ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵕⴰⵙ 21 ⴷⵓⵊⴰⵏⴱⵉⵔ 2022
ⵜⴳⴰ ⵜⵏⴱⴰⴹⵜ, ⴰⵙⵙ ⵏ ⵓⴽⵡⴰⵙ 26 ⴳ ⵓⵜⴼⴼⴰⵙ ⵉⵣⵡⴰⵔⵏ 1444, ⵉⵎⵙⴰⵙⴰⵏ ⴰⴽⴷ 21 ⴷⵓⵊⴰⵏⴱⵉⵔ 2022, ⴰⴳⵔⴰⵡ ⵏ ⵜⵏⴱⴰⴹⵜ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵉⵜⵜⵓⵙⵜⴰⵢⵏ ⵉ ⵓⵎⵔⴰⵔⴰ ⵏ ⵡⴰⵡⴰⵍ ⴷ ⵓⵙⵖⵣⵏ ⵅⴼ ⵜⵓⴳⴳⵜ ⵏ ⵉⵙⵏⴼⴰⵔⵏ ⵏ ⵉⴹⵕⵉⵚⵏ ⵉⵣⵔⴼⴰⵏⵏ, ⴷ ⵉⴱⴷⴷⵉ ⵅⴼ ⵓⵎⵢⴰⵇⵇⴰⵏ ⴰⴳⵔⴰⵖⵍⴰⵏ, ⴷ ⵜⵙⵓⵎⵔⵉⵏ ⵏ ⵓⵙⵎⵎⴰⵍ ⴳ ⵉⵎⵓⵔⵏ ⵢⴰⵜⵜⵓⵢⵏ ⵙ ⵎⵉⵏ ⴷ ⵢⵓⵙⵏ ⴳ ⵢⵉⵎⵉⵔ 92 ⴳ ⵓⴷⵓⵙⵜⵓⵔ.
ⴰⵙⵉⵡⴹ ⴰⵏⵖⵎⴰⵙ (ⵜⵓⵏⵖⵉⵍⵜ ⵙ ⵜⵄⵕⴰⴱⵜ) ⴳ ⵜⵓⴹⴼⵉⵕⵉⵏ
ⴳ ⵜⵉⵣⵡⵓⵔⵉ ⵏ ⵓⴳⵔⴰⵡ ⴰⴷ, ⵉⵙⵖⵣⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵅⴼ ⵉⵙⵏⴼⴰⵔⵏ ⵉⵣⵔⴼⴰⵏⵏ ⵍⵍⵉ ⵅⴼ ⵢⴰⴷ ⵉⴳⴰ ⴰⵎⴷⵉⵡⴰⵍ ⴳ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵜⵜⵓⴳⴰⵏ ⴳ ⵓⵎⵣⵡⴰⵔⵓ ⵏ ⴷⵓⵊⴰⵏⴱⵉⵔ 2022, ⴰⵢⵏⵏⴰ ⵉⵜⵜⴳⵏ:
- ⴰⵙⵏⴼⴰⵔ ⴰⵣⵔⴼⴰⵏ ⵓⵟⵟⵓⵏ 07.22 ⵉⵇⵇⵏ ⵖⵔ ⵜⵙⴽⵔⵉⵡⵜ ⵏ ⵜⴳⵔⴰⵡⵜ ⵜⴰⵎⴰⵜⵜⴰⵢⵜ ⵉ ⵜⴷⵓⵙⵉ;
- ⴰⵙⵏⴼⴰⵔ ⴰⵣⵔⴼⴰⵏ ⵓⵟⵟⵓⵏ 08.22 ⵉⵇⵇⵏ ⵖⵔ ⵜⵙⴽⵔⵉⵡⵜ ⵏ ⵜⴳⵔⴰⵡⵉⵏ ⵜⴷⵓⵙⴰⵏⵉⵏ ⵜⵉⵎⵓⵔⴰⵏⵉⵏ;
- ⴰⵙⵏⴼⴰⵔ ⴰⵣⵔⴼⴰⵏ ⵓⵟⵟⵓⵏ 0ⴰ.22 ⵉⵇⵇⵏ ⵖⵔ ⵉⵙⵓⴳⵔⵏ ⵉⴷⵙⵍⴰⵏ ⵉⵜⵜⵓⴼⴽⴰⵏ ⵉ ⵉⵙⵓⴳⴰⵎⵏ ⵉⵏⴰⴼⴳⴰⵏⵏ ⴳ ⵜⵡⵓⵔⵉ ⵏ ⵜⴷⵓⵙⵉ;
- ⴰⵙⵏⴼⴰⵔ ⴰⵣⵔⴼⴰⵏ ⵓⵟⵟⵓⵏ 10.22 ⵉⵇⵇⵏ ⵖⵔ ⵜⵙⴽⵔⵉⵡⵜ ⵏ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵉ ⵜⵙⴰⴼⴰⵔⵏ ⴷ ⵜⵢⴰⴼⵓⵜⵉⵏ ⵏ ⵜⴷⵓⵙⵉ;
- ⴰⵙⵏⴼⴰⵔ ⴰⵣⵔⴼⴰⵏ ⵓⵟⵟⵓⵏ 11.22 ⵉⵇⵇⵏ ⵖⵔ ⵜⵙⴽⵔⵉⵡⵜ ⵏ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵉ ⵉⴷⴰⵎⵏⵏ ⴷ ⵉⵙⵓⴼⵖⵏ ⵏⵏⵙ.
ⴷⴳ ⵎⴰⵏ ⴰⵢⵏⵏⵉ, ⵉⴳⴰ ⵓⵙⵇⵇⵉⵎ ⵏ ⵜⵏⴱⴰⴹⴰⵜ ⴰⵎⵔⴰⵔⴰ ⵏ ⵡⴰⵡⴰⵍ ⴷ ⵓⵙⵖⵣⵏ ⵏ ⴽⵕⴰⴹ ⵉⵙⵏⴼⴰⵔⵏ ⵉⵎⵕⵚⵓⵎⵏ, ⵉⵙⵏⴽⴷ ⵜⵏ ⵎⴰⵙⵙ ⵎⵓⵃⵎⵎⴰⴷ ⵃⵊⵉⵡⵉ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⵏⴰⴱⴹⵜ, ⴳ ⵓⴷⵖⴰⵔ ⵏ ⵡⴰⵎⵙⵙⴰ ⵏⴰⴷⵉⵢⴰ ⴼⵜⵜⴰⵃ, ⵜⴰⵎⴰⵡⵙⴰⵙⵜ ⵏ ⵜⴷⴰⵎⵙⴰ ⴷ ⵜⵥⵕⴼⵜ, ⴰⵢⵏⵏⴰ ⵉⵇⵇⵏ ⵖⵔ:
- ⴰⵙⵏⴼⴰⵔ ⵓⵎⵕⵚⵓⵎ 2.22.796 ⵉⵇⵇⵏ ⵖⵔ ⵜⵉⴳⴳⵉ ⵏ ⵜⴳⵔⴰⵡⵜ ⵏ ⵓⵎⵛⵉⵡⴰⵕ ⵅⴼ ⵜⵙⵔⵜⴰⵢ ⴷ ⵡⴰⵡⵡⴰⵙ ⵉ ⵓⵡⴰⵏⴽ ⴷ ⵜⴰⵎⴰⵎⴽⵉⵏ ⵏ ⵓⵙⵙⵓⴷⵓ ⵏⵏⵙⵏⵜ.
- ⴰⵙⵏⴼⴰⵔ ⵏ ⵓⵎⵕⵚⵓⵎ 2.22.581 ⵏ ⵓⵙⵡⵜⵜⵓ ⵏ ⵜⴼⴰⴷⵉⵡⵉⵏ ⵏ ⴷ ⵜⵎⴰⵎⴽⵉⵏ ⵏ ⵓⵙⵎⵎⴰⵍ ⵏ ⵉⴳⵏⵙⴰⵙ ⵏ ⵓⵡⴰⵏⴽ ⴳ ⵉⵎⴰⵙⵙⵏ ⵏ ⵓⵎⵙⴰⵡⴰⴹ ⵉ ⵜⵎⵔⵙⴰⵍ ⴷ ⵜⵎⵙⵙⵓⵔⵉⵏ ⵜⵉⴳⴷⵓⴷⴰⵏⵉⵏ, (ⵜⴰⵍⵖⴰ ⵜⴰⵎⴰⵢⵏⵓⵜ).
- ⴰⵙⵏⴼⴰⵔ ⵏ ⵓⵎⵕⵚⵓⵎ 2.22.582 ⵏ ⵓⵙⵡⵜⵜⵓ ⵏ ⵜⴼⴰⴷⵉⵡⵉⵏ ⴷ ⵜⵎⴰⵎⴽⵉⵏ ⵏ ⵓⵙⵎⵎⴰⵍ ⵏ ⵉⴳⵎⴰⵎⵏ ⵉⵙⵉⵎⴰⵏⵏ ⴳ ⵉⵎⴰⵙⵙⵏ ⵏ ⵓⵎⵙⴰⵡⴰⴹ ⵉ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵡⴰⵜⵉⴳⵏ ⴷ ⵜⵎⴰⵎⴽⵉⵏ ⵏ ⵓⴼⵔⵔⵓ ⵏ ⵡⴰⵔⵔⴰⵣⵏ ⴰⵙⵏ ⵉⵜⵜⵓⴼⴽⵏ, (ⵜⴰⵍⵖⴰ ⵜⴰⵎⴰⵢⵏⵓⵜ).
ⵉⵙⵙⵓⴷⵓ ⵓⵙⵇⵇⵉⵎ ⵏ ⵜⵏⴱⴰⴹⵜ ⴳ ⵜⵡⵓⵔⵉⵡⵉⵏ ⵏⵏⵙ ⵙ ⵉⴱⴷⴷⵉ ⵅⴼ ⵜⵎⵢⴰⵇⵇⴰⵏⵜ ⴳ ⵢⵉⴳⵔ ⵏ ⵜⵡⵓⵔⵉⵡⵉⵏ ⵏ ⵡⴰⵙⵙⴰⵢ ⵏ ⵢⵉⴳⵏⵏⴰ ⵏⴳⵔ ⵜⵏⴱⴰⴹⵜ ⵏ ⵍⵎⵖⵔⵉⴱ ⴷ ⵜⵏⴱⴰⴹⵜ ⵏ ⵜⵢⴳⵍⴷⵉⵜ ⵏ ⵙⵙⴰⵄⵓⴷⵉⵢⴰ, ⵉⵜⵜⵓⵙⴳⵎⴹⵏ ⴳ ⵎⵓⵏⵜⵉⵕⵢⴰⵍ (ⴽⴰⵏⴰⴷⴰ) ⴳ 28 ⵛⵓⵜⴰⵏⴱⵉⵔ 2022, ⴷ ⵓⵙⵏⴼⴰⵔ ⴰⵣⵔⴼⴰⵏ ⵓⵟⵟⵓⵏ 55.22 ⵅⴼ ⵜⵎⵙⴰⵙⴰ ⵜⵎⵢⴰⵇⵇⴰⵏⵜ ⵉⵜⵜⵓⴱⴷⴰⵔⵏ, ⵉⵙⵏⴽⴷ ⵜⵏ ⵎⴰⵙⵙ ⵏⴰⵚⵕ ⴱⵓⵕⵉⵟⴰ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⴽⵔⵉⵇⵉⵢ ⴷ ⵉⵎⵖⵔⴰⴱⵉⵢⵏ ⵏ ⴱⵕⵕⴰ.
ⵉⵔⴳⵍ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵉⵡⵓⵔⵉⵡⵉⵏ ⵏⵏⵙ ⵙ ⵓⵎⴷⵉⵡⴰⵍ ⴷ ⵓⵙⵖⵣⵏ ⵅⴼ ⵜⵙⵓⵎⵔⵉⵏ ⵏ ⵓⵙⵎⵎⴰⵍ ⴳ ⵉⵎⵓⵔⵏ ⵢⴰⵜⵜⵓⵢⵏ ⵙ ⵎⵉⵏ ⵉⵎⵙⴰⵙⴰⵏ ⴷ ⵉⵎⵉⵔ 92 ⴳ ⵓⴷⵓⵙⵜⵓⵔ.
- ⴳ ⵜⵎⴰⵡⴰⵙⵜ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ, ⵉⵜⵜⵓⵙⵎⴰⵍ:
- ⵎⴰⵙⵙ ⵟⴰⵀⴰ ⵖⴰⵣⵉ, ⴷ ⴰⵏⵎⵀⴰⵍ ⵉ ⵜⵎⴳⵓⵔⵉ ⵡⵉⵏ ⵏ ⵓⵥⵟⵟⴰ ⴷ ⵢⵉⵍⵎ;
- ⵎⴰⵙⵙⴰ ⴰⵃⵍⴰⵎ ⵍⴳⵣⵉⵔⵉ, ⴷ ⵜⴰⵏⵎⵀⴰⵍⵜ ⵉ ⵜⵖⴰⵡⵙⵉⵡⵉⵏ ⵜⵉⵣⵔⴼⴰⵏⵉⵏ ⴷ ⵉⵎⵏⵏⵣⴰⵖⵏ;
- ⵎⴰⵙⵙ ⵕⴰⵛⵉⴷ ⵍⴱⵓⵄⵣⵣⴰⵡⵉ, ⴷ ⴰⵏⵎⵀⴰⵍ ⵏ ⵓⵙⵉⵍⵖ ⴳ ⵜⴰⵣⵣⵓⵍⵉⵏ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ ⴷ ⵜⴷⴰⵎⵙⴰ ⵜⴰⵎⵓⵟⵟⵓⵏⵜ ⴷ ⴳ ⵢⵉⴳⵔ ⵏ ⵜⵙⵏⴰⵜⵢⵜ ⵏ ⵜⵎⵙⵙⵏⵜⵉⵜⵉⵏ;
- ⵎⴰⵙⵙ ⵢⵓⵙⴼ ⴼⴰⴹⵉⵍ, ⴷ ⴰⵏⵎⵀⴰⵍ ⵏ ⵜⵎⴳⵓⵔⵉ ⵡⵉⵏ ⵏ ⵡⵓⵜⵜⵛⵉ;
- ⴳ ⵜⵎⴰⵡⴰⵙⵜ ⵏ ⵜⴼⵍⵍⴰⵃⵜ ⴷ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ -ⵉⴳⵔ ⵏ ⵜⴳⵯⵎⵔⵜ ⵜⴰⵢⵍⴰⵏⵜ, ⵉⵜⵜⵓⵙⵎⴰⵍ:
- ⵎⴰⵙⵙ ⵎⵓⵃⵎⵎⴰⴷ ⴰⵃⵎⴰⵎⵎⵓ, ⴷ ⴰⵏⵎⵀⴰⵍ ⵉ ⵓⵙⵉⵏⴰⴳ ⴰⵏⴰⴼⵍⵍⴰ ⵏ ⵜⴳⵯⵎⵔⵜ ⵜⴰⵢⵍⴰⵏⵜ ⴳ ⵓⴳⴰⴷⵉⵔ.
