ⵉⵙⵏⵓⴱⴱⴳ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵄⴰⵣⵉⵣ ⴰⵅⵏⵓⵛ ⵎⴰⵙ ⵏⵉⵥⴰⵕ ⴱⴰⵔⴰⴽⴰ ⴳ ⵓⵙⴰⵜⵉ ⵏ ⵉⵎⵛⴰⵡⴰⵔⵏ ⵖⴼ ⵓⵙⵉⵍⵖ ⵏ ⵜⵏⴱⴰⴹⵜ

ⵉⵙⵏⵓⴱⴱⴳ ⵎⴰⵙⵙ ⵄⴰⵣⵉⵣ ⴰⵅⵏⵓⵛ  ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⴰⵙⵙ ⴰ ⵏ ⵓⵢⵏⴰⵙ ⴳ ⵕⵕⴱⴰⵟ,  ⵏⵉⵥⴰⵕ ⴱⴰⵔⴰⴽⴰ ⴰⵏⴼⵍⵓⵙ ⵏ ⵓⴽⴰⴱⴰⵕ ⵏ ⵜⵙⵉⵎⴰⵏⵜ, ⴳ ⵓⵙⴰⵜⵉ ⵏ ⵉⵎⵛⴰⵡⴰⵔⵏ ⵖⴼ ⵓⵙⵉⵍⵖ ⵏ ⵜⵏⴱⴰⴹⵜ.
ⵉⵙⵙⵏⵜⵎ ⵓⵏⴼⵍⵓⵙ ⵏ ⵓⴽⴰⴱⴰⵕ ⵏ ⵜⵙⵉⵎⴰⵏⵜ, ⵎⴰⵙⵙ ⵏⵉⵥⴰⵕ ⴱⴰⵔⴰⴽⴰ, ⵎⴰⵙ ⵔⴰⴷ ⵢⵉⵍⵉ ⵓⵎⵙⴳⴷⴰⵍ ⵏ ⵓⵙⴼⵙⵔ ⵍⵍⵉ ⵉⵙⵙⵏⴽⵔ ⵎⴰⵙⵙ ⴰⵅⵏⵓⵛ, ⴳ ⵓⵙⴰⵜⵉ ⵏ ⵉⵎⵓⵖⵏⴰ ⵉⵏⵖⵜⴰⵙⵏ ⵏ ⵓⴽⴰⴱⴰⵕ, ⴳ ⵓⵙⵇⵇⵉⵎ ⵏⵏⵙ ⴰⵏⴰⵎⵓⵔ. 
ⵉⵔⵏⵓ ⵎⴰⵙⵙ ⴱⴰⵔⴰⴽⴰ, ⴳ ⵜⴰⵙⴳⵓⵔⵉ ⵏⵏⵙ ⵉ ⵜⵖⵎⵙⴰ, ⵎⴰⵙ ⵉⴳⴰ ⵓⵎⵙⴰⴳⴰⵔ ⴰⴷ ⵍⵍⵉ ⵉⴽⵛⵎⵏ ⴳ ⵓⵙⴰⵜⵉ ⵏ ⵉⵎⵛⴰⵡⴰⵔⵏ ⵖⴼ ⵓⵙⵉⵍⵖ ⵏ ⵜⵏⴱⴹⵜ ⵜⴰⵎⴰⵢⵏⵓⵜ, ⴰⵣⵎⵣⵣⵓ ⵉ ‘ ⵓⵎⵙⴳⴷⴰⵍ ⵉⴷⵜⵜⴰⵏ ⵙⴽⴰⵏ ⵣⵡⴰⵔ ⵖⴼ ⵢⵉⵎⴰⵏ ⵏ ⵜⵏⴰⵎⵓⵔⵜ ⵓⵍⴰ ⵜⵉⵔⴰⵜ ⵉⴷⵓⵙⵏ ⵃⵎⴰ ⴰⴷ ⵉⴳ ⵓⵙⵔⵙ ⵡⵉⵏ ⵜⵎⵔⴰⵔⵓⵜⵉⵏ ⴰⴽⴷ ⵉⵙⵉⵜⵉⵎⵏ ⵉ ⵉⵏⵎⵓⵔⴰⵏ ⴷ ⵜⵏⵎⵓⵔⵉⵜⵉⵏ ⵓⵍⴰ ⴰⵙⵓⵖⵍ ⵏ ⵜⴼⵍⵙⵜ ⵏⵏⵙ, ⴷ ⵓⵙⵔⵙ ⵏ ⵓⵙⴽⵓ ⵏ ⵢⵉⵎⴰⵍ ⵙⴳ ⵓⵣⵓⵔⵜ ⴰⵎⴰⵢⵏⵓ ⵏ ⵜⴳⵎⵉ.
ⵉⵏⵄⵜ ⵙ ⵎⴰⵙ “ ⵔⴰⴷ ⵉⵍⵉⵏ ⵉⵎⵛⴰⵡⴰⵕⵏ ⵉⵙⵜⴰⵡⵀⵎⵎⴰⵏ ⴰⴽⴷ ⵓⵏⵙⵙⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⵍⵏ ⵖⴼ ⵓⵖⴰⵡⴰⵙ ⵏ ⵓⵏⴱⵉⴹ ⴷ ⵉⴷⴷⴰⵏ ⵃⵎⴰ ⴰⴷ ⴳⵉⵙ ⵙⵙⵉⴷⴼⵏ ⵜⵓⴳⵜ ⵏ ⵉⵙⵖⵡⴰⵏ” ⵍⵍⵉ ⵓⵎⴰⵏ ⵉⵖⴰⵡⴰⵏ ⵏ ⵉⵙⵜⴰⵢⵏ ⵏ ⵉⴽⴰⴱⴰⵕⵏ ⵍⵍⵉ ⵔⴰⴷ ⵉⵙⵙⵉⵍⵖ ⵜⵓⴳⵜ ⵜⵓⵏⴱⵉⴹⵜ.
ⴷⴼⴼⵉⵔⴰⵙ ⵉⵙⵙⵔⵖⵓⴷ ⵎⴰⵙⵙ ⵏⵉⵥⴰⵕ ⴱⴰⵔⴰⴽⴰ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⵍⵏ ⵖⴼ ⵜⴼⵍⵙⵜ ⵜⴰⴳⵍⴷⴰⵏⵜ ⴷ ⵜⴼⵍⵙⵜ ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⵉⵜⵉⵏ, ⵉⵙⵙⵉⵜⵎ ⴰⵙ ⴰⵎⵓⵔⵙ ⵉⵎⴷⴰⵏ.
ⵉⴽⴽⴰ ⵎⴰⵙⵙ ⴰⵅⵏⵓⵛ ⵉⵙⵙⵏⵜⴰ, ⵜⵉⴼⴰⵡⵜ ⵏ ⵡⴰⵙⵙ ⴰ, ⵉⵎⵛⴰⵡⴰⵕⵏ ⵏⵏⵙ ⵃⵎⴰ ⴰⴷ ⵉⵙⵙⵉⵍⵖ ⵜⴰⵏⴱⴰⴹⵜ ⵜⴰⵎⴰⵢⵏⵓⵜ ⵙ ⵓⵎⵙⴰⴳⴰⵔ ⴰⴽⴷ ⵄⴱⴷ ⵍⵍⵉⴼ ⵡⴰⵀⴱⵉ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⴽⴰⴱⴰⵕ ⵏ ⵜⵥⵖⵕⵜ ⴷ ⵜⵎⵜⵔⴰⵔⵜ.
ⵉⴳⴰ ⵓⴽⴰⴱⴰⵕ ⵏ ⵜⵙⵉⵎⴰⵏⵜ, ⵢⴰⵏ ⵙⴳ ⵉⴳⵊⴷⵉⵜⵏ ⵏ ⵜⵣⵓⵍⵜ ⴳ ⵍⵡⵉⵍⴰⵢⴰ ⵜⵓⵣⵔⵉⴼⵜ ⵉⵣⵔⵉⵏ, ⵡⵉⵙⵙ ⴽⵕⴰⴹ ⴳ ⵉⵙⵜⴰⵢⵏ ⵏ ⵡⵉⵙⵙ ⵜⴰⵎ ⵛⵓⵜⴰⵏⴱⵉⵔ ⴷⴼⴼⵉⵔ ⵓⴳⵔⴰⵏ ⴰⵏⴰⵎⵓⵔ ⵏ ⵉⵍⴻⵍⵍⵉⵜⵏ (102) ⴷ ⵓⴽⴰⴱⴰⵕ ⵏ ⵜⵥⵖⵕⵜ ⴷ ⵜⵎⵜⵔⴰⵔⵜ (86), ⵉⴷⴷⵖ ⵢⵉⵡⵉ 81 ⵏ ⵓⵙⵇⵇⵉⵎ.
ⵉⵙⵏⵓⴱⴱⴳ ⴱⴰⴱ ⵏ ⵡⵓⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴰⵙⵉⵎⵡⴰⵙ ⵉⵣⵔⵉⵏ, ⴳ ⵉⴱⵔⴳⵎⵎⵉ ⴰⴳⵍⴷⴰⵏ ⴳ ⴼⴰⵙⵏ ⵎⴰⵙⵙ ⵄⴰⵣⵉⵣ ⴰⵅⵏⵓⵛ ⴰⵏⵙⵙⵉⵅⴼ ⵏ ⵓⴽⴰⴱⴰⵕ ⴰⴳⵔⴰⵡ ⴰⵏⴰⵎⵓⵔ ⵏ ⵉⵍⴻⵍⵍⵉⵜⵏ ⵉⵙⵎⵍ ⵜ ⴰⴷ ⵉⴳ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵉⵙⵎⴰⴳⵍ ⵜ ⴰⴷ ⵉⵙⵙⵉⵍⵖ ⵜⴰⵏⴱⴰⴹⵜ ⵜⴰⵎⴰⵢⵏⵓⵜ.
ⵉⵏⵏⴰ ⵎⴰⵙ ⴰⵅⵏⵓⵛ ⴷⴼⴼⵉⵔ ⵏ ⵓⵙⵏⴱⴱⴳ ⴰⴷ “ ⵔⴰⴷ ⵏⵕⵣⵎ ⵙⴳ ⴷⵖⵉ ⵉⵎⵛⴰⵡⴰⵕⵏ ⴰⴽⴷ ⵉⴽⴰⴱⴰⵔⵏ ⵍⵍⵉ ⵏ ⵏⵎⵣⵔ ⴰⴷ ⵉⴷⵙⵏ ⵏⵎⵙⵉⵙⵉ ⴳ ⵉⵎⴰⵍ, ⵃⵎⴰ ⴰⴷ ⵏⵙⵙⵉⵍⵖ ⵜⴰⵏⴱⴰⴹⵜ ⵉⵎⵙⴰⵙⴰⵏ ⵜⵎⵢⴰⵎⴰⵥ ⵜⵉⵍⵉ ⵉⵖⴰⵡⴰⵙⵏ ⵉⵎⵢⴰⴷⴰⵙⵏ.”
ⵉⴽⴽⴰ ⵓⴳⵎⴰⵎ ⵏ ⵓⵙⵉⵔⴰ ⴰⵙⵔⵜⴰⵏ ⵏ ⵓⴽⴰⴱⴰⵕ ⴰⴳⵔⴰⵡ ⴰⵏⴰⵎⵓⵔ ⵏ ⵉⵍⴻⵍⵍⵉⵜⵏ, ⵔⴰⵛⵉⴷ ⵟⵟⴰⵍⴱⵉ ⵍⵄⴰⵍⴰⵎⵉ, ⵉⴱⵔⵔⵃ ⵏⴰⴼ ⵉⴹⴳⴰⵎ ⴰⵚⵉⴹⵢⴰⵙ, ⵉⵙ ⵔⴰⴷ ⵓⵎⴰⵏ ⵉⵎⵛⴰⵡⴰⵕⵏ ⴰⴷ ⵇⵇⴰⵃ ⵉⴽⴰⴱⴰⵕⵏ ⵍⵍⵉ ⵢⵉⵡⵉⵏ ⵉⵙⵇⵇⵉⵎⵏ ⴳ ⵓⴱⵕⵍⴰⵎⴰⵏ,ⵃⵎⴰ ⴰⴷ ⵉⵜⵜⵓⴳ ⵓⵎⵙⴰⵙⴰ ⴰⵏⴽⴰⴱⴰⵕ ⵉⵙⵙⵉⵍⵉⵖⵏ ⵜⴰⵏⴱⴰⴹⵜ ⴷ ⵉⴷⴷⴰⵏ.