵏⴱⴰⴹⵜ ⵙ ⵜⵎⴰⵙⴰⵢⵜ ⴷ ⵓⵙⵡⵓⴷⴷⵓ ⵏ ⵜⴰⵔⴰⵜⵉⵏ ⵜⵉⴳⵍⴷⵏⵉⵏ ⵢⴰⵜⵜⵓⵢⵏ ⵖⴰⵙ ⵜⵎⴳⴳⵉⵢⵉⵏ ⵜⵉⵥⴹⴰⵕⵉⵏ ⴷ ⵜⵥⵕⴼⴰⵏⵉⵏ ⴷ ⵜⵏⴰⴼⴳⴰⵏⵉⵏ, ⵎⴰⵛ ⵉⵔⴰ ⴰⴷ ⵢⴰⵍⵍ ⴳ ⵡⴰⵜⵉⴳ ⵏ ⵉⵏⴰⵥⴰⵕⵏ ⵉ ⵥⵍⵉⵏ ⵙ ⵜⵏⵏⵓⴱⴹⴰ ⵏ ⵓⵙⵡⵓⴷⴷⵓ ⴷ ⵜⵉⵏ ⵜⵎⵔⵙⴰⵍ.
ⵉⵙⵎⵖⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵜⵡⵓⵔⵉ ⵉⵜⵜⴰⵡⵙⴽⴰⵔⵏ ⴳ ⵓⵙⵡⵉⵔ ⵏ ⵓⵣⵣⵓⴳⵣ ⵏ ⵜⵓⴳⵜ ⵏ ⵉⵚⵏⴼⴰⵕⵏ ⵉⵥⵍⵉⵏ ⵙ ⵓⵙⴳⴳⴷ ⵏ ⵓⵏⴳⵔⴰⵡ ⵏ ⵜⴷⵓⵙⵉ ⵜⴰⵏⴰⵎⵓⵔⵜ, ⵉⵜⵜⵔ ⵉ ⵉⴳⵔⴰⵏ ⵉⵎⴰⵡⵙⴰⵙⵏ ⴰⴷ ⵙⵙⵓⴳⵜⵏ ⴳ ⵜⵎⴳⴳⵉⵢⵉⵏ ⴷ ⵓⴹⴼⵉⵕ ⵏ ⵜⴰⵣⵣⴰⵣⵜ ⵏ ⵓⵙⵡⵓⴷⴷⵓ ⵏ ⵉⴼⵔⴷⴰⵙ ⵏ ⵓⵙⴳⴳⴷ ⴰⴷ, ⵃⵎⴰ ⴰⴷ ⵢⵉⵍⵉ ⵓⵙⵖⵓⴷⵓ ⵏ ⵓⵚⵏⴼⴰⵕ ⴰⴷ ⵙ ⵜⵖⴰⵔⴰⵙⵜ ⵏ ⵓⵙⵡⵓⴷⴷⵓ ⵏ ⵜⴰⵔⴰⵜⵉⵏ ⵜⵉⴳⵍⴷⴰⵏⵉⵏ ⵢⴰⵜⵜⵓⵢⵏ.
